Proverbs 23
23
-6-
1Nó꞉nen enhsátien tenhsatská꞉hon taietsatón꞉te nónhka rahsennowá꞉nen, sehià꞉rak tsi è꞉neken thótte. 2Tókaʼ sekʼhowá꞉nen satatié꞉na tóhsa wé꞉so í꞉sek. 3Tóhsa kwéskwes satatón꞉ni, kakhwí꞉io nahò꞉ten enhià꞉nonte, tókaʼ nón꞉wa nek ne iateʼnienténhse.
-7-
4Kwáh iatekaièn꞉tak tsi tesaʼnikonhrátheʼk ne tóhsa tahsatatwishenhé꞉iaʼte tsi sateʼniéntha naesakwáhtsheʼne. 5Sahwísta iohsnó꞉re ienwáhtshaʼahte tsi shí꞉ken taonttsiraríkhon tánon waʼtkanerahontshón꞉taʼne tsi ní꞉ioht ne á꞉kweʼks waʼtká꞉ten.
-8-
6Tóhsa tesatská꞉hon raotekhwahraʼtsherákta ne roní꞉ʼon, tóhsa ó꞉ni kwéskwes satatón꞉ni ne kakhwí꞉io enhiá꞉tatshe. 7Wahèn꞉ron, “Háʼo shé꞉kon sasatatéhrhahs,” iáh kiʼ tho tehorihò꞉ten, aseʼkénh tsi nahò꞉ten ranonhtónnion tho kiʼ ó꞉ni nihaiaʼtò꞉ten. 8Entehsátstike tsi nahò꞉ten wáhseke, tánon tsi nahò꞉ten waʼtehtsherènhsaron enkaiésha.
-9-
9Tóhsa sateʼnién꞉ten taiesenihthá꞉ren ne nahò꞉ten orí꞉wa ne tehotenonhwarorí꞉tonte; aseʼkénh iáh tehó꞉ien nahawerienʼtí꞉io.
-10-
10Tóhsa nonwén꞉ton iahá꞉srek tsi karistí꞉seron nonhwéntsa tánon tóhsa nonwén꞉ton shéhkhwa raononhwéntsa ne ratiksaʼokón꞉ʼa tehonatonhnhakarí꞉ʼon. 11Roiá꞉ner ne roʼshatstenhserowá꞉nen tehshakóhnhes tánon tenhariʼwakéhnha ne raotirhwà꞉ke.
-11-
12Satahónhsatat nónhka iesarihonnién꞉ni tsi ní꞉kon enhskwé꞉ni nahseweientéhtaʼne.
-12-
13Tóhsa tesanonhià꞉nik nahshehré꞉wahte sheienʼokón꞉ʼa. Iáh thahotíriohte ne tahshehnà꞉tsheke. 14Tókaʼ nón꞉wa ne enkarihón꞉ni enhotiʼniá꞉kenhte.
-13-
15Konién꞉ʼa, tókaʼ tensaʼnikonhrátheʼne, wé꞉so tsi enkatshennón꞉ni. 16Enkená꞉ieʼne nó꞉nen enwakathón꞉teʼne tsi sáhthare nattokháhtshera owennaʼshón꞉ʼa.
-14-
17Tóhsa sheiahská꞉nek ne rotirihwanerenʼákskon; nek etskweniènhsthak ne Roiá꞉ner nek tetská꞉nerak ní꞉se tsi sónhnhe. 18Tóka tho ní꞉ioht tiótkon tsi nén꞉we kiʼ tsi tensaswátheʼke.
-15-
19Satahónhsatat, konién꞉ʼa, sattokhahtsheriióhak tánon kwáh tokén꞉ʼen sanonhtonnión꞉ko tsi ní꞉ioht tsi sonhnhétie. 20Tóhsa skátne sewé꞉shek nón꞉kwe só꞉tsi wé꞉so otsí꞉tsa ratihnekíhrha, tókaʼ oniʼ ne kákhwa roʼnohetstáhkhwa tsi rón꞉neks. 21Ne ratihnekaká꞉stha tánon ronnitshéhohs ne entkáhawe tsi enhotiténhton. Tókaʼ nek sarí꞉waien tahsahtská꞉hon tánon aiesén꞉taʼwe iohsnó꞉re otkaróhkwa enwá꞉ton ne satsherónnia.
