Hosea 2
2
1Tsiénhas ne tsatatekén꞉a, Ammi, tánon ne tsatenosénha, Ruhamah.#2.1 Ammi ne Hebrew né꞉ne kéntons “Akonkweʼtashón꞉as.” Ruhamah ne Hebrew né꞉ne kéntons “Iatsiatenosénha.”
NʼIsraerʼró꞉nons Iáh Tehotirihwató꞉ken, Karewathátsheras, Tánon Ne Kaiatakenátshera
2Tesenirihwakénha ne saʼnisténha—
asè꞉ken iáh ne tehionkeniniákon,
tánon ne raónha iáh ne tehionkeniniákon—
tesenirihwakénha né꞉ne taká꞉taʼne tsi niwatenakwahiesátha tsi niwatkontonhonstánions ne kanónsake,
tánon tsi nihiotenaiéston ne tsi tekanontó꞉kens,
3tó꞉ka iáh thataká꞉taʼne kwáh kí enkenotstón꞉ni
tánon ahonotstóskon enkénhake tsi niiotónhne sonhnakeráte,
tánon ne enkonhniáte tsi ní꞉ioht ne iáh ónhka taienakéreke,
tánon ne enkonhniáte tsi ní꞉ioht ne iahonwenhtsathénhake,
tánon ne enkenonwarià꞉konhkwe naioniatatʼten.
4Rononhà꞉ke ó꞉ni nakohiookónhas kwáh iáh tahontsiéntake ne kenténhron,
tiorì꞉wa tsi ne akohiookónhas ne watenakwahiesátha.
5Asè꞉ken ne konhwanisthénha ne iotswátonhne ne kanakwaiesátshera;
tsi niká꞉ien ne iakawenhnakerátston atehenserákon tsi nihiotié꞉ren.
Asè꞉ken iáwenh, “Kwáh kí enkheséhreson naskareshónhas;
ronónha ionkenataranónhtens tánon ionkhenanóntens,
ne teiotinaʼkarontónha ononwé꞉ron tánon nakeniatarahashónhas, nakénhie iakeiewáthas tánon ne katonhwesenhtákwah ohnekashón꞉as.”
6É꞉tho káti ne enkatenhenrónnien ne ohiktas okwireʼshón꞉as ne tsi iohatátie;
tánon kwáh enkasonhtónhni nosthénra naorihwà꞉ke,
ne káti ne tó꞉sa ahonsakatsénhri tsi nón꞉we nihiohatátie naónha.
7Kwáh kí enhiakósere ne naoskareshón꞉as,
ók iáh kí tsahiakononhtérane;
tánon kwáh ki enhiakoiatishakʼkon,
ók iáh ki tahiakoiatatʼtsénhri.
Ethò꞉ne kí kwáh enkénron, “Kwáh kí é꞉tho iénske
ne tsi thénhteron ne tiotierénhton wakeniá꞉konhne,
asè꞉ken kwáh í꞉ken tsi ioiánerehkwe nakerihwasonháskwe né꞉tho sikahá꞉wikwe tsi nón꞉wa ní꞉ioht.”
8Iáh kí tehioterienʼtá꞉rakwe
né꞉tho tsi í꞉i tká꞉wine
nonátsa, ne onenhará꞉keri, tánon ne kénhie,
tánon í꞉i watseritʼtse ne kawistará꞉kens
tánon nowistanoronhshón꞉as tsi ne ronstákwen tsi ronhwasenhnaiénskwe ne Baal.
9Ne kí aorì꞉wa kwáh kí iensekʼkhawe
nakenátsias ne nenhkahá꞉wike,
tánon natké꞉na onenharákeri ne tsi nienhkáhewe;
tánon kwáh iesétkawe nakenonhwérons tánon nakeniatarahashón꞉as,
tsi ne ahós꞉ton nahioteró꞉ronhke tsi aonotstóskon tí꞉kenhne.
10Ó꞉nenh kí enkeroróksi nahotehénsera
raotihénton naoskareshón꞉as,
tánon iáh ónhka tathahonsahionkshotarísi nahonhà꞉ke.
11Kwáh entsá꞉ke tsi tiatehiorihwará꞉hon,
tsi nikatkwáhera, nó꞉nen orákwahse í꞉ken, tánon nahowenhtatokénhtis,
tánon akwé꞉kon tsi nihiorákwen tsi nenhkatkwáhren.
