Proverbs 19
19
1Ne sénha ioiánere naiesenténhton tánon aontesarihwaié꞉rike tsi ní꞉ioht naiesanonhwaró꞉rike tánon naiesanowénhake.
2Tókaʼ serihwakaʼrí꞉tats nahò꞉ten iáh tshiekaié꞉ri tesaterién꞉tare iáh kiʼ teioiánere; tókaʼ iáh tesaʼnikonhrí꞉io tenhsaʼnikonhrhá꞉ren kiʼ.
3Ótiaʼke nón꞉kwe eniontatkarón꞉ni tókaʼ ohnonhwarorí꞉ta tsi ní꞉ioht tsi iontonhianorónkwahs tánon enthonwàrahse Roiá꞉ner.
4Rotikwahtshénion watié꞉sen nahontenroʼseratshén꞉ri nok ne rotitenhténion iáh nen né꞉ʼe tho tewatié꞉sen nahonatenroʼséntake.
5Tókaʼ enhsanó꞉wenhte tsi ieiaʼtorehtáhkhwa, eniesahré꞉wahte—iáh thahseʼniá꞉kenʼne.
6Akwé꞉kon ionteʼniéntha ne è꞉neken thonátte aontón꞉sheke ahshakotirí꞉wawaʼse; akwé꞉kon ionhská꞉neks naiakotenroʼseraièn꞉take nónhka tehshakoná꞉wis ne kaiaʼtakehnháhtshera.
7Ók ó꞉ni ne ró꞉ten raohwá꞉tsire ronwakenhrón꞉ni; iáh ki teionehráhkwa tsi iáh tehotenroʼserá꞉ien. Iáh theʼtewatsteríhstha tho ni꞉iot tsi ahateʼnién꞉ten iáh kiʼ thahatkwé꞉ni nahateroʼserón꞉ni.
8Thaʼsatateweientón꞉hahs satéweienhst tsi ní꞉kon enhskwé꞉ni; sehià꞉rak nahò꞉ten wahseweientéhtaʼne sók ensakwáhtsheʼne.
9Iáh ónhka ne ionnowenhtánions tsi ieiaʼtorehtáhkhwa thaieʼniá꞉kenʼne naiontré꞉wahte; rothrewáhton.
10Nónhka tehonatenonhwahrorí꞉tonte iáh thaʼtehonatèn꞉tson kakwahtshehserá꞉kon ahatiʼteròn꞉take, tánon ratihnhá꞉tshera tóhsa ne è꞉neken ahonterihwá꞉rahkwe ohén꞉ton ne ratihsennowá꞉nenʼs.
11Tókaʼ sattokhahtsherí꞉io enhskwé꞉ni ki aontahseniaro꞉taroʼke ne sanaʼkhwénhsera. Nó꞉nen ónhka eniesaʼnikonhráksaʼte, ne iorihowá꞉nen tókaʼ enhskwé꞉ni tóhsa tahserihwáhshnieʼne.
12Ronontí꞉io raonaʼkhwènhsera ne shá꞉ka ne kèn꞉reʼks tsi ratonriá꞉iens, nok ne tókaʼ enhtshateweientón꞉hahse ne táhseren tsi ni iotshennónnia nó꞉nen eniokén꞉nore.
13Ne iáh thaʼtehotiʼnikonhráthe ratiksaʼokón꞉ʼa, niaʼté꞉kon entkáhawe nahotikarón꞉ni ne ronwatiién꞉ʼa. Ne iáh thaʼtehotiʼnikonhráthe shakotiienʼokón꞉ʼa entkáhawe niaʼté꞉kon ahontkarón꞉ni. Rón꞉kwe ronià꞉kon ne tió꞉konteʼ iakorihwakatèn꞉ʼen ne shá꞉ka ne tió꞉konteʼ ohné꞉kanos iotshánhon.