-16-
22Etshatahónhsatat ne iaʼníha; tókaʼ iáh ráonha thaʼkénhake iáh kiʼ kén꞉ʼen thashéhseke. Nó꞉nen saʼnisténha entiakó꞉ionʼne shenaʼtón꞉hahs tsi sherihwakweniénhstha.
23Ne orihwí꞉io, attokháhtshera, karihonnienníhtshera tánon wanonhtonnionhtsherí꞉io ne kí꞉ken akwé꞉kon shaʼtékena nahskáriaʼke, nok só꞉tsi wé꞉so shaʼtékena nahsatenhní꞉non.
24Tókaʼ tehsonkweʼtaié꞉ri, rotí꞉ien kiʼ né꞉ʼe iesaién꞉ʼa nahonatonhnhá꞉rake. Tánon enwá꞉ton nahshená꞉ieʼne tókaʼ sawí꞉raien ne rattokhahtsherí꞉io.
25Tashé꞉ion iaʼníha tánon saʼnisténha nahniná꞉ieʼne ní꞉se sarihwà꞉ke; tahshé꞉ion saʼnisténha naiakotonhnhá꞉rake.
-17-
26Satahonhsí꞉iohst, konién꞉ʼa, tánon tsi kónhnhe satenonwará꞉ko. 27Waʼthonwisenʼtsheráksen tánon konnón꞉kwe ne iáh tetiotirihwaié꞉ri eʼthó nikontiiaʼtó꞉ten tsi ní꞉ioht ne iakoʼwènthohs waterístaien. 28Tiesahrhá꞉re tsi ní꞉iot ne ratinénhskwas, tánon onónha aotirí꞉wa ne ronnón꞉kwe nahontenahkwaié꞉sahteʼ.
-18-
29-30Takenaʼtón꞉hahs nón꞉kwe só꞉tsi wé꞉so ratihnekíhrha, tánon wé꞉so niaʼtekahné꞉kake enhóntkenʼse, tánon enkonnaʼtón꞉hahse nón꞉kwe ne iáh tehonatonhnháhere tánon rontatí꞉tenhre, tiótkon nek ne tahshakonaʼnikonhrhá꞉ren tánon rotirihwakaʼtén꞉ʼen. Tiotenekwà꞉ra ne ratikahrà꞉ke, tánon ronatkarewahtánion, aiotón꞉ʼon tóhsa eʼthó naiawén꞉ʼen. 31Tóhsa otsí꞉tsa ohné꞉ka tesarenʼkén꞉ni, aronhátien tsi kanekwenhtarí꞉io tánon wathnekatákwas tánon watié꞉sen tsi ienhsahnéhkwane. 32Tsi enióhrhenʼne íhsehreʼk tsi ní꞉ioht ne tókaʼ iothniarátteron sakárien. 33Niaʼté꞉kon teiotierónnion enhsatkahthóhseron, iáh thahskwé꞉ni nahsanonhtonnión꞉ko tánon orí꞉wa tsi ní꞉ioht tsi ahsatà꞉ti. 34Tho oni tsi íhsehre tsi shí꞉ken kaniataraʼkehkó꞉wa iéhseʼs, tisanewaraʼtén꞉ni tsi shí꞉ken sathonwíhare tsi kanáhstote kahonweiaʼkowàhne. 35“Kwáh í꞉kehre oʼthé꞉nen ónhte tewakkwáhton,” enhsì꞉ron; “Í꞉kehre ónhkaʼk ionkerióhshion, iáh kiʼ teké꞉iahre. Oh nekén꞉ʼen nontié꞉ren tsi iáh tétieʼs? Teiotonhwentsóhon shé꞉kon naonsahknekí꞉ra.”
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.