12Kwáh enkerihwéntʼtho tsi ioientʼthon ne watenenharí꞉seres tánon ne ahoronhtaʼshón꞉as ne tionhnionwaronhtonhakó꞉wa,
ne tsi niiá꞉wen,
“Ne kí꞉ken natkarhiá꞉tsheras,
ne tsi nihionká꞉wi naskareshón꞉as.”
Kwáh karakonkó꞉wa enkonhniáte,
tánon né꞉ne kontírios enkontekwí꞉sa.
13Kwáh entréwate tsi nihonnenhtanorónsthas ne Baals,
nó꞉nen eniakotatʼtse ne kaienkwahrákons
tánon ne enwatstánion nahonisnonsawishón꞉as tánon ne kawistanoronshón꞉as,
tánon wahakoseréhson naoskareshón꞉as,
tánon onhtsatanikónhren ní꞉i, rá꞉ton ne Roiá꞉ner.
14Ne káti aorì꞉wa, kwáh thenkerenhkénni,
tánon iahonwenhtsathénhake nientsiathénhawe,
tánon entkateweiénton tsi entʼtharase.
15Tánon thóh nón꞉we kwáh éntkon nakaiéntho ne watenenharí꞉seres,
tánon ne enkonhniáte nahonráhkwakon ne Achor nahiononhkarónhtake kararát꞉tshera.
Thóh nón꞉we kwáh thenwakerihwaserá꞉kwahse tsi kí niiotónhne ne sitsiohiónha,
ne sikahá꞉wiskwe nó꞉nen sathontakaiakénhne tsi ionhontsá꞉ien ne Egypt.
16Ne thóh enwenhniserá꞉teke, rá꞉ton ne Roiá꞉ner, ne enskenatónhkwe, “Tethenitéron,” tánon iáh shé꞉kon ne tahonsaskenatónhkwake, “Ratsiatakweni꞉io.” 17Asè꞉ken kwáh kí éhren enkhá꞉wite ne raiatakweni꞉ios Baals raoshén꞉nas ne tsi kasakáronhte, tánon iáh shé꞉kon tahonsahatinatónseke né꞉tho kashén꞉na. 18Kwáh enkonhiónhnien naterihwaseronhniá꞉tshera né꞉tho enwenhniserá꞉teke skátne ne kontírios, notsitenokónhas ne tsi ió꞉werare kontí꞉tses, tánon ne onhontsá꞉ke kontéseres; tánon kwáh enkátonhte nahén꞉na, nasareʼkó꞉wa, tánon nateriióhsera ne tsi ionhontsá꞉te; tánon ne enkonhniá꞉te ní꞉se kwáh skén꞉nonk tsi ashenákereʼke. 19Tánon í꞉se kí꞉ken tsi sathonwí꞉sen tethenitéron ensáton né꞉ne tsi nén꞉we enkénhake; kwáh karihwakwahrishiontserá꞉kon tánon entkarihwaié꞉rike, ó꞉ni enhiorihwatokénhake kanoronkwáhtshera, tánon kentenhratsherá꞉kon. 20Kwáh karihwatokentitserá꞉kon tsi ienkonhiathénhawe ní꞉se ne tethenitéron ahsá꞉ton; tánon kwáh entsienterá꞉ne ne Roiá꞉ner.
21-22Ne thóh entewenhniserá꞉teke kwáh thenkerihwaʼserá꞉ko ne raonaterénhnaient nakonkweʼtashón꞉as Israerʼró꞉nons rá꞉ton ne Roiá꞉ner,
kwáh entkennoréste ne tsi ionhontsá꞉te,
tánon ne tsi ionhontsá꞉te né꞉ne entkánio nonátsias tánon nonénhare tánon ne iakeniewátha kahikshón꞉as.
23Tánon kwáh í꞉i entsienthó꞉serons nohontsá꞉ke.
Tánon kwáh enkithénren ne Lo-ruhamah,
tánon kwáh enhiiénhase ne Lo-ammi, “í꞉se nakonkwè꞉ta í꞉ken”;
tánon kwáh enhénron, “í꞉se nakení꞉io í꞉ken.”
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.