Micah 3
3
1Tánon waʼkí꞉ron:
Sewatahónsatat, í꞉se nonón꞉tsi í꞉ken tsi nokwáh ne Jacob
tánon sewaʼkó꞉ras ne tsi ronón꞉shote ne Israel!
Iáh ken tehiówenk naisewaterienhtárake ne kaiá꞉neren?—
2Í꞉se ne sewáhsons ne ioiánere tánon ne sewanón꞉wes ne karihwahétken,
ietsiwarahratiónkwas nakonhkweʼtashón꞉as,
tánon sehwawarahrónkwas ne tsi rotistiénhtare;
3ietsiwáhrats nakonkweʼtashón꞉as,
ietsiiénhserons,
teieʼtsitientsá꞉kons;
tánon enieʼtsihiátsowe kwáh tsi ní꞉ioht noʼwá꞉ron
kwáh tsi ní꞉ioht nontakʼne kawaʼrá꞉re.
4Ethò꞉ne iathenhonsénhtho raonhà꞉ke ne Roiá꞉ner,
ók iáh kíʼ tathasakorihwaʼserá꞉kwahse;
enshakoʼkonsaséhthen né nenhkahá꞉wike,
tiorì꞉wa tsi nihatiweienaksénhskwa.
5Káti ráton ne Roiá꞉ner tsi nokwáh ne rotitokénhse
ronónha waʼsakonathahará꞉kwahte nakonkweʼtashón꞉as;
ne nó꞉nen thé꞉nen rotí꞉ien nahónhneke ronónha tehotihenré꞉tha ne “skén꞉nonk”;
nó꞉nen ne iáh othé꞉non teotí꞉ien nahónhneke,
ethò꞉ne enhonterí꞉io ne raónha.
6Ne káti aorì꞉wa ne sarihwà꞉ke thóh nienhiotónhake tsi nahtetiò꞉karas ne tsi niwasónhtes, iáh othé꞉nen thatahonshesatierónhnionse,
tánon thentsokaráseke ne sarihwà꞉ke, iáh othé꞉nen tahonsaiesarihotháshien;
Ienkará꞉kwenhne rononhà꞉ke ne rotitokénhse,
tánon ne tsi niwenhní꞉seres thentsiokaráseke ne raotirihwà꞉ke.
7Ne rotitokénhse kwáh enhonwanatehá꞉te,
né ronthiatonserátkenhse kwáh enhonwanateháte;
kwáh ratikwé꞉kon rontsá꞉nakes enhónste tsi enhatiró꞉roke ne tsi ratisaká꞉ronhte,
tsiórih tsi iáh tehatiié꞉nas ne tekarihwasehrá꞉ken ne Ní꞉ione nahontá꞉we.
8Ók kíʼ ní꞉i, kwáh tiataná꞉non naoshatsténhsera
né꞉ne raoshatsténhsera Roiá꞉ner,
tánon skátne ne kaiáneren ó꞉ni ne kaʼshatstenhserowá꞉nen,
né nahiró꞉ri ne Jacob ne raoriwaneraháktshera
ó꞉ni ne Israel aorihwaneraháktshera.
9Sewatónhtet kí꞉ken, í꞉se ne sewaʼkóras tsi ronónshote ne Jacob
tánon ne sewaterihón꞉tons ne raotinóns꞉kons ne Israerʼró꞉nons,
tsi ratí꞉sons ne kaiáneren
tehatiwátases nahò꞉ten ne ioterihwakwaríhshion í꞉ken,
10onekwénhsa nahò꞉ten ronatenathonhniáton ne Zion
tánon karihwahetkénhsera ne wahónste tsi wahontenatón꞉ni ne Jerusalem!
11Ne rahonhnonkweʼtashón꞉as ne ratirihwénhtha oʼwísta ronhwatikárhiakse ne nahatinikónhrate,
ne ratitsihénstatsis ratikaráiens tsi sakotirihonhnién꞉nis,
ne rotitokénhse tsi nishakotirihothashién꞉nis oʼwísta rotí꞉rare nahontahonhwénhnon;
nek kíʼ sá꞉ka raonhà꞉ke ne Roiá꞉ner iehatihiatarákare tánon rón꞉ton,
“Orihwiiohón꞉we ne Roiá꞉ner tsi tewakwé꞉kon!
Iáh othé꞉nen ne karihwahetkénhsera tahionkwárane.”
12É꞉tho káti í꞉se sarì꞉wa
ne Zion kwáh tsi ní꞉ioht ne kahentà꞉ke tsi enhathitarakarát꞉tho;
né Jerusalem né꞉ne ienhwá꞉ton enhiontohiótane ononhwénhsera,
tánon Nononsatokentikó꞉wane karakonʼkó꞉wa enwá꞉ton.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.