Numbers 7
7
Tsi Nithaʼtiʼiéstha Ne Shaʼkotihenténhse
1Né wenhniserátehkwe ne Mahís sahá꞉sa wahaʼtosehraʼkétsko tsi nónhwe nihénteron ne Roiá꞉ner, wahaʼrihwanírate tánon wahaʼhiatatéristhe natóhsehra ó꞉ni akwékon tsi niwatsʼthasónhas, ó꞉ni ne ietsienharákwah ó꞉ni akwékon tsi niwatsʼtasónhas. 2Ethòne ne tsi ratitáraien nohénton iehonhnéton tsi ronónha sakotiʼhenténhse tsi ratiʼtiókwaien NÍsraerʼró꞉nonke, né sahaʼtihiáta ronateríhonte nasakotiʼsenhnarónʼnion, 3tahatíhawe ne rahonataʼtawítsheras rahohénton ne Roiá꞉ner: ia-iak nikaserétakes wennnhí꞉seres tánon tekeni-iawénhre niháti tehotinákares tsioʼnónskwarons, skaʼsehrétha ne tenihiáse ne sakotihenténhse rahotirihwáke tánon sahiáta tehonákares tsionónskwahron né꞉ne sahiáta sakohenténhse raorihwáke. Nónen shiaʼhontkawánion, 4ne Roiá꞉ner wahaʼwénhase ne Mahís, 5“Tsiéna kí꞉ken atatawítsheras né nahónstonke tsi nakahioténhʼen natóhsehra aorihwáke; Levites thaʼséhion né énhonsthe tsi nikahiotenhseró꞉tens enhotiʼhióten.” 6Káti ne Mahís iahatʼkawánion ne wenhnhí꞉seres ó꞉ni ne tehotinákares tsionónskwahrons ne Levites. 7Tekaʼsehrétakes wenhnhí꞉sehres tánon kaiéri niháti tehotinákares tsionónskwahron thaʼsakáwen ne Gershonites, 8tánon kaiéri nikasehrétakes wenhnhí꞉seres tánon shaʼtékon niháti tehotinákares tsionónskwahrons tasakáwen ne Merarites. Akwékon tsi nihotiʼhiotenhsehrótens thóh ní꞉ioht tsi enhotiʼhióten tsi kíʼ nenhsakóhnaʼne ne Ithamar né꞉ne Aaron roiénha. 9Ók kíʼ ne Mahís iáh nènhne thènen theteshaʼkówi ne wennhí꞉seres iáh ó꞉ni ne tehothinákares tsionónskwahrons ne Kohathites, tsioríwa tsi nahoténsons ne iotokéntis ne ratiʼnikónhraʼre tsi enhonʼnenhshá꞉ren tsi ienhatíhaʼwe.
10Ne sakotiʼhenténhse tahatiʼhá꞉sheron ó꞉ni tsi nahoténsons nahón꞉ste nahontenikonhró꞉riaʼte tsi enkonhwatonhnahé꞉raʼse ne ietsienharákwah. Nónen sahontaʼteweienénhtaʼne niahatiʼrónhnion ne rahonaʼthatawítsheras ne ietsienharakwáhke, 11ne Roiá꞉ner wahawénhase ne Mahís, “Shé꞉rori niatewenhniseráke né꞉ne tèkeni ia-wénhre niwenhnisehráke nikaríwes shaʼtihiatáʼtshons ne sakotiʼhenténhse ienhontkaʼwá꞉nion ne rahonatatawítsheras tsi enkonhwatonhnahérase ne ietsienharákwah.”
