Isaiah 47
47
Tsi Ehtà꞉ke Wakonhiónhni Ne Babylon
1Tasátsʼnenht tánon okenràke shá꞉tien,
né꞉ne kawí꞉non í꞉ken ne akoiénha ne Babylon!
Onhwenhtsàke ók tsiasátien iáh nanitskwáhraʼne,
né nakoiénha ne Chaldea!
Asèken iah ó꞉nen né tahonsaiesanatónhkwahke
satí꞉wenh tánon iáh tesehsátsʼte.
2Teskahkwentakaraténi ne katheseronniá꞉tha onénha tánon seʼtheserónni,
sataharoróksi,
sherísi ne satiátawi wakóses, satʼtsinoróksi,
iaʼtetsáiak ne tsi kaniataratátie.
3Tsi sanehóskonk thí꞉ken kwáh kí thenwenehaʼke,
tánon ne satehénsera kwáh kí enhiontkathó꞉seron.
Kwáh kí entewakenákwen,
tánon iáh ónhka thiaʼtahonshónhkenre.
4Né sheʼshonkwahiatákwen—né꞉ne Sakoiá꞉ner ne ratiʼronhiaʼkeró꞉nons né ronwá꞉iast—
Rahonhatsíwaʼkhok ne Roiatatokénti í꞉ken NʼIsraerʼronónke.
5Shá꞉tien sák thasatatónhni, tánon tsi tetiókaras niaʼháse,
saiénha ne Chaldea!
Asèken ní꞉se iáh ó꞉nen ské꞉kon thaʼhonsaiesanatónhkwahke
tsoniaró꞉taron tsi kanakeraserá꞉ien.
6Kheʼnakwáhsene nakonkwetaʼshónhas,
Waketʼkénte tsi kwatsiratátie;
Hiaʼkehiátʼkaʼwe thóh satsanàke,
iáh othènon tesehnatónhni ne kenténhron;
né꞉ne thoʼthí꞉ions washeʼhiónhnien ne saʼtientaniák꞉ta
kwáh í꞉ken tsi iókste.
7Í꞉senh, “Kwáh kí entewakeniaró꞉taron tsi nènhwe enkénhake,”
né ká꞉ti tsi iáh tesarihwakéron kí nahorihoténsons ne seriá꞉ne
khés nahisisehiaráhon ne tsi ieionateríhokʼte.
8Nón꞉wa thóh nón꞉we nasáronk kí꞉ken, í꞉se ne serihwanorónhkwa nonwesénhtsheras,
thóh shískoʼte tsi niʼiorihwaníron,
sáton ne seriá꞉ne,
“I꞉ik wá꞉hi, tánon iáh ónhka nakóren tekáien tsi nó꞉kwah ní꞉i;
Kwáh iáh thaʼkátsien tsi ní꞉ioht ne ioteréhons
khés nakerihwaienteríhaʼke ne iakotónhni ratiksaʼokónha”—
9tetsáron kí꞉ken nahorihótens kwáh ensáraʼne
kwáh né꞉ne taiontkakwíroʼke, né sewenhnísera nió꞉re:
né iakothón꞉ni ratiksaʼokónha tánon ne iakoterehónskon
kwáh kí ensárane tsi nenhwatenienthentseriʼióhake,
iáh othènon takarihontáko thóh ní꞉ioht tsi asathenhennharáseke
tánon tsi naʼteioshatstenseranónhiani tsi natesatʼkónstha.
10Kwáh í꞉ken tsi sahiataníron tsi nisonkwetaʼhét꞉ken;
washí꞉ron, “Iáh ónhka thaʼtehiontʼkánere.”
Tsi nisatenikonratʼthókha tánon ne satʼthokhátshera
né wesatʼthaharákwahte,
tánon washíron ne serhiá꞉ne,
“Í꞉i wá꞉hi, tánon iáh ónhka nakó꞉ren tekáien tsi nokwáhti í꞉i.”
11Ók karihwahetkénsera ensáraʼne,
né꞉ne iáh taskwé꞉ni asathenhennáro tsi éhʼren ahonsáweʼte;
né natʼkaronhniátshera kwáh kí ensáraʼne,
né꞉ne iáh taskwé꞉ni nahonshaʼshiaʼtínekenwe;
tánon ne iorihwaiesáhon kwáh thentsawénhstsi ensará꞉aʼne,
né꞉ne kwáh iahʼothènon tesheʼrihwaientéri.
12Saterihwató꞉kens tsi nókwah ne sathenhennaráhtsera
tánon tsi niʼsewatsiokowánen ne sewathenhénhnaras,
né tsi thóh nón꞉we nisahioténhen ne kén shiʼtisahiónha;
nontiérenk enwáton nahisaterihwaténtiases,
nontiérenk ne tensaréniaʼte katerónhtshera.
13Kwáh tesawisenhéion né tsi niʼhonatsiokowánen ieʼsatenikonrá꞉wis;
sheríhon tsi nikáien ronteweiénstha ne tsi karonhiá꞉tes
thethatítan tánon iesahiatanónstat,
tsi niháti ronhteweiénstha ne tsi iotsistokwahrónhnions,
tánon niaʼtewenhnítake nenskarakwáhrake nasontʼthenhnékha ienhatirihwáken
onhnahó꞉ten kwáh ahiʼsárahne.
14Satʼkátho, thóh nihatiʼhiatóten kwáh né꞉ne kawá꞉he,
ótsire watʼtsahátha;
iáh thaʼhatikwéni ne ronhnonʼháhak ahonshaʼhonthatsatotárihsi
né tsi nihioshatsʼténhsera notónhkwah.
Iáh tewaswénhtaien nahontsathatarihatákwen né ní꞉ioht,
iáh tekatsíraien nahióntsien nahohénton!
15Thóh nonʼní꞉se nenhiotónhake tsi niháti ne skát꞉ne sewahiothénʼen,
tsi nihá꞉ti tesewaterihwasonterekwe ne shiʼtisahiónhakwe;
ratiʼkwékon wathontáwenre tsi nisahaʼténion;
iáh kí ónhka nahonsaʼiesaniákenʼte.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.