Hosea 9
9
Enwatré꞉wate Ne Israel Ne Tsi Iorihwané꞉ren
1Tó꞉sa satónhnare, O Israel!
Tó꞉sa satatʼtsenhnakarátat nashatatonhkwetowá꞉nate tsi nihatiié꞉ra ne thihononhontsá꞉tes;
asè꞉ken ne satswathákwen tsi satʼthokhóktha, éhren satatsiathenhawí꞉ton tsi nokwáh ne Saní꞉io.
Ne sanonwéhon ne tsothakwahkaré꞉ni tsi nikonhwakariakséhakwe
tsi nón꞉we nikaswenhkarakwénhtare ne tsi rathithetáhkwa.
2Ne tsi ratithetáhkwa kaswenhkarakwénhtaron tánon ne onenharákeri watnekaráhkwa iáh ne tahiakonónhte,
tánon nonenharákeri enthonatnekóktase.
3Iáh thóh nón꞉we tahonathatenrónke tsi rahontsá꞉ien ne Roiá꞉ner;
ók ne Ephraim Egypt ne nón꞉we nienhénsewe,
tánon ne Assyria nón꞉we ne né꞉e enhonhnékseke ne iáh tehiothekwatkwéniens.
4Kwáh iáh tahontahatinekáweron nonenharákeri nahatinekí꞉ra né꞉ne ahonwatatʼtse ne Roiá꞉ner,
tánon tsi nikonwanateskontʼtha kaʼtshé꞉nens iáh ne thahonwanikonhrí꞉ioste.
Ne ní꞉ioht tsi wateskónte kwáh thóh nenhiotónhake kwáh né꞉ne iakotsionhniónkwen akonà꞉taro í꞉ken;
tsi nihiá꞉kon né꞉ne énhieke kwáh kí thenhiakoiatatiónhne;
asè꞉ken ne raotinátaro ne khók enkénhake ne tsi ronhtonhkáriaks;
tánon kwáh iáh tehiówenk nahontahónhne ne Raononsatokentikówahne ne Roiá꞉ner.
5Onhnenhsátiere nenhtewenhniserá꞉te ne wenhniserará꞉kwen nakakʼkhwárake,
tánon nenhtewenhniserá꞉te nenhkakʼkhwárake ne Roiá꞉ner raorihwá꞉ke?
6Asè꞉ken shé꞉kon nakonwaniá꞉kenhse natkaronhniá꞉tshera,
Egypt kí nenʼné꞉e entsakohiaʼtaró꞉roke,
Tánon Memphis enhiakohiatháta.
Ohíktas kí nenenhné꞉e entkaró꞉roke ne kanorón꞉sons ahowenkshón꞉as kawistará꞉kens;
ohíktas enhiothaténhronhke ne raonatohserá꞉kons.
7Nawenhní꞉sera ne karewatháhtshera nó꞉nen ónhwe,
nawenhní꞉seras naonsaiesaié꞉ristse ó꞉nen ón꞉we;
Nisrael tewaséntʼtos,
“Ne rotokénhse thotonhnotʼte,
ne rón꞉kwe ne roshatstenhserowá꞉nen ronakwénhen!”
Tiorì꞉wa tsi nikowá꞉nen ne sewarihwaneraháktshera,
tsi natehiotenonhianì꞉ton tsi nisateriwát꞉satha.
8Ne rotokénhse ne roterihwanikonrará꞉ni náke ní꞉io tsi nokwáh ne Ephraim,
ethosà꞉ne notsì꞉ténha tesakonikararánis kwáh tió꞉konte rahoháhake rón꞉nes,
tánon wateriwatsáton ne Raononsatokentikó꞉wane ne Raoní꞉io.
9Kwáh í꞉ken tsi tehionó꞉tes tsi nihonatatʼtetkentén꞉ni
tsi kí niiotónhne shiotenhniseraténionkwe ne Gibeah;
kwáh kí enrehiárake ne raotirihwaneraháktshera,
kwáh kí ensakoréwate ne raotiriwaneraháktsheras.
10Kwáh tsi ní꞉ioht ne karakónha onénhare,
thóh ní꞉ioht tiatatʼtsénhron Nisrael.
Tsi ní꞉ioht ne tontiérenhte onhiári ne tionhnionwarontonhakó꞉wa,
ne tontiérenhte ionhianihiónten,
khéken ne sesothonkonhkén꞉en.
Baal-peor nón꞉we niahónhne,
tánon ne wahonterenhnaiéntakwe tsi nahò꞉ten ne atehénsera í꞉ken,
tánon thóh ní꞉ioht tsi wathontatsatatiónste kwáh tsi ní꞉ioht tsi nahò꞉ten ratinón꞉wes.
11Ephraim ahohiatanerakwáhtshera kakʼtsathenkáten tsi ní꞉ioht notsiténha—
iáh tahonsahiakotinakerátstha nowirá꞉ʼa, iáh ó꞉ni thakontá꞉wa nahiotiwiraién꞉taʼne, iáh thahonsónton nahiotiwiraién꞉taʼne!
12Ské꞉kon tó꞉ka nahonwanehiá꞉ron ne ratitsaokónha,
kwáh kí enkhehiathónhten tsi nió꞉re iáh ónhka tsatahonsahonathaténhronke.
Kwáh í꞉ken tsi rotithentáhsere
nó꞉nen enkhehiatsatonhtákwahse!
13Énska wahí꞉ken ne Ephraim shithohiónha ioneratésons raienthós꞉kwe tsi nón꞉we ne kwáh kahentí꞉io í꞉ken,
ók kí ó꞉nen ne Ephraim iensakohéntenhse ne sakohioʼokónha nahonwanawénhtho.
14Tashé꞉ion, O Saiá꞉ner—
onhnahó꞉ten kwáh enteshé꞉ion?
Ne tashé꞉ion ne tsakowirón꞉tses watewiraráhkwa
tánon tó꞉sa akontinontátake ne kontinontá꞉kes.
15Akwé꞉kon ne raotirihwahetkénhseras Gilgal nón꞉we tiotáhsawe;
thóh nón꞉we niewakénon tsi wakhéson.
Tiorì꞉wa tsi nikarihwahétkens ne raotihiothénhseras
kwáh kí enkheiatí꞉nekenhwe nakenonsatokentikówane.
Kwáh iáh shé꞉kon thahonsakhenorónhkwe;
ratikwé꞉kon ne rahonnonkweʼashón꞉as ne ronaterihóntons ionkanowenhtén꞉nis.
16Ephraim iotrewáton,
nahoteraʼshón꞉as iostatʼthénhen,
kwáh iáh tahonsonhianihiónten.
Iawerohátien tsi iakawenhnakerátsta,
kwáh kí enkhenonwarià꞉kon ne kwáh tsakonorónhkwa tsi nihowiraientáhon ne tsi watewiraráhkwa nitsawé꞉non.
17Tiorì꞉wa tsi iáh tehonwawenhnarákwen,
nakeʼNí꞉io ensakokenron kí;
kwáh kí enhotinathenhawí꞉son tsi ienakeré꞉nion nonkweshón꞉a.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.