14Rón꞉kwe enwá꞉ton nahonwahiatonhserónnien kanónhsa tánon ohwísta, nek tsi Roiá꞉ner khók enhakwé꞉ni naontahonwatenniéhten ne tiakorihwaié꞉ri nahóniake.
15Waʼs ká꞉ti, sentóhrhak, sèn꞉taf, nok ki enhsatonhkáriaʼke.
16Shá꞉wak Rawenni꞉io raoianerénhsera tánon karí꞉wes enhshónhnheke; tókaʼ iáh thaʼshié꞉na, enhsíheie kiʼ.
17Nó꞉nen enshé꞉ion ne iakó꞉ten, ne shá꞉oriwa ne ahtshé꞉ni ne Roiá꞉ner tánon Roiá꞉ner enhshiakáriaʼkse.
18Sheriwakwaríhshien sheienʼokón꞉ʼa tsi nikarí꞉wes kenʼnihonná꞉sa nahatiweientéhtaʼne tsi nahò꞉ten ne tkariwaié꞉ri. Tókaʼ iáh tho tháhshiere sheienawá꞉se nahontatáhtonʼte.
19Tókaʼ ónhka ranaʼkhwahseró꞉hen, ráonha kiʼ ratkéhtat tsi neniá꞉wenʼne. Tókaʼ ká꞉ti énska ienká꞉ienhte nahtsheʼniá꞉kenhte, ó꞉nenk kiʼ tsi shé꞉kon ensehtsheʼniá꞉kenhte.
20Tókaʼ enhsatahónhsatate ne kaʼnikonhrí꞉io tánon thoʼnisaʼnikonhró꞉ten nahseweientéhtaʼne, entewenhnisera꞉teke tensaʼnikonhrátheʼne.
21Nón꞉kwe niaʼté꞉kon tsi ni tsi ahonteʼnikonhrísa, nok ki Roiá꞉ner tsi nihoʼnikonhró꞉ten eʼthó ki neniá꞉wenʼne.
22Ioterihwatéha ne iakotétshen; rotí꞉ten ne sénha ioiánere tsi ronnónhnhe tsi ní꞉ioht ne rotinó꞉wenʼs.
23Tshewènienstat ne Roiá꞉ner tánon karí꞉wes enhshónhnheke, skén꞉nen enhsanonhtonniónhake tánon ensaiaʼtanónhstate nahò꞉ten ahsatkarón꞉ni.
24Ótiaʼke nón꞉kwe só꞉tsi iakentóhrha natenná꞉tshera tsi iehshaká꞉ronte iaiakéta.
25Atkanronniáhtshera teiotonhwentsóhon akahrewáhton, ó꞉nen ki nen né꞉ʼe nón꞉kwe ne iáh tshiekaié꞉ri teiakoterién꞉tare enwá꞉ton naieweientéhtaʼne. Tókaʼ ká꞉ti tesaʼnikonhráthe, enhseweientéhtaʼne nónhka aiesarihwakwaríhshien.
26Nek ne kwáh iotonkwetatéha tánon rotatshennaksá꞉ton rón꞉kwe tenhoteriahtíkhon roʼníha tókaʼ ó꞉ni roʼnisténha aontahshakoiaʼtínekenhwe ne raonónhskon.
27Konién꞉ʼa, nó꞉nen enhsatoríhshen tsi sateweiénhstha iohsnó꞉re entsisaʼnikónhrhen nahò꞉ten saweientehtá꞉ʼon.
28Iáh theteká꞉ien naterihwakwarihshiónhtshera ne iakoteʼnikonhríson naierihwahní꞉rate nónhka aiontatkarón꞉ni. Nón꞉kwe iáh tetiakorihwaié꞉ri ienorónhkhwa tsi nahò꞉ten ne karihwáksen.
29Nónhka rontatkweniénhstha tánon rotinonhwaró꞉ri kwáh orihwí꞉io tsi ronnéhsaks nónhka ahonwanonwenhserário.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.