Isaiah 46
46
1Né Bel waʼtewatentʼtsióten, ne Nebo teiotʼtsákton,
naotihiaʼtonhnishónhas né꞉ne kontírios tánon tionhnónskwarons;
kí꞉ken tsi nahoténsons sawinóntie titʼkáhere
né sherieniakétats ne tehiotiwisenhéion katʼtshénens.
2Waʼthontsakéte, wathonʼnentʼtsiótaʼne skát꞉ne;
iáh tahatikwéni nahatinónsthaʼte noriéna,
ók ronhnonhatsíwa iahonwatiʼiaténhaʼwe iahonwatinó꞉ton.
3Takatahónsatat, Ó tsi niʼtisewatwatsiríhnon ne Jacob,
ratiʼkwékon ne iaʼteonataténron nonkweshónhas ne Israerʼronónke,
I꞉i konhiatíson né꞉ne kwáh sontasatón꞉ni,
takonhiaténhawe ne tsi watewiraráhkwah nón꞉we;
4iekaníhare nó꞉nen ensatsiaʼtísa I꞉i kí ne Saní꞉io enkénhake,
iekaníhare nó꞉nen ensanhráthenhne kwáh kí enkonhiathenhawíson.
I꞉i wákshon, tánon kí enkatiénawasʼte;
Kwáh kí enkhawí꞉son tánon enkenónsthaʼte.
5Ónhka ní꞉se tahontaskateniéntenste tánon sathaʼhontahiontsiát꞉teke,
tánon taskéron, tsi shí꞉ken ní꞉ioht ne tahonsahiaʼtsatiérenhke?
6Tsi ní꞉iakon ne tseiakokthonró꞉hon nowistanóron tsi tsaketákwas nakonathatserákon,
tánon iekontserihara ne kawitará꞉kens—
wahhonwánhaʼne ne rawistanorontserónni, né꞉ne wahaniʼioserónniaʼte;
eʼthó꞉ne wahontsiaʼtiénenhte tánon wakonwasénhnaien!
7Wahonhnénhsaren, wahatihawíson,
wahatiʼkwahtáko tsi nón꞉we nihionát꞉te, tánon thóh nón꞉we natʼkonwákaste;
iáh thaʼónton nahontorhiá꞉neron tsi nón꞉we natʼkonwátaste.
Ónhka shí꞉ken iatakonwaséntʼthoʼse, iáh kí tatekarihwasehrá꞉kwas
khés nahiaʼkonónsthate ne thénhne tahonanikonhrárahke.
8Sewehiá꞉rak kí꞉ken tánon sewanonthonhniónko,
hionsasewehiáran, í꞉se ne sewarihwaneraháksʼkon,
9sewehiá꞉re ne tsiotserenhtánions norihwakáions;
asèken I꞉i ne Ní꞉io í꞉ken, tánon iáh tekáien nó꞉ia akénhake;
I꞉i ne Ní꞉io í꞉ken, tánon iáh tekáien nón꞉ka tahonsahiatsatiérenhke,
10Wakerihowanatonhátie ne tsi iohiotókʼte kwáh ó꞉ni tsi nitsiotásawe
tánon ne wahónhnise tkènhne norihwasónhas né꞉ne arèko ehteiawénhonh,
ratónhnions, “Tsi niwakatenikonrónhni kwáh kí enkátake,
tánon kwáh entiérihte tsi niwakatenikonrí꞉shon,”
11iehinatón꞉nions nètho akweksʼkówa, né꞉ne Cyrus, né tsitʼkarakwínekens nókwah nént꞉re,
né nahinonkó꞉wa tkanakeraseráien né rónkwe riʼhiatarákwen nahasniénon.
Tewakewenhniʼnekénʼen, tánon kwáh énkhewe né naiáwenhne;
Wakatenikonrónhni, tánon kwáh kí thóh nénhtiere.
12Takatahónsatat, Í꞉se ne sehwerhiasaníron,
í꞉se nahí꞉non ít꞉ken nahonsehsewathaʼtewenhní꞉ione:
13Taká꞉we ákta wá꞉tsien nakatesenhniéntshera, iáh ahí꞉non nió꞉re téthewes,
tánon naká꞉wenk kahiatakenátshera iáh thaʼionísko;
Kwáh thóh éntsien ne kaiatakenátshera ne Zion nón꞉we,
asèken ne Israel né naʼtsatanerakwáhtshera í꞉ken.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.