Proverbs 22
22
1Kaʼniká꞉ien ahsataterá꞉wase naiesahsenniʼióhake, kaʼton atshoʼkowáhtshera ne kiʼ sataterakwas naesahsenni꞉ióhake.
2Iakokwáhtshe tánon iakó꞉ten ne shá꞉ka tsi ní꞉ioht ne Roiá꞉ner tsi shakoiaʼtíson.
3Nón꞉kwe ionttokhahtsherí꞉io óksaʼk ienieièn꞉tereʼne tókaʼ tá꞉we ne kaʼnikonhrharáhtshera é꞉ren èn꞉ienhte, nok ónhka iáh tshiaʼtaionnonhtónnionhwe kwáh nen né꞉ʼe tho nienhén꞉ien tsi non tetekaʼnikónhrhare tánon nohnaʼkèn꞉kha entsontateriʼwáhsten.
4Tshewén꞉narak ne Roiá꞉ner, saní꞉tenht, tánon enhshié꞉na kakwahtshéhsera, kakwenienhstáhtshera tánon enhsonhnhé꞉son.
5Tókaʼ shenorónhkhwa tsi sónhnhe, é꞉ren í꞉seht tsi nón꞉we tewaterístaien, iakoié꞉nas ne iakorihwanerenʼákskon.
6Serihónnien ratiksaʼokón꞉ʼa tsi ní꞉ioht tsi ahonnónhnheke, tánon enhonnehiá꞉rake tsi nikarí꞉wes enhonnónhnheke.
7Rotikwahtshénion ronatatehnhaʼtsherón꞉ni ne rotitenhténion. Nónhka eniesahwístani í꞉se kiʼ senhnhá꞉tshera enwá꞉ton.
8Tókaʼ wahétken tsi nenhsheiatié꞉raʼse nonkwehshón꞉ʼa atkarónnia kiʼ ensehshienthó꞉ko, tánon enwató꞉kten ne nónhka akó꞉ren ahsheʼwíshaʼte.
9Tasarihwaié꞉rik tánon tashé꞉ion atenná꞉tshera ne iakotenhténion. Enhshié꞉na kaiaʼtateríhtshera.
10É꞉ren sheiaʼtenhá꞉wiht nónhka iontatkweniénhstha, thó꞉ne enwató꞉kten ne taionterihwakén꞉ni, taieriʼwakéhnha, tókaʼ ó꞉ni niaʼté꞉kon taiontaténhahse.
11Tókaʼ seriahsí꞉io tánon kawenní꞉ioʼs, nahò꞉ten aontahsewennínekenʼne, entsatén꞉roke kiʼ ne ronontí꞉io.
12 Roiá꞉ner enhanónhstate tsi nahò꞉ten tó꞉kenhske, nok ne iáh thaharihwaié꞉na raotiwén꞉na ne rotinó꞉wenʼs.
13Nón꞉kwe ronnentóhrha tió꞉konteʼ kanónhskon ratì꞉teron; rón꞉ton tókaʼ nón꞉wa kèn꞉reʼks eniakoié꞉na tókaʼ átste nienhón꞉ne.
14Atenaʼkwaiesáhtshera waterístaien—iakoié꞉nas ne ká꞉ti kí꞉ken Roiá꞉ner enhonwanaʼkón꞉ni.
15Ratiksaʼokón꞉ʼa kwáh nen né꞉ʼe shaʼoié꞉ra tsi ohnonhwarorí꞉ta tánon iáh tehatiʼnikón꞉rare tsi rontoriahnerónkwas, nok tókaʼ enhshehré꞉wahte enhotirihónnien oh ní꞉ioht tsi thaʼtahontó꞉tate.
16Tókaʼ enhsón꞉ni nahò꞉ten ahshé꞉ion ne rotikwáhtshe tánon tókaʼ ó꞉ni ehtà꞉ke enhsheión꞉ni ne rotitenhténion, íhsehre eʼthó naontá꞉we aiesakwáhtsheʼne, í꞉se kiʼ ó꞉ni ensenténhtaʼne.
Áhsen Niwáhsen Niiowén꞉nake Nattokháhtshera
17Satahónhsatat, tánon enkonrihónnien tsi nahò꞉ten ne rotiʼnikonhrowá꞉nenʼs thonatá꞉ti. Satéweienhst tsi nahò꞉ten shakotirihonnién꞉nis, 18tánon enhsatshennón꞉ni tókaʼ enhsehiá꞉rake ne raotiwennaʼshón꞉ʼa tánon enhskwé꞉ni taontahsatnaʼnéta. 19Tewakatonhwentsó꞉ni natsheniáhese ne Roiá꞉ner; ne ká꞉ti enkarihón꞉ni ó꞉nen enkonhró꞉ri. 20Áhsen niwáhsen niiorí꞉wake wakhiá꞉ton ní꞉se sarihwà꞉ke. Ne káhawe attokháhtshera tánon kaʼnikonhrí꞉io, 21tánon ensarihónnien nahò꞉ten kén꞉ton norihwí꞉io. Sók nó꞉nen ieniesaténniehte naserihwisákha, nek tentéhshawe tsi nahò꞉ten tkariwaié꞉ri nowennaʼshón꞉ʼa tenwaterihwaʼserá꞉ko.
-1-
22Tóhsa ehtà꞉ke sheión꞉ni ne rotí꞉ten só꞉tsi kenh sakwénion; tóhsa ó꞉ni ehtà꞉ke sheión꞉ni ne iáh thahatikwé꞉ni nahontatiaʼtakéhnha tsi tehshakotiiaʼtorehtáhkhwa. 23Roiá꞉ner tenhshakoriʼwakéhnhase ne raotirihwà꞉ke tánon enhshakotetshahníhten tsi ronnónhnhe nónhka enhonwanatetshahníhten.
-2-
24Tóhsa sheiatenroʼserónnien nón꞉kwe ronteriiohseranón꞉we tánon ratinaʼkwahseró꞉hen. 25Tókaʼ nón꞉wa enhseweientéhtaʼne tsi nihatiweiennò꞉ten tánon iáh thahskwé꞉ni taonsahsatté꞉ni.
-3-
26Tóhsa í꞉se sehrhá꞉ratst ahskáriaʼke nakó꞉ren iakotká꞉rote. 27Tókaʼ iáh thahskwé꞉ni nakwé꞉kon naonsahskáriaʼke, ienhatíhawe ók ó꞉ni ne sanákta.
-4-
28Tóhsa nonwén꞉ton iaʼsóhetst nonhwéntsa tsi non nikaristí꞉seron ne iethihsothokón꞉ʼa rotiieronnítston.
-5-
29Takenaʼtón꞉hahs nónhka raioʼtenhserí꞉io, tánon enkonnaʼtón꞉hahse ónhka sénha ionkweʼtí꞉io tánon tehotèn꞉tshon skátne ahonné꞉sheke ne rotinontí꞉ios.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.