Micah 2
2
1Kwáh í꞉ken tsi ionikonráksat tsi nihiá꞉kon ionteʼnikonrón꞉nis ne kariwahneraháktshera
tánon ne kariwahetkénhsera ne rotiiò꞉tens ne rahotináktakes!
Nó꞉nen ienhiórenhne, thóh nenhatí꞉iere,
tiorì꞉wa tsi ronónha ratishatstenhserénhawe.
2Nó꞉nen enhonskáneke nahatiié꞉na ne kahentaʼshón꞉a, tánon kíʼ enhontsiatakweʼní꞉ioste;
ne nónhne sá꞉ka ne kanonsahshón꞉as, enshakotíkwah;
thensakonanonhnaríhkon ne tsi ratiwaʼtsirakérons tánon ne tsi rotinonshó꞉tons,
nonhkweshón꞉as o꞉ni ne raotiienthátsheras.
3Ne káti aorì꞉wa rá꞉ton ne Roiá꞉ner:
Ó꞉nen, kíʼ wakateʼnikonronhnihátie tsi nokwáh kí꞉ken kawatsiratsénskwah
né꞉ne iáh taskwé꞉ni tashateniaróhetste ne satsienhthaniátsthakwa;
tánon iáh tahonshasathatónhnike,
asè꞉ken kwáh karihwahétken enkénhake ne nenhkahá꞉wike.
4Ne thóh entewenhniserá꞉teke kwáh thenhiesarihwákwahse ne naiesatkónten,
tánon tenhiakohén꞉rehte ne ioʼnikonraktsenhtserowá꞉nen,
tánon eniaié꞉ron, “Kwáh kanánon tsi ionkwatkaronhní꞉hon;
ne Roiá꞉ner shashontionhontsákwa tánon ionkiié꞉nen!
Tánon ne waʼteshakonaríhthen nonhtionhóntsas tsi ratinákeres ne iáh tetehotirihwató꞉ken.”
5Ne káti aorì꞉wa ní꞉se iáh taeshonkweʼtaién꞉take nón꞉ka aesanenhiontsiénhse nonwenhtsá꞉ke ne kanenhiatokéntons
thóh tsi ronatsiataró꞉ron ne Roiá꞉ner rahonkweʼtashón꞉as.
6“Tó꞉sa iaserihwá꞉ken”—nek kík sáka iehatirihwákens—
“Iáh tehió꞉wenk ne iahatirihwà꞉ke kí nahorihoʼténhsons
khés ne natehénsera entionkwahró꞉rohke.”
7Aówenk ken ne kí aiaié꞉ron, O tsi ronónshote ne Jacob?
Né raonikonhratokentí꞉tshera ne Roiá꞉ner ne ken iewatehiá꞉ron iáh thakaʼnikonkatstékete?
Raónha ken kí꞉ken thóh nihaieránions?
Iáh ken nakewenhnaó꞉kons thé꞉nen tekarihonthákwas
ne nónhka thóh nón꞉we nihiakothaí꞉thake ne tkarihwaié꞉ri?
8“Hiasehiatsiatónhti nakonkweʼtashón꞉as kwáh tsi ní꞉ioht ne tesehwataʼtions;
washeiatawitáshi ne
tsi nihá꞉ti ronhnatohestonhátie tseshetákwen;
iáh né tehonhnonthónhnions naterihió꞉sera.”
9Ne konhnónkwe konhtiʼterónhton nahotinonskónhsons ne nakonhkweʼtashón꞉as í꞉ken wahetsiiatí꞉nekenhwe
tsi nihiotinonhshí꞉ioskwe;
iaesewáhawe natiatanerakwáhtshera
tsi waetsí꞉kwah ne akotiiookón꞉as né꞉ne tsi nénwe enkénhake.
10Téstan tánon wás;
asè꞉ken iáh teká꞉ien nahiontoríhsen ne ken nón꞉we,
tiorì꞉wa tsi iáh tehiotkwéniens tánon nahothatewenhnihió꞉sera enkonwáhkwa tánon enwatkarónhni
né꞉ne tehiotenonhianì꞉ton kaʼnikonhratsénhtsera natkaronhniá꞉tshera í꞉ken.
11Tó꞉ka shí꞉ken onkát ne iakotharátses ne onowenhtós꞉kon í꞉ken,
aiontón꞉heke, “Kwáh ienkerihwà꞉ke né꞉ne onenharataʼsehontsherákeri tánon ne ionekaní꞉ron,”
raónha kíʼ iensakorihwákense ne rahonkweʼtashón꞉as!
12Kwáh orihwiiohón꞉we tsi enskwahiataró꞉roke sewakwé꞉kon, O Jacob,
kwáh ensehkhehiataró꞉roke ne niatehonathaténhron Israerró꞉nonhke;
kwáh skátne enkhè꞉teron
tsi ní꞉ioht ne teiotinakaronhtón꞉a ne Bozrah nón꞉we,
tsi nón꞉we nikonhwatiʼteronhtáhkwa
tánon tsi nikowá꞉nen teiakonitonhniathén꞉nis nonkweshón꞉as.
13Ne nón꞉ka nenhsaniá꞉kenhne kwáh raotihénton énhre;
kwáh kíʼ thenhonhnótkawe tánon enhontóhetste ne tsi iothenhenraká꞉ronhte,
kwáh thóh nón꞉we nenhontóhetste.
Ne ronwanontí꞉io ensakotohétsthen raotihénton nienhénre
né꞉ne Roiá꞉ner raotihénton énrenh.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.