Proverbs 20
20
1Só꞉tsi wé꞉so enhsnekí꞉ra tesaterienʼtakáriatonke tánon ensanonhwaró꞉rike. Teiotenonhwarorí꞉tonte naiakohné꞉kataʼne.
2Etshetshahní꞉shek ne ronontí꞉io nó꞉nen ronaʼkhwén꞉ʼen tsi ní꞉ioht tsi nihawennò꞉ten ne kèn꞉reʼks; enhtshenaʼkón꞉ni ne shaʼté꞉ioht ne ahsatatáhtenonwarhiakon.
3Thiʼkawenní꞉io ónhka tehotenonhwarorí꞉tonte aontahatáhsawen ne tahaterihwakén꞉ni; ne ioiánere é꞉ren satatiatenhá꞉wiht.
4Ne raiénthos só꞉tsi rentóhrha nahenʼtarakahrhátho ne rothéhtaien tsi nikahá꞉wi teiotonhwentsóhon, iáh oʼthé꞉nen kiʼ thahaienthó꞉ko.
5Nón꞉kwe akononhtonniónhtshera ne shá꞉ka ne tokʼniiohnó꞉teske ohnawerá꞉kon, nónhka iakoʼnikonhraientáhtskon ienieièn꞉tereʼne tsi nahò꞉ten ionnonhtónnions.
6Akwé꞉kon rón꞉ton rorihwató꞉ken tánon tharihwaié꞉rits, nek sateʼnién꞉ten ki ahtshiaʼtatshénriaʼse nónhka tho nihaiaʼtò꞉ten!
7Ronatáhska ratiksaʼokón꞉ʼa tókaʼ rotiʼní꞉sen ne rorihwakwaríhshion tánon tho nihaiéhrha tsi nahò꞉ten tkariwaié꞉ri.
8Ronontí꞉io tehshakoiaʼtoréhtha tánon roterién꞉tare nó꞉nen enhatkáhtho iáh tetkariwaié꞉ri.
9Ónhka kenh enhakwé꞉ni nahén꞉ron akwé꞉kon ioiánere tsi ranonhtónnionhs; é꞉ren rohawíhton tsi rorihwanéren?
10 Roiá꞉ner shakotahkwáhswenhs nón꞉kwe ieʼnikonhrhá꞉tha ne tehshakonatoʼktahkwén꞉nis tsi iekonʼtsheriháhrha tánon iontenienténhsthakwa.
11Ók ó꞉ni ratiksaʼokón꞉ʼa wé꞉ne tsi nikaksaʼtò꞉ten tsi nihontiéhrha; enhsáttoke tókaʼ rotirihwakwaríhshion tánon ratiksaʼtí꞉io.
12 Roiá꞉ner tehsonkwá꞉wi okà꞉ra naietewatkáhtho tánon ohónhta ne aionkwaʼthón꞉teʼne.
13Tókaʼ tió꞉konteʼ sèn꞉taʼs, ensenténhtaʼne kiʼ. Tesatateweienhá꞉rat tánon wé꞉so ensaièn꞉take náhseke.
14Rón꞉kwe nahò꞉ten rahní꞉nons tiótkon rorihwakaʼtén꞉ʼen só꞉tsi kanó꞉ron, sók tenhataterénhsaron tsi tahatihserón꞉nente tsi nahakáriaʼke.
15Tókaʼ saterién꞉tare nahò꞉ten sahtharáhkwen, ne ki sénha kanó꞉ron sá꞉ien tsi ní꞉ioht ne ohwistanoronʼshón꞉ʼa.
16Nónhka tehotenonhwarorí꞉tonte ne ahahrhá꞉ratste aonsahakáriaʼke tsi rotká꞉rote ne iáh tehoienté꞉ri, nek tsi raonhwentsá꞉ien iaʼténkene tsi enhshakáriaʼke.
17Nahò꞉ten ensaièn꞉taʼne ne kaʼnikonhrhá꞉ton tho ni꞉iot tsi ensé꞉ke tsi ní꞉iot ne kwáh kakhwí꞉io, nek tsi iohsnó꞉re tsi ní꞉ioht ne oʼnehsarónhkwa thentká꞉raʼne tshà꞉kon.
18Kaʼnikonhrí꞉io séhsak tánon ensaterihwahténtiaʼse; tóhsa iaʼhase tsi nón꞉we tewaterí꞉io tókaʼ iáh tesateʼnikonhrón꞉ni.
19Ne tekarihwenʼahwí꞉ton iáh nonwén꞉ton thaʼonteriʼwáhsehte. É꞉ren í꞉seht nón꞉kwe ne iakoterihwatié꞉ni.
20Tókaʼ enhshekenhrenʼsenón꞉ni iesaién꞉ʼa, tsi sónhnhe enwató꞉kten tsi ní꞉ioht ne oháhsera aón꞉swa nó꞉nen tetió꞉karas.
21Sénha watié꞉sen tsi aiesakwáhtsheʼne, ká꞉ron ki nenhsatshennónniaʼte.
22Tóhsa ní꞉se saskáriaʼkt nahò꞉ten wahétken. Tsheniáhes Roiá꞉ner ne enharihwakwatá꞉ko.
23 Roiá꞉ner shakóhswenhs nón꞉kwe ieʼnikonhrhá꞉tha tehshakonatoʼktahkwén꞉ni tsi enhatikhonʼtsherihá꞉ren.
24 Roiá꞉ner roteʼnikonhríson tsi niionkwahahó꞉ten; ónhka ká꞉ti eniakoʼnikonhraién꞉taʼne ne ráonha tsi nihohahò꞉ten?
25Seʼnikón꞉rarak tsi nahò꞉ten enhsanonhtónnionhwe ohén꞉ton nenhtshaʼrharátsten naontahtsion ne Rawenni꞉io. Tókaʼ nón꞉wa ensehsatateriʼwáhsten ohnaʼkèn꞉kha.
26Ronontí꞉io ne raʼnikonhraweiénhon enharihwatshén꞉ri nónhka karihwahétken tsi nihatiéhrha, iáh thahó꞉tenhre tsi ni꞉iot tsi enhohré꞉wahte.
27 Roiá꞉ner tehsonkwá꞉wi noʼnikòn꞉ra naionkwaterién꞉tarake nahò꞉ten ne tkariwaié꞉ri nahò꞉ten ó꞉ni ne wahétken; iáh thaʼón꞉ton naetewáhsehte tsi nitewatiéhrha.
28Ronontí꞉io enhoʼshatstenhseraièn꞉take tsi nikarí꞉wes rorihwakwaríhshion tánon thorihwaié꞉ri.
29Watkahthohtsherí꞉io raotiʼshatsténhsera ne kenʼnithotiién꞉sa#20.29 Enwá꞉ton nahsì꞉ron kenʼnithotiién꞉sa tókaʼ ó꞉ni kenʼnithotiión꞉sa. nok ne rotikstenʼokón꞉ʼa ó꞉nen rotiʼnonhkwareʼtarà꞉ken aó꞉wenk naiethikwénienhsteʼ.
30Sewatié꞉renʼs iohkará꞉renht tsi nahò꞉ten teionkwatohetstánion ne ki entkáhawe taonsetewatonhnhaté꞉ni.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.