Isaiah 6
6
Né Isaiah Tsi Ní꞉ioht Ne Wahotasatarase Rawenni꞉io Wahókenh Nononsatokentikówaʼne
1Né sihʼoserátekwe sarénheie nètho Ronnontí꞉iokwe Uzziah, waʼí꞉ken ne Roiá꞉ner. Renskwáhere anitskwaraʼtsheratokentíke, é꞉neken tiótʼthe tánon kaharatáhton; tánon ne tsi tetkakwá꞉ton ne wahkó꞉ses raotserón꞉niat kwáh né wakanonsikʼthe Nononsatokentikówane. 2Seraphs é꞉neken tsi renskwáhere thóh ratíties, né satiʼhiatátʼtshons iáʼiak natehatinerahontʼtshóntons: tèkeni ne raotinerahóntsas né iororótʼtons ne ratikonsáke, tánon nó꞉ia tekanerahontsákes ronhsí꞉takes né iororókston, tánon nóia tekanerahontsákes né꞉ne rónstha tsi tenhatíten. 3Tánon iatehontaʼtenatónhnions:
“Rohiatatokénti, rohiatatokénti, rohiatatokénti!
Ná꞉a né Sakoiá꞉ner ne ronterí꞉os ratironhiakerónons!
Ohontsakwékon né titkáhere ne raohiatanerakwáhtshera.”
4Tsitʼkenskwáhere Nononsatokentikó꞉wa watsowísonhkwe tsi nihotiwènhte ne wathotihénrehte, tánon ne kanonsakwákon thontakaienhkwahrárahne.
5Tánon waʼkí꞉ron, “Enskatateriwásthen! Wakatsiathatónhon, asèken Í꞉i ne kónkwe ne iáh tehiotkwéniens ne kerihtsakes, tánon ne skát꞉ne iakwahnákere ne iáh tehiotʼkwéniens ne ratiritsákes; eʼthóhʼsàne ne kharàke ró꞉ken ne Ronnontí꞉io í꞉ken, né꞉ne Sakoiá꞉ner ne ronterí꞉ios ratironhiakeró꞉nons!”
6Ethó꞉ne saiáta ne seraphs thontaháthen tsi nón꞉we níkes, ioskwenhthataríhen ráhawe né꞉ne ietsienharákwahke nontaháhawe ne wáratsʼte tèkeni ne teietsirorahrakstha. 7Né seraph tsiksaʼkáronhte waharanénhthatʼte ne ioswenhthataríhen tánon wahénron, “Né kí꞉ken tsi iakaiéna ne seritsàke, tánon kíʼ ó꞉nen tsi nihsaníkon éhren sahkaháwite, tánon ne sarihwahetʼkénsera kwáh sahkarakwarón꞉ko.”
8Ethó꞉ne wahiwénhnaronhke ne Roiá꞉ner ratónhnions, “Onhka ónhte iaʼkhehiathéniete, tánon ónhka ne kwáh thóh iáienh nonhkwarihwàke?” Tánon wakíron, “Kénʼen í꞉kes; í꞉i iatakaténiet!” 9Tánon wahénron, “Wáhs tánon né kí꞉ken sehró꞉ri nonkweshónhas:
‘Iaʼsewakontakwénhak tsi sewatahónsatat, ók tó꞉sa kí sewathaʼtenikonraientáten;
iaʼsewakontakwénhak tesewatʼkatónhnionf, ók tó꞉sa kí sewahtiénawast.’
10Shenikonrónhnien kí꞉ken onkweókons ne tahotiʼnikonhrihiókete,
tánon tesehiahontákwent,
tesekará꞉set,
ne káti ne tó꞉sa ahatikwé꞉ni ne tahatiʼkaneráke,
tánon nahontahonsatáte,
tánon nahonthaʼtenikonraientáten,
tánon tahonsahontkaráteni tánon ahonsahonwatítsienhte.”
11Eʼthó꞉ne wakíron, “Tóh nikaríhwes kíʼ thóh naiotónnhake, Ó Saiá꞉ner?” Tánon wahénron:
“Tsi nió꞉re ne kanatowánens éhʼtake enkaiéntane iotkaronníhon
kwáh iáh ónhka tahonsaienákereke,
tánon ne tsi kanonsó꞉tons iáh ónhka taieterónhtake,
tánon ne tsi ionhontsáien kwáh enkaieshah;
12tsi nió꞉re ne Roiá꞉ner iensakoténiete onhkwetakwékon ne kwáh ahí꞉non nió꞉re,
tánon tsi niwatenatowánen iáh ónhka tetsenákere ne kwáh satehiohontsíhen nón꞉we.
13Iekaníhare ne shé꞉kon tionkwéta ne oiéri nihionkwétake thóh iatahonsahiakotaténhronhke ne tsi ionwenhtsá꞉te,
kwáh kí shé꞉kon ensewát꞉tsa,
kwáh tsi ní꞉ioht ne karíhton khéhs ne kwáh karontashastste
nah otsináhara thóh kàniote
nónenh iorieniénhen.”
Naotsinaharákon ne ne iotokénti kànenh enkénhake.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.