Isaiah 7
7
Ne Isaiah Kwáh Kí Oriwí꞉io Wahahón꞉nien Ne Ronnontí꞉io Ahaz
1Ne sihothenhniseraʼténionskwe ne Ahaz né roʼníha ne ne Jotham né ne ieshoién꞉ha ne Uzziah, rahónha rononhtí꞉iokwe ne Judah, ne Rezin ne ne ronnontí꞉ioʼkwe ne Aram nón꞉we tánon ne Ronnontí꞉io Pekah ne roién꞉ha ne Remaliah ne ne Israerʼronónke iahá꞉re niahatsatónhti Jerusalem, ók iáh kí tehoteriwathentsiénhni niashakotsiatonhtion. 2Nó꞉nen ne tsi rononshó꞉te ne Táwit wahatirihwáronhke nètho Aram tsi iathonhnitsokwátseste ne Ephraim, ne raweriá꞉ne ne Ahaz tánon ne ronhneriá꞉nes nonkweshónhas wathonhneriashísonʼkwe kwáh tsi ní꞉ioht ne kerítons ne karakonhkówa tehiotʼkarénhron tsi niháhote.
3Ethó꞉ne ne Roiá꞉ner waʼhawénhase ne Isaiah, wáhs iatsaténhaf ne entsiénha Shear-jashub#7.3 Shear-jashub: ne Hebrew ne ne kéntons “Tsi nihá꞉ti ne iateonathaténron tsi enshónhnewe.” né꞉ne tahitsatátken Ahaz ne tsi ieióte tsi tehiahontsakonhátie ne éhʼneken tsi watnekaientáhkwa tsi wahohatá꞉tsie ne tsi iehatinoharestáhkwa ne raonatserónnia tkahén꞉taien. 4Tánon tsró꞉ri, rathaʼtenhnikonhrá꞉ren, sakthiʼkénhak, tánon tóh꞉sa teshonnaríkʼkhon, ne ne akeniʼrihónhni kíʼken tekatsinaharáke ioienkwárote tsi ioʼtsinaharatéken-ne tsi nahotinakónhniaʼte ne Rezin tánon ne Syria, tánon ne raonekenteronhtsheraʼshónhas ne Remaliah. 5Tsioríhwa ne Aram—skát꞉ne ne Ephraim tánon ne raonekenteronhtsherashónhas ne Remaliah—rontenikonrónhnis naiesakarónhni, ronhtónhnions, 6Ánion iétewe ietewatsatónh꞉ti ne Judah tánon tewáiaks ne Jerusalem tánon tewasénhni iatethewahiáti tánon kwáh ne tewanontiʼiotserónhni ne raonekenterónhtshera Tabeel né nón꞉we; 7Né káti aoríhwa rá꞉ton ne Roiá꞉ner Ní꞉io:
Iáh thaʼkátake,
iáh èʼtho taiáwenhne.
8Asèken naʼonón꞉tsi ne Syria né꞉ne Damascus,
tánon ne aʼonón꞉tsi ne Damascus né꞉ne Rezin.
(Ohénton ne iáhʼiak nenhioserásenhke ne Ephraim kwáh thenhonwanattókwahte, iáh ónhkwe tahonsakénhake.)
9Naʼonón꞉tsi ne Ephraim né꞉ne Samaria,
tánon nohénton iehónhnete ne Samaria né꞉ne raonekenteronhtsherashónhas Remaliah.
Tó꞉ka iáh tahisarihwaníronhke tsi niʼtisetákwen,
kwáh kí iáh tástahke.
