Isaiah 65
65
Né Ioterikwahkwaríshion Rawenni꞉io Raorihwenhtá꞉tshera
1Waʼkathatewehʼienhnenhtáhonhne nahiontsatíshaʼke tsi nihákon né iáh teotirihwanón꞉ton,
nahiontiaʼtatʼtsénhrion tsi nihiákon né iáh tehiontiaʼtisákkon.
Wakíron, “Kénʼen í꞉kes, kénʼen í꞉kes,”
né꞉ne ronnonhontsaʼkeró꞉nons né iáh tseotináton naksénhna.
2Iaʼtewakatsá꞉takwe kwáh kontatsekó꞉wa
rononháke né ronteriʼioseranónhwe onhkweʼshónha,
né ronónha thóh nón꞉we nionathahítake né iáh teioiánere,
né ratísheʼre né iatehatiʼiáti tsi nionatenikonrón꞉ni;
3né nonkweshón꞉ha ionkenhaʼkónhnis
tsi niʼtewakatieráton iehótikontá꞉kwen,
thóh ronnateskónte né nikahetahá꞉ne
tánon ronatienhkwahronniáton thóh éhʼneken né tsi teiotenenhiokeronhténion;
4ronónha thóh iehatítskoʼte nosonhwáhkons,
tánon thóh ronhshontíʼiaks tsi nonwéhsons né ioterihwaséhtons í꞉ken;
ronónha rónhneks né kwés-kwés owá꞉ron,
ó꞉ni nowaráhkeri né kwáh í꞉ken iáh teiotkwé꞉niens í꞉kare ne raoʼtiké꞉ratʼke;
5ronónha rónh꞉ton, “Sataʼteweienhtónhas,
tó꞉sa tsiatákʼta nontàse, asèken shó꞉tsi watiatatokénti né sarihwáke.”
Né kí꞉ken né titʼkaienkwahrá꞉here né tsi tekenionhkáronhʼte,
né nó꞉tsire né iothé꞉kha kontatsekó꞉wa.
6Satkátho, thóh kahiá꞉ton nakʼkénhton:
Kwáh iáh sák takataʼtónh꞉ni, ók kwáh ensetkárhiaʼke;
Kwáh í꞉ken tsi ensetkárhiaʼke thóh tsi rotikwítsote
7Saiatatónhtshera ó꞉ni né raotiʼiathatónhtsheras ne sakotisotʼthonkonhkénʼen iaʼthenkarihwaiéstonhke,
rá꞉ton né Roiá꞉ner;
tsioríhwa tsi wahontsienkwahrón꞉niaʼte né tsi ionontarónhnions
tánon wahontʼkenrenhserónh꞉ni né tsi ionhniarónh꞉nions,
kwáh kí èhthoh enskatenienhténhnion éhneken tsi rotikwíshoʼte
enkahkaʼrhiaktseranáhnonʼke tsi nihatiweiennó꞉tens.
8Né kí꞉ken aoríhwa rá꞉ton ne Roiá꞉ner:
Tsi ní꞉ioht né onenhará꞉keri tsi katʼtshénrion né tsi ionerhiokwenhtónhnion,
tánon rónhton, “Tó꞉sa sewátont,
asèken kahiaʼtaterihtsherénhaʼwe nètho,”
ká꞉ti èhʼthoh nénhtiere né꞉ne nakenhatserashónhas raotirihwáke,
tánon iáh akwékon thaʼkàtonhte.
9Kwáh entekheiaʼténhaʼwe tsi rawatsiraʼtátie né Jacob,
tánon né Judah nón꞉we nenhtónhne nahatiʼiéna tsi wakatenontarónhnions;
né kheiatará꞉kwen kwáh enhatiʼiéna,
tánon nakenhatserashónhas kwáh thóh nón꞉we nenhontenátaien.
10Sharon nón꞉we athenhénrakon enkonwatiʼteronhtákwahke né raotiʼtshenenʼókons teiotiʼnakaronhtónhas tánon né kaiatákeras,
tánon ahonrákwahkon né Achor nón꞉we né raotiʼtshenenókons tionhnóns꞉kwahrons enkontenaskwáhkeron,
asèken nakonkwetaʼshón꞉has ronón꞉ha iontiaʼtisákhon.
11Ók í꞉se tsi sewatewenhtéton ne Roiá꞉ner,
ronón꞉ha rotiʼnikonrénhʼen nakenontaʼtokénti,
ronón꞉ha wahontekwahratsherotónhnion né꞉ne aoriwà꞉ke ne konwanaʼtónkwa Ateraswiʼióhshera
tánon wahatinekananóntkons notsí꞉tsa watnekarákwas, ne wahthotirenkénhni ne konwanaʼtónkwa Tsi Neniawénhseron.
12Kwáh kí ní꞉se ienkoniató꞉ri nasarekó꞉wahne,
tánon sehwakwé꞉kon kwáh tenhsewatʼtsákeʼte ne tsi tseriós꞉tha;
tsiorí꞉wa, né shiaʼkonhnáton, iáh thaʼtesarihwaʼsehrákwen,
nónenh shaʼkatáti, iáh tesatahonsatáton,
ók né thóh nashié꞉re né karihwahétken nakʼkhénton,
tánon né washaʼtaterákwahse tsi nahó꞉ten né iáh tewakerienhtiʼióstha.
