Sák 2
2
Nahiontatharonkáten Tsi Nòkwa Ne Kakenronʼniátsera
1Tewatenroshónhas, neh tsi theʼtsitewetákwen ne Sonkwaiáner Ié꞉sos Kerístos, rahónha Roianere ne kahiataterítsera, tóhsa nonwénton takontʼthihánionke tsi níʼioht tsi ahsekwénienste nónkwe ne taʼskatʼkáneren tsi nahiontʼkathotseróten. 2Tóhkaʼ síken ne rokwátse owistanóron ró꞉nisnonsawíton tánon ó꞉ni né꞉ne kwáh wakwení꞉io rohʼtseronʼniáton thoʼénrawe tsi nónwe nisewakʼkenníson, tánon tóhka ó꞉ni ne te꞉hathon꞉nahkarias thonòn꞉ne wárawe ratʼkarokotátie nen꞉ne 3Tánon tóhka neh sénha entsisewakwénienste ne rotiataserónni ó꞉ni entsisewaróhri, “Kén nón nashátsien neh tsi sénha ne kíʼ wanitskwarahtserí꞉io,” nók entsisewénhase ne tehathonnakárias, “Kén níse nónwe naʼtéstan, tóhka ó꞉ni kén oswenkaráke sáhtsien kasihʼtákʼtha,” 4Né káti ensánhike tsi wasónʼni né tashekʼkáshion tsi naʼtesewátere tánon washónni ne kahiatoretátsera ne wahsatʼkénserakwe neh kariwáksen aoriwasónha.
5Sewatahónsatat, tekanóron tewatenrosónhas! Ne tsi ionwentsiáte Rawenni꞉io sakohiatarákwen ne iakóten né꞉ne ahothiʼkwatséhake tsi nòkwa ne tewethákwen tánon nahathiʼiéna ne Rawenni꞉io Raonakerásera tsi nisakorahrastén꞉ni tsi nihiákon ne ronwanorónkwa. 6Nók ietʼtsikenrón꞉ni ne iakóten! Ronʼnónha ne teietʼtsinikonrhára tánon rahothihénton ne rathiriwéntha nieietʼtsiʼiaténhas? Kí꞉ken rahʼthiriwénthas ronnónha nah ne rohthikwatsénion! 7Ronnónha ne kawenʼnáksens tsi ní꞉ioht tsi rontátis neh꞉ne aiétʼtsi sennaksáthe.
8Kwá entheʼshérite tóhka ensatewénnaraʼkwe ne Rawenni꞉io raohʼianerénsera, tsi nikahiáton ne kaiatonseratokentíke, “Senorónkwak ne tesanonsanéken tsi níse niʼsatatenorónkwa.” 9Nok tóh꞉ka thók tensekwénienste nónkwe ne tsi nihontkathotseróten, wesanontánake ne kariwáneren, tánon ne kaianerénsera ensaréwate tsi tèshiaks ne kaianerénsera. 10Nónka nénskat tenháiake ne ahtsawenrátsera ne enhon꞉nontánake tsi kwáh akwékon niaʼtehohiákon. 11Neh꞉ne kwá rahónha ráwen, “Tó꞉sa shatenaʼkwaié꞉sat,” ó꞉ni ráwen, “Tó꞉sa shehiá꞉set.” Sékon kíʼ nòn꞉ne tóhka iáh tashatenaʼkwaié꞉sate, watésiake ne kaianerénsera tóhka washehiá꞉sete. 12Sewatathi tánon thonasewáier tsi síken ní꞉ioht nónkwe né꞉ne kaianerénsera teiakoiatórete tsi entiontatewenníhio꞉ne. 13Asèken ne Rawenni꞉io iáh taréneste nataniténron nónen tensakoiatórete nónkwe ne iáh teiakoienʼnataniténron; nók ataniténron iosénnies ne kaiatoretátsera.
