Leeweta 18
18
Digetida Macca Adde Gahetethi
1Goday Museko haysada yaagis; 2“Isra7eele asaas haysada yaagada oda; taani Godaa, hinte Xoossaa. 3Hinte kase de7ida Gibxe asay ootheysada oothopite; woyko ha77i taani hintena gelsiya Kanaane biitta asay ootheysada oothopite; enta wogaa kaallopite. 4Hinte ta kiitta oothite; ta wogaa naagite; taani Godaa, hinte Xoossaa. 5Ta kiitaanne ta wogaa naagite, hinte hessa oothiko de7on daana. Taani Godaa.
6“Hintefe oonika ba mata dabbora xaallofo. Taani Godaa.
7“Ne aayiw xaallada ne aawa kawushofa. Iya ne aayiw gidiya gisho iyo xaallofa.
8“Ne aawa machiw xaallada ne aawa kawushofa.
9“Ne michiw xaallofa; son yeletida woyko karen yeletida ne aawa na7iw woyko ne aaye na7iw xaallofa.
10“Ne na7aa na7iw woyko ne na7e na7iw xaallada ne nena kawushofa.
11“Ne micho gidiya gisho ne aawa mache na7iw xaallofa.
12“Ne aawa michiw xaallofa; iya ne aawas mata dabbo.
13“Ne aaye michiw xaallofa; iya ne aayes mata dabbo.
14“Ne aawa ishaa machiw xaallofa; iya ne aawa ishaa machiw. 15Ne na7aa machiw xaallofa; iya ne na7aa machiw.
16“Ne ishaa machiw xaallada ne ishaa kawushofa.
17“Aayiwunne I na7iw xaallofa; I na7e na7iw woyko I na7aa na7iw xaallofa. Enti iw mata dabbo gidiya gisho, hessi iita tuna.
18“Ne machiya paxa de7ishin, ne mache michiw dawuthofa.
19“Kushe metora de7iya maccasi xaallofa.
20“Neeni tunonna mela ne shooruwa machiw xaallofa.
21“Ne Xoossaa sunthay cayetonna mela ne naytape issuwa taman xuuggada, Moloka giya eeqas yarsho oothada immofa. Taani Godaa.
22“Xoossa sinthan ixetidaba gidiya gisho maccasara gaheteysada addera gahetofa.
23“Neeni tunonna mela mehera gahetofa; maccasi mehera gahetanaw mehe sinthe aadhofo. Hessi wogan baynaba.
24“Taani hinte sinthafe yedethiya kawotethati he oosotan tunida gisho, hinte he oosotan enta mela tunopite. 25Hari attoshin, biittayka tunida gisho, iya nagaraa gisho ta iya seeras. Biittiya banan de7ey asaa cuttasu. 26Shin hinte ta higgiyanne ta kiita naagite. Hintena gidin woyko hinte giddon de7iya allaga biitta asaa gidin oonika hessa mela tuna ooso oothopite.
27“Hintefe kase ha biittan de7ida asay hessa mela tunabaa oothida gisho, biittiya tunasu. 28Hinte ha biitta tunisiko, hintefe kase de7ida kawotethata ha biittiya cuttidaysada hintenaka cuttonna mela naagetite. 29Hessata daaniya tuna oosotape issuwaka oothiya asi de7iko, he uray ba asaa giddofe kuretto. 30Hessa gisho, hintefe kase de7ida asati oothida tuna oosota ubbaa oothidi hinte tunonna mela ta kiitta naagite; taani Godaa, hinte Xoossaa” yaagis.
Currently Selected:
Leeweta 18: GFBLVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