12-83Ken ní꞉ioht tsi iaʼhontkawánion ne rahonathatawítsheras:
| Wenhniseráte | Ne Raotitsióhkwahs | Shaʼkotihéntense |
|---|---|---|
| Tahontiérenhte | Judah | Nahshon né roʼiénha né꞉ne Amminadab |
| Tewenhniserakéhaton | Issachar | Nethanel né roʼiénha né꞉ne Zuar |
| Asenháton niwenhniserakéhaton | Zebulun | Eliab né roʼiénha né꞉ne Helon |
| Kaieríhaton niwenhniserakéhaton | Reuben | Elizur ne roʼiénha né꞉ne Shedeur |
| Wiskʼháton niwenhniserakéhaton | Simeon | Shelumiel né roʼiénha né꞉ne Zurishaddai |
| Ia-iák-háton niwenhniserakéhaton | Gad | Eliasaph né roʼiénha né꞉ne Deuel |
| Tsatakʼháton niwenhniserakehaton | Ephraim | Elishama né roʼiénha né꞉ne Ammihud |
| Satekonhaton niwenhniserakéhaton | Manasseh | Gamaliel né roʼiénha né꞉ne Pedahzur |
| Tiotonháton niwenhniserakéhaton | Benjamin | Abidan né roʼiénha né꞉ne Gideoni |
| Noieríhaton niwenhniserakéhaton | Dan | Ahiezer né roʼiénha né꞉ne Ammishaddai |
| Nenskaʼiawénhre niwenhniserakéhaton | Asher | Pagiel né roʼiénha né꞉ne Ochran |
| Tekeniʼiawénhre niwenhniserakéhaton | Naphtali | Ahira né roʼiénha né꞉ne Enan |
Nathatawítsheras ne satiʼhiatá꞉tshons tahatíhaʼwe kwáh ne shá꞉kas: skák꞉sa ne kawistaráken áhsen nikakonhtseráke nihiókste tánon skák꞉sa ne kawistaráken ionhtsiohaʼretákwah aktónhtie ne tekakonhtseráke nihiókste, né꞉ne tkarihwaiéri rón꞉stha nahatikonhtseriháren, ne tekáksakes kwáh kananónhkons nothésera teweienaiéston né꞉ne onátsia aorihwáke; skák꞉sa owistanóron iáh nènhne sóh꞉tsi tehiókste, titkáhere ne kanetanóron; saiáta nithoʼhiónha té꞉ro, saiáta teiotinakaronhtónʼa rátsinn, tánon saiáta teiotinakaronhtónʼa owíra, né꞉ne ahonwateskónhten; saiáta kaiatákeras né꞉ne kariwáneren aorihwáke; tánon tenihiáse té꞉ro, wísk niháti teiotinakaronhtónha ratítsinn, wísk niháti kaiatákeras, tánon wísk niháti nénska tehonosehrihiákons teiotinakaronhtónha owíra, né꞉ne skaʼríhwa aorihwáke.
84-88Né tkaʼkwéktons ne thoʼthiʼiesthánion ne tékeni-iawénhre niháti sakotihenténhse né nakonwatonhnahérase ne ietsienharákwah kén ní꞉ioht thá꞉nions:
tèkeni-iawénhre nikakshákes kawistarákens tánon tékeni-iawénhre nikakshákes kawistarákens ionhtsioharetákwah norihwakwékon né꞉ne ká꞉nonh ne thó꞉wa iá꞉iak niwáhsen nikakonhtsheráke nihiókste
tékeni-iawénhre nikákshakes owistanóron né꞉ne ká꞉non ne kaiéri nikakonhtsheráke nihiókste, titkáhere kanethanóron
tekeni-iawénhre niháti té꞉ro, tekéni iawénhre niháti teiotinakaronhtónʼas ratítsinn, tánon tèkeni-iawénhre niháti teiotinakaronhtónhas owíras, ó꞉ni í꞉shinónhwe ne onátsias aorihwáke né konhtiʼkwekonhátie, né꞉ne hionhteskonhtáhkwahs
tekeni-iawénhre niháti kaiatákeras né꞉ne karihwáneren aorihwáke
tewáhsen-kaiéri niháti té꞉ros, ia-iak niwáhsenh niháti teiotinakaronhtónʼa ratítsinns, ia-iak niwáhsenh niháti kaiatákeras, ia-iak niwáhsenh niháti teiotinakaronhtónʼas owíra, né꞉ne skaʼríhwa íken aorihwá꞉ke.
89Nónen ne Mahís atohsehrákon niaháre ne Roiá꞉ner thaʼnitháren, wahothóntene ne Roiá꞉ner rotharáni thóh èhneken ne tsi iotenonhtékon Naterihwaʼseronhniátshera oneró꞉kwah, né tsi natehiátere ne teníhiase ne teninerahónhtsonhton tenironʼhiakeronnonhkówa.
Currently Selected:
Numbers 7: MHK
Highlight
Copy
Compare
Share
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