Tewetákwen Tánon Tsi Nakaioténhens
14Tewatherosónhas, nahóten kásthas nón꞉kak tsi nítion na꞉ihsewénron se꞉wáien ne tewetákwen tóhka ne sewahioténseras iáh tekariwanírats? Akakwéni kén nètho tewetákwen naʼihsaniákente? 15Tóh꞉ka síken ahtatekénseras tóh꞉ka ó꞉ni ahtenosén꞉tseras ahthakwénia tehonathonwentió꞉ni tánon iáh tehothíkwaien ne iatakaiéri nahóten ahónneke. 16Ònh꞉ne nahóten aho꞉thiʼhiatakéna naseh꞉iénhase, “Rawenni꞉io iahiatatérist! Sata꞉thanaʼwensthónhak tánon kwá tesatskáhon!”—tóhka iáh tahontaseh꞉iáwire tsi nathehiothonwentióhon nahonnónnheke? 17Éhʼtho káti nòn꞉ne ní꞉ioht ne tewetákwen: thó꞉ka ahonhatsíwa thíken tánon ó꞉ni iáh nòn꞉ne thènen thewásthon, kwáh káti iawenhéion.
18Nók ónkak enhiaiéron, “Énskat nónkwe iakóien ne tewetákwen, nóhia kahioténsera.” Ní꞉i tsi takeriwaseráko, “Takenathónhas onhʼní꞉ioht nónka aiakoiéntake ne tewethákwen iáh kanèka ne kahioténsera. Neh enkonʼnathónhase naketakwéntsera tsi niwatiotenseróten.” 19Thisetákwen kén tsi saiátak khók ne Rawenni꞉io? Iohiánere! Ne rathinesonrónons thoʼnethákwen nòn꞉ne—tánon enhothihiatísʼshonkwe tsi nenhonateronniénten. 20Thisathónnokte! Tesathonwentió꞉ni kén naiesanathónhase ne tewetákwen tóhka iáh kanèka ne kahioténsera iáh thènen tesástha? 21Onh ní꞉ioht ne tsi tewasotkén꞉en Abraham tsi shohianerastén꞉ni tsi natehiátere ne Rawenni꞉io? Rahoteweiénna non niʼiawenéhon, nónen sahotewéntethe ne roiénha Isaac ne tsi ietsienharákwa. 22Iáh kén teskwénies nasatkáto? Tsi tawetákwen tánon ne rahoteweién꞉na skát꞉ne tsi iothihiótens, ne rawetakwátsera kwáh ionanónkthon tsi nihaweiennótens. 23Tánon ne kaiatonseratokénti kwáh thoʼkén꞉en oriwí꞉io ioriwaniráthon tsi niwáton, “Ne Abraham tawethákwen꞉ne ne Rawenni꞉io, ne káti ne Rawenni꞉io wahokwénienste nahothonkwetakwarísion.” Ne káti aoríwa ne Abraham ronwanathónkwakwe Rawenni꞉io ronaténro. 24Satkátos káti kén, neh tsi nitewahweien꞉nótens ne tionkwateriwaseronniénnis tsi natethewátere ne Rawenni꞉io, tánon iáh khók ne takénhake tsi tionkwetákwen.
25Kwá ne sáka kèn꞉ne ne watʼthonwisentseráksen Rahab. Ne tioteriwaseronnién꞉ni tsi nikaweiennótens tsi natehiátere ne Rawenni꞉io, ne tsi watsiakoróton ne ronteriwatórats Israerʼró꞉nons tánon wahakohiénawase tsi sahatiniáken꞉ne ó꞉ia nihiohahóten sahontahítha.
26Éhʼtho nèn꞉ne, noierónta tóhka iáh thakaháwake nonikónra kwáh kíʼ iawenhéion, neh nòn꞉ne sáka tóhka iáh teiohiótens ne kahioténseras kwá kíʼ iawenhéion.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.