Isaiah 64
64
1Ó nètho ní꞉se kwáh ensehrá꞉tion tsi karonhiá꞉te tánon enteshátsʼnenhte,
né káti ne tsi iononténions kwáh enhiówaʼke tsi èhʼtho íhses—
2kwáh tsi ní꞉ioht nó꞉nen nó꞉tsire enwatékhaʼte noniénhkwires
tánon nótsire né enkarihónhni noné꞉kanos tahionekónhti—
né nasónhni né shaʼsénhna nahonateriénhtaraʼne ne iesás꞉wenhs,
né káti né ronhnonhontsaʼkeró꞉nons nonhtiérenk ahotiʼiatíshonkwe ne shahénton!
3Nó꞉nenh thóh nishá꞉tshere ne iorihwanerakwahténions kahioténseras né iáh othènon tetionhkwahráreʼkwe,
tahsáts꞉nenhte, né tsi iononhténions wahó꞉wake tsi thóh íh꞉ses.
4Kwáh tsi tiotásawe ne tsi ionwenhtsá꞉te iáh ónhka teiakorihwáronhken,
iáh nohónta nonwénhton tetiorónh꞉ken,
iáh nó꞉kara nonwénhton tehiotʼkáton nón꞉ka akórenh Ní꞉io akénhake tsi ní꞉se ní꞉iot,
rahónha sakohióthenhse tsi niʼiákon ne ronwárare.
5Íse tenhsewatát꞉ken tsi niʼiákon ronatʼtsenhnónhni thóh nahatí꞉iere ne tkarihwaiéri,
tsi niʼiákon né ieshé꞉iare tsi niseweienhnóthens.
Ók sanhakwénhenhne, tánon ní꞉i wahakwahrihwáneraʼke;
tsioríh꞉wa tsi wasatʼkonshásete nók nonkwahtsakésons wahakwarihwaʼiésaʼte.
6Iakwahkwé꞉kon thóh nahonkwahiátawen tsi ní꞉ioht nón꞉kak iáh teiakotʼkwéniens,
tánon akwé꞉kon nonkwahrihwaʼkwahrihshión꞉tsheras ne kahioténhseras kwáh né꞉ne tehioniaʼtarátshon.
Iakwahkwé꞉kon teiakwahthosokwahténies tsi ní꞉ioht né ónerahte,
tánon nonkwahrihwaneraháktsheras, kwáh né꞉ne tsi iaóhte, iehionkwahiaténhas.
7Kwáh káti iáh ónka tseienátons ne shasénhna,
khés nahionteniénten naieshatiénawasʼte;
asèken ní꞉se thakwatʼkonshasehténhni,
tánon thóh waskwát꞉kaʼwe notshanàkes nonkwahrihwaneraháktshera.
8Nek kík sá꞉ka, Ó Saiá꞉ner, í꞉se né onkwaní꞉sera í꞉ken;
í꞉i nonawasthaʼkarí꞉io nahakwahiatóten, tánon í꞉se né takwatʼtietónhni;
iakwahkwé꞉kon í꞉se shaʼtsanàke hionhkwahiaʼtíson.
9Tó꞉sa né kwáh í꞉ken tsi ahiʼsanakwenhénhake, Ó Saiá꞉ner,
tánon tó꞉sa sehiá꞉rak né karihwaneraháktsera né tsi nènwe ahkénhake.
Nón꞉wa tetsató꞉ret, iakwahkwé꞉kon í꞉se shonkwéta í꞉ken.
10Né sanatatokéntis né iehiotón꞉hon nahonwenhtsaʼthénhake,
Zion né iehiotónhon nahonwenhtsiaʼthénhake,
Jerusalem onatóskon.
11Nonkwáhwenk iotokénti tánon tsi nikanonsí꞉io,
tsi nón꞉we né iakisotʼthonkonhkénhen niʼieshasenhnáienskwe,
iononsatèken,
tánon akwé꞉kon nonkwáhwenk né watenatí꞉ios iorihwaieshá꞉hon.
12Tsi akwé꞉kon kí thóh niʼiawénhon, ensheʼsathatiena, Ó Saiá꞉ner?
Kwáh ken sakʼthensathaʼtón꞉ni, tánon askwahré꞉waʼte tahiotenonhianí꞉tonhke?
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.