Né Isaiah Tahá꞉wenh Ne Ahaz Tsi Niweʼnéston Ne Immanuel
10Sók꞉hare ne Roiá꞉ner sahothárase ne Ahaz, rá꞉tons, 11Tserihwanóntons raoʼtenienténhtshera ne Roiá꞉ner Saní꞉io í꞉ken; thóh nahionsonhwésonhke tsi ní꞉ioht ne Sheol (ne ne tsi tsiohontsáien ne kenhéion) khés thóh nahontahiótʼteke tsi ní꞉ioht ne tsi karonhiáte. 12Ók ne Ahaz wahénron, “Iáh takerihwanónton, iáh takatʼthontáte ne Roiá꞉ner aiʼiateniénhten.” 13Ethó꞉ne ne Isaíah wahénron: “Satahónshatat kí ó꞉nen, Ó tsi ronón꞉shote ne Táwit! Shóʼtsikén kén niʼiorihwáha ne thénhnen ní꞉se asateniénhten ne raotinikonriʼioserákon ne ronhnón꞉kwe, nètho ní꞉se kwáh sateniénhten ne raonikonriʼioserákon ne ná꞉ke Ní꞉io ó꞉ni? 14Né ká꞉ti aoríhwa ne Roiá꞉ner rahonhatsíwa éntʼhion natenienhténtsera. Satkátho, ne kawí꞉non í꞉ken iowiraientásereh tánon enhionekenteronhtsheraiéntaʼne, tánon Immanuel#7.14 Immanuel: ne Hebrew ne ne kéntons “Ní꞉io tewakwé꞉kon.” enhonátonhkwe. 15Kwáh néh enrát꞉sehke ne Ioteniokwahkwenonhníhon onón꞉ta tánon otsinakontakwáhne otsikéta enronhnhékwen kwáh tsi nió꞉re iehoteriéntarane naharihwáson ne kariwahét꞉ken tánon nahataterákwahse ne ioiánere. 16Asèken nohénton ne raksáha ahoteriéntarane onhní꞉ioht tsi aharihwáson ne wahét꞉ken tánon ne ahataterákwahse ne ioiánere, nonhóntsa ónka kíʼ teninontiʼioseráke ní꞉se iesateronkwénhnis kwáh kíʼ enhonwanakerakwáhte. 17Né Roiá꞉ner entʼthiahawítaʼse tánon ne shonkwetaʼshón꞉ʼahs ó꞉ni sheʼshotʼthonkonhkénʼen tsi rotinonshó꞉tons ne enwenhniserontákwen ne takanikonrá꞉ren ne ne iáh nonwénhton tehiakokʼkáton tsi ná꞉he ne Ephraim sakotsatonhtakwénhni ne Judah né enthohiaténhawe ne ronhnontí꞉io ne Assyria.”
18Né thóh entewenhniseráteke ne Roiá꞉ner kwáh ienhrenhnákare niasakónonke notsíks ne tsi tsiotáhsawe ne tsi kaniataratátie ne Egypt, tánon notsinakonhtakwáhne nahontahónhne thóh tsi tsohontsáien ne Assyria. 19Tánon kwáh ratikwékon entón꞉ne tánon enhontenatónhni ne tsi nihiotstenhrakárenhre ne teióhnitstenró꞉ren, tánon ne tsi tehionitstenhrorénhserons, tánon akwékon ne tsi iokwiró꞉tons ne ohíktas, tánon kahentakwékon ne tsi konwatiʼteronhtákwah ne raotiʼtsenenhó꞉kons.
20Né thóh entewenhniseráteke ne Roiá꞉ner kwáh enhakéte ne énratsʼte iotkonstonhrhiákstha áhsare rotenhnáhon í꞉se nakaniataráti—ó꞉ni ne ronhnontí꞉io ne Assyria—ne ranontsíne ó꞉ni tsi rononwé꞉rote rashitáhke, ó꞉ni kwáh enhokonstón꞉rhiaʼke.
21Né thóh entewenhniseráteke saiáta kwáh enhanónsthate nahiónhneke ne nitsonaskwahiónha tionhnónskwahron tánon teniʼiáse kaiatákeras, 22tánon kwáh ne enronhnhékwen ne teiotenioʼkwahkwenónhni onón꞉ta tsioríhwa tsi niiawetatʼtsáni káien nonónhta nètho thonatkáwen; asèken tsi nihiákon ne iateiakotathénron ne tsi ionhontsáte kwáh kí ne enhónnheke ne teioteniokwahkwenónhni onónta tánon notsinakontakwáhne otsikhéta.
23Né éhʼtho entewenhniseráteke kwáh tsitnonhwésons ne énska tewenhniawehʼetsheráhsen níkon rotiʼiéntho ne watenenharíseres, énska tewenhniawehʼetsheráhsen saʼtèkena kawistaráken tsi níkon kaientʼthóseronkwe, kwáh kí né thentsoró꞉rokste noniónwaras tánon nohíktas. 24Nonkweshónhas thóh nienhénien nahiontorát꞉tha ahénhna tánon kaiénkwires ienhatíhawe, asèken ohontsakwékon ne tsionió꞉hon ne oniónwaras tánon ohíktas; 25tánon akwékon ne tsi ionhniarónhnions shés atsókten rónhstakwe tsi ronhtonhtaiáksʼkwe, iáh tó꞉tsase nahsetsanísehke noniónhwaras tánon nohíktas; ók ne kí ienwáton tsi nónwe ne tionhnónskwahrons enkonwanátkaʼwe tánon ne teiotinakaronhtónhas nahtenkontawénhreh.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.