13Eʼtho káti ráton ne Roiá꞉ner Rawenni꞉io:
Nakenhá꞉tsera ónenk tsi thenhaskáhon,
ók ní꞉se kwáh kí ensatonhkáriaʼke;
nakenhá꞉tsera ónenk tsi enhanekíra,
ók ní꞉se kwáh kí ensaniatatʼthénhseke;
nakenhá꞉tshera kwáh kí enhotonhnhárake,
ók ní꞉se kwáh kí eniesatehaʼte;
14nakenhá꞉tsheras kwáh kí tehatiríwaʼkwe naʼtsenhnonhnátshera ne raonerianésons,
ók ní꞉se kwáh kí thensahénrete tsi nihsakaráres ne seriá꞉ne,
tánon kwáh ensonhsehnánion tsi nisanikonranónwaks.
15Kwáh kí entiénhase né sasénhna né rihiatará꞉kwen né énratsʼte tsi nòkwah né karonhiakénhsera,
tánon né Roiá꞉ner Rawenni꞉io kwáh kí enhianonwariá꞉kon;
ók né raonhatserashónhas kwáh kí ó꞉ia nenhotisenhnoténhake.
16Ehʼthó꞉ne ónhka akénhake nahontahiontswanónhna ne kaiatateríhtshera ne tsi ionwénhtsaien
kwáh kí ensakoiatatérisʼte ne Rawenni꞉io né rorihwatokenhónwe,
tánon ónhka akénhake ahionhnentʼtsakétsko tsi aieriwaníraʼte ne tsi ionwénhtsaien
kwáh kí né enhonwarihwaníratʼtse né Rawenni꞉io ne rorihwaʼtokenhónwe;
tsioríhwa né tiotihénton tsi naʼtekanikonhráhraʼkwe kanikonhrénhon
tánon karihwaséhton nakʼkhénton.
Né Iorihwanerákwat Á꞉se Ská꞉son
17Asèken ónenh thó꞉wa ahonsakón꞉ni ná꞉se tsi aonsakaronhiáteʼke
tánon ná꞉se tsi aonsaionwentsáʼteke;
né tiotihénton nahorihoténhsons kwáh iáh tahonsawehiáraʼke
khès nahonshonʼnonhtónhnionʼke.
18Ók satʼtienhnonhníhak tánon satonnháren tsi nénhwe enkénhake
né èhʼtho tsi nahó꞉ten wakonhnihátie;
asèken ó꞉nenh thó꞉wa akónh꞉ni né Jerusalem thóh nenhiotón꞉hake tsi ní꞉ioht natonnhárat,
tánon nahonkwetaʼshón꞉has kwáh né nahonatonhnháraʼke.
19Kwáh enkatonnháren ahonhá꞉ke ne Jerusalem,
tánon wakatonhnáhere rononháke nakonkwetaʼshón꞉has;
iáh shé꞉kon tahonsahioronkatónhake ne tahionhséntʼtho né nón꞉we naiakotónhteʼke
khés né kasentʼthó꞉tshera né kanikonrahronhiakénhsera.
20Iáh shé꞉kon kwáh thóh thaʼhonsahiotónhake né nón꞉we
nowirá꞉a né thokárat khók niwenhniseráke ahiakónnheke,
khés né tiakahonkwétahion iat tiehionhtsatísahas;
asèken né tionhkwéta nahiaiéheie nénska tewenhniáwe natahiakoseriʼiákon enhiontatenontónhnionhse kén nitiakohiónha,
tánon nón꞉ka káronh natahiakaoseriʼiókon nénhska tewenhniáwe né enhionthatenonhtónhnionhse ronwatirewá꞉ton.
21Kwáh kí enhontenonsonhniánion tánon thóh enhatiterón꞉taʼke;
enhontetonʼniánion né watenenharísehres tánon enhónhneʼke náhhik.
22Kwáh iáh thahonsahontenonsónhni nó꞉ia ionhtsientákwah;
kwáh iáh tahonsahatiʼientʼthósehke tánon akó꞉renh áieke;
asèken tsi nihiónnhes né karón꞉ta thóh kí nenhonhnonnhéshonhke nakonwataʼshón꞉has,
tánon né kheiatarákwen kwáh karíhwes enhontónhnare nahohioténhsera né ratiʼtsaná꞉kes.
23Kwáh Iáh né thaʼotihióthen né iáh othènon thaʼkarihwástonʼke akénhake,
khès nahotiwiraiéntaʼne nateraswatsénhtshera aoriwáke;
asèken né sakotiʼiohokónha sakoiathateríston né Roiá꞉ner—
tánon né tsi nithonatwatsiríhnon ó꞉ni.
24Nohénton iahionkená꞉ton kwáh tekerihwasehrá꞉ko,
tsi shé꞉kon nenhotithá꞉raʼke kwáh kí enwakathón꞉tene.
25Nokwáho tánon né teiotinakaronhtónha owí꞉ra kwáh kí skát꞉ne tsi thenonatskahontiéseʼke,
né kénreks kwáh thóh ní꞉ioht tsi enkawahetseráke tsi kí ní꞉ioht né tionónskwahron teonákares;
ók nóniare—naókwha okénhra nenhnéʼe enkénhake!
Kwáh iáh tahiakotikaréwaʼte khés naiakonátonhte
ratiʼkwékon nakenontatokentíke,
rá꞉ton ne Roiá꞉ner.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.