Joshua 18
18
Tsi Naʼtekakhasónhkwens Ne Ken Iotiétons Nonhontsaʼshón꞉as
1Nó꞉nen sahatiiéna nonhontsaʼshón꞉as, kwáh kenʼnenhrakwé꞉kon ne Israerʼró꞉nonhke wahonhnitiohkwaró꞉roke ne Shiloh nón꞉we tánon wahonthatoserothón꞉nion tsi nón꞉we ní꞉res ne Roiá꞉ner. 2Shé꞉kon tsáta nihotitióhkwakes Nisraerʼró꞉nonhke ne aré꞉kho tehotiienà꞉seron tsi natehonaténhtion nonhóntsas. 3Sók ki ne Joshua washakawénhase nonhkweshón꞉as ne Israerʼró꞉nonhke, “Tonikarí꞉wes ensewateráhrate nohén꞉ton iaísehwe tánon sewatié꞉nawats nonhóntsas nètho Roiá꞉ner ne Sakoní꞉io ne ietsisothonkonhkén꞉en tetsisehwá꞉wi? 4Thakwarí꞉hon áhsen niháti ne skenhtiohkwà꞉tsions khehiatié꞉nawats. Ienkhehiaténiethe kanakerahserakwé꞉kon nahonhnonhóntieʼrasthe ne tsi kanakerahserá꞉ien né꞉ne ahatinónhweʼne nahontié꞉nawatste. Ethò꞉ne akonhà꞉ke natenʼthónhne. 5Nonhóntsa tsáta natenkahià꞉khonke; Ne Judah thóh enhonhnésehke ne rahotinakerahserá꞉kon ne nenhtiè꞉ne nón꞉we, tánon ne Só꞉se ne rahotinakerahserá꞉kon ne othorè꞉ke nón꞉we. 6Ienkhehiaʼthéniethe nahatihiáton nahontrorí꞉hake ne kanakerahserakwé꞉kon tsi nón꞉we nihathinónhwes ahatiié꞉na nonhóntsas. Tenhathihiakhónhnion ne kanakeráhseras né꞉ne tsáta niiorì꞉wake tsi ní꞉ioht tsi tenhathihiakhónhnion tánon tenhtsionkhawí꞉ten norì꞉wa. Ethò꞉ne ki enkhewastó꞉tsi kaʼniká꞉ien ne Roiá꞉ner í꞉rehre ne skentiohkwà꞉tions nahatiienà꞉seron. 7Ne Levites, ethosà꞉ne, iáh nénhne thé꞉nen thatehonathénhtion nahathiienà꞉seron nonhóntsas tsi ní꞉ioht ne sewatiákes, tiorì꞉wa né꞉ne tehonathéntion nahonwahiò꞉tenhse ne Roiá꞉ner tsi rotikhá꞉res akénhake. Tánon ki ó꞉ni, ne rahotitióhkwas ne Gad, Reuben, tánon ne tsitkarahkwí꞉nekens nokwá꞉ti ne Manasseh ó꞉nenk nénhne rothiienà꞉serons tsi naʼtehonathèn꞉tsons né꞉ne tsitkarahkwí꞉nekens nokwá꞉ti ne Jordan, né꞉ne Mahís, né Roiá꞉ner rahonhátshera, teshakowí꞉hon.”
8Ne ronhnónkwe iahón꞉ne nahonnonhóntsarasthe ne nó꞉nen ne Joshua shisakorihónhte: “Ohontsakwé꞉kon nonhtásewet tánon tionhóntsarast, tánon thontaskwahawí꞉ten. Tánon ethosà꞉ne kén꞉en ne Shiloh kwáh enhirihwanón꞉tonhse ne Roiá꞉ner ne ní꞉se ahisewawasthóhtsi.” 9Káti ne ronhnónkwe kwáh onhontsakwé꞉kon nonhthahónhnethe tánon wahóntien wahatihiaʼtónhnion tsi ní꞉ioht tsi wathatiʼná꞉rihthe ne tsáta nihiorì꞉wake, rothihiathóntie ne kanathaiéntons. Ethò꞉ne Joshua sahonwatkénhsera ne tsi totená꞉thaien ne Shiloh. 10Ne Joshua wahawastotión꞉ko nahorihwaiénhase ne Roiá꞉ner ne rahothirihwà꞉ke, tánon nahonthasaká꞉wen ne ronathatén꞉rons ne kentióhkwas ne Israerʼró꞉nonhke ne kathokenstánions nonhóntsas.
