Isaiah 52
52
Áhnion Ne Zion Watonnháren
1Í꞉i tie, I꞉i tie,
né í꞉sast ne shashatsʼténsera, Ó Zion!
Né saʼtserónhniat ne kwáh sakweʼní꞉ios,
Ó Jerusalem, ne ionatatokénti í꞉ken;
né iáh tehonwatiwarakwétaron tánon ne iáh teonatʼkwéniens
iáh shé꞉kon tahonsaʼiesataweiáten.
2Shaʼsatakenrenhtánion, téstan,
Ó sewanhó꞉tons Jerusalem;
sashaʼtatniaterénhsi,
Óiesanhó꞉ton saiénha Zion!
3Asèken ne aoríhwa rá꞉ton ne Roiá꞉ner: Ní꞉se iesaténhninon ne iáh othènon tsaʼteionénon, tánon ká꞉ti kwáh entsesahiatáko né iáh owísta thakénhake. 4Asèken ne aoríhwa rá꞉ton ne Roiá꞉ner Rawenni꞉io; wahón꞉nise tkènhne, nakonkwetaʼshónhas Egypt niehonénon ne thóh nón꞉we iahatiʼnákerehke ne thiʼhononhontsátes akénhake; ne Assyriaró꞉non, ó꞉ni, ronhwatironhiakénton né kwáh iáh othènon tetiorihonhníhon. 5Nón꞉wa ne kí aoríhwa onhnikatiéra né kénʼen, rá꞉ton ne Roiá꞉ner, tsi tetkanerátie nakonkwetaʼshón꞉has iehonwatiʼhiaténha ne kwáh iáh othènon tetiorihonhníhon? Né ronhwanatʼkoráston tehotihenrétha, rá꞉ton ne Roiá꞉ner, tánon iehotiʼkonhtákwen, kontatsekó꞉wa, naksénhna konwakenrónh꞉ni. 6Né ká꞉ti aoríhwa nakonkwetaʼshón꞉has enhiontʼsenhnaientéraʼne; né ká꞉ti aoríhwa né thóh tewenhniserón꞉te kwáh enhonateriéntaraʼne tsi I꞉i ne wakatatíhon; kénʼen í꞉kes.
7Tsi niʼiorá꞉se né rasitàkes ne rarihwénhas
tsi watanontí꞉iake rahónha rarihowanátas ne skénnon,
rahónha tharihwénhas ne karihwí꞉ios,
rahónha rarihowanáhtha ne kaiatakená꞉tshera,
rénhni ne Zion, “Né Sahní꞉io rahónha raiataʼkwení꞉io.”
8Satahónsatat! Né shonkwetaʼshónhas ne ratiʼnikónrare wahthotiʼhénrethe,
skát꞉ne tsi wathaʼtiríwakwe natonhnhárat;
asèken kwáh tshiehióken tsi rontkáthos
tsi nionsáre ne Roiá꞉ner ne Zion nón꞉we.
9Thontasewahénren tsi tesewaríhwak,
í꞉se ne sewarihwahetʼkénton ne Jerusalem;
asèken ne Roiá꞉ner sashakonikonraníraʼte ne rahonkwetaʼshón꞉has,
kwáh sahiaʼtákwen ne Jerusalem.
10Né Roiá꞉ner kwáh ronenhtsakwahrí꞉shion ne iotokénti í꞉ken ranenhtshàke
ohénton tsi tehatiʼkanerónhnions ne ronhnonhontsakeʼró꞉nons;
tánon kwáh tsi iehiotonhontiokʼtaníhon nió꞉re tsi enhiontkathóseron
ne raoʼienawaséhtsheras nónkwah Ní꞉io.
11Éhrenh sásewet éhrenh sásewet, sasewahiáken né nón꞉we!
Tó꞉sa tánon othénen iasewaiéna ne iáh tehiotkwéniens akénhake;
sasewahiáken nahotiʼnenhríhen, sasewaʼtonhnakanónhni,
í꞉se ne sewaháwis ne raóʼtshe ne Roiá꞉ner.
12Asèken kwáh iáh tshiaʼhonsehsewaʼiákenʼne ne kasterihénke,
tánon kwáh ó꞉ni iáh tahiʼsewatèko;
asèken ne Roiá꞉ner sewahénton enhaténhti,
tánon ne raotiʼNí꞉io NʼIsraerʼró꞉nons sewaná꞉ken énh꞉re.
Né Roronhiáken Ranhá꞉tshera
13Sewatʼkátho, nakenhá꞉tshera kwáh kí enhohʼianerásthen;
kwáh enhonwasenhnakaráthaʼte tánon enhonwahiatakaʼráhtaʼte,
tánon kwáh í꞉ken tsi èhʼneken enkénhake.
14Kwáh tsi niʼiakotiokowánen ne iakorihwanerakóhon ne rahonháke
—tsi nihotʼkhathotserakʼsénʼén tsi nihahiaʼtothénʼne, kwáh iáh ónhkwe tateskaierónhtare,
tánon tsi nihaieronthó꞉then ahí꞉non í꞉tewes ne ónhkwe thoʼnaiehieronhtoténhake—
15ká꞉ti kwáh entesakotón꞉nekʼthe iakotioʼkowánen;
né rontiʼnontí꞉ios kwáh enhóntskweʼke rahónha entʼtharihónhni;
asèken ne tsi nahó꞉ten ne iáh tehonwatiʼró꞉ri né꞉ne kwáh ne enhontʼkátho,
tánon tsi nahó꞉ten ne iáh tehonarónhken kwáh kí né꞉e tenhatiʼiatóreʼte.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.