Ne Kanakeráhseras Thonwanawí꞉hon Ne Benjamin
11Ne kanakeráhseras rahonà꞉wenk ne tsi rathiwatsí꞉raien ne rahothitióhkwas ne Benjamin ne tahatihén꞉ten tahonwénhnon nonhóntsa. Ne rahononhóntsa thóh nón꞉we nihiohontsá꞉ien tsi naʼtehón꞉tere ne Judah rahotitióhkwa tánon ne Só꞉se. 12Nothorè꞉ke nokwá꞉ti ne tsi ronateristhatátie Jordan nón꞉we tiotásawe tánon ethò꞉ne thóh nietsawé꞉non ne tsi tiononhtaká꞉renhne ne othorè꞉ke nokwá꞉ti ne Jericho tánon tsi iaʼtewatsénhtos ieiawé꞉non iatehiótkaʼwe ne tsi ionhniáhere kanakerahserá꞉ien tsi nió꞉re ne iahontsathèn꞉ke nón꞉we ne Bethaven. 13Ne tsi karisthatátie ethò꞉ne thóh nietsawé꞉non tsi ionhnontakárenhne ne entiè꞉ne nokwá꞉ti ne Luz (ne ó꞉ni konhwanaʼthónkwa ne Bethel), ethò꞉ne ietionhnonhtatsnénhton ne Ataroth Addar nón꞉we, ne tsi iononhtáhere nenhtiè꞉ne nokwá꞉ti ne Beth Horon nón꞉we. 14Ne tsi karisthatátie ethò꞉ne thóh nietsawé꞉non ne Kiriath Jearim, iatehiokwáhtase nenhtiè꞉ne nokwá꞉ti tsi nitsawé꞉non ne tsi iaʼtewatséntos nokwá꞉ti ne kén꞉en iononhtáhere tánon thóh nieiawé꞉non ne Kiriath Baal (khés ne Kiriath Jearim), né꞉ne rahonákwenk ne Judah rahothitióhkwas. Ne kí꞉ken ne entiè꞉ne nokwá꞉ti karisthatátie. 15Nenhtiè꞉ne nokwá꞉ti karisthatátie thóh tiothásawe ne tsi iehiò꞉te ne Kiriath Jearim tánon thóh nietsawé꞉non tsi tioná꞉werote ne Nephtoah. 16Ethò꞉ne ietsononhtatsnénhton ne tsi tiononhthaienthà꞉hon ne othorè꞉ke nokwá꞉ti ne Rephaim Ahonráhkwakon, tsi nón꞉we tiothásawe ne Hinnom Ahonráhkwakon. Ethò꞉ne thóh nietsawé꞉non entiè꞉ne nokwá꞉ti ne Hinnom Ahonráhkwakon, ne nenhtiè꞉ne nokwá꞉ti ne tsi Kawenothátie ne Jebusite, iaʼehiahó꞉ien ne Enrogel. 17Ethò꞉ne ietsokwatáse othorè꞉ke nietsawé꞉non iaʼtehiahó꞉ien ne Enshemesh tánon ethò꞉ne Geliloth iaʼtehiahó꞉ien, ákte nòkwah ne Adummim iohathátie. Ne tsi karisthatátie ethò꞉ne thóh ietsononhtatsnénhton iaʼtehiahó꞉ien nonenhià꞉ke ne Bohan (ne Bohan ne roienkén꞉en ne Reuben) 18tánon iehiotohétston nothorè꞉ke kawenotátie ahohén꞉ton ne Jordan Ahonráhkwakon. Ethò꞉ne ietsononhtatsnénhton Ahonráhkwakon niehiawé꞉non, 19iehiotohétston nothorè꞉ke kawéhnote ne Beth Hoglah nón꞉we, tánon thóh iatehiothàhon nothorè꞉ke iohontsá꞉ien ne Dead Sea, thóh nón꞉we ne Jordan Kaniatarathátie niehiawé꞉non. Ne kí꞉ken ne entiè꞉ne nokwá꞉ti karisthatá꞉tie. 20Ne Jordan né꞉ne tsitkarahkwí꞉nekens nokwá꞉ti iotoristohétston. Ne kí꞉ken ne tsi ionateristhatá꞉tie ne ohontsaʼshón꞉as né꞉ne tsi rathiwatsí꞉raiens ne rahothitióhkwas ne Benjamin rotiienà꞉on nahonawenhkón꞉weke.
21Ne tsi kanatowá꞉nens ne Jericho, né꞉ne Beth Hoglah, Emek Keziz, ne rahotinathaʼshón꞉as ne ratiwatsí꞉raiens ne rahotitióhkwas ne Benjamin, 22ó꞉ni ne Beth Arabah, Zemaraim, Bethel, 23Avvim, Parah, Ophrah, 24Chepharammoni, Ophni, tánon ne Geba: tékeni-iawénre nikaná꞉thakes, skátke ne kanathaién꞉tons aktatieʼshón꞉a. 25Thóh ó꞉ni í꞉kare ne Gibeon, Ramah, Beeroth, 26Mizpah, Chephirah, Mozah, 27Rekem, Irpeel, Taralah, 28Zela, Haeleph, Jebus (tó꞉ka ó꞉ni né꞉ne Jerusalem í꞉ken), Gibeah, ó꞉ni ne Kiriath Jearim: kaiéri-iawénhre nikaná꞉thakes, konhtikwé꞉kon ne akthatieʼshón꞉as kanataiéntons. Ne kí꞉ken nonhóntsas ne tsi ratiwatsí꞉raiens ne rahothitióhkwakons ne Benjamin rotiienà꞉serons nahonawenhkón꞉weke.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.