Kessa 6
6
1Hessafe guye, Goday Museko, “Taani Gibxe kawa bolla oothanaba ha77i neeni be7ana. I ta deriya yeddana mela taani ta wolqaa iya bessaana. I enta ba biittafe gooddidi kessana” yaagis.
2Xoossay Muse, “Taani Godaa. 3Taani Abrahaames, Yisaaqasinne Yayqoobas Ubbaa Danda7iya Xoossaa gidada qoncas. Shin taani, ‘Godaa’ geetetiya ta sunthan tanatethaa enta erisabike. 4Qassi taani enti betetethan de7ida Kanaane biitta immana gada entara caaqas. 5Qassika Gibxe asati aylleyiya Isra7eeleta waasuwa taani si7as; ta caaquwaka qopas.
6“Hesaa gisho neeni Isra7eeletako, ‘Taani Godaa. Taani hintena Gibxe aylletethaafe ashshada kessana. Taani enta ta mino axan iita pirdaa pirdada hintena wozana. 7Taani hintena ta dere oothana; taani hinte Xoossaa gidana. Gibxe aylletethaafe taani hintena kessida wode, taani Godaa hinte Xoossaa gideysa hinte erana. 8Taani Abrahaames, Yisaaqasinne Yayqoobas immana gada caaqida biitta hintena ehana. He biitta taani hintew laata biitta oothada immana. Taani Godaa’ yaaga” yaagis.
9Musey hessa Isra7eeletas odis, shin enti aylletetha un7afe dendoysan ufaysi qanxida gisho I giyaba si7ibookona.
10Hessafe guye, Goday Muse, 11“Bada Gibxe kawas, ‘Isra7eeleta ne biittafe yedda’ yaagada oda” yaagis.
12Shin Musey, “Ta inxarsay lufa. Isra7eeleti tana si7ibookona, shin Gibxe kawoy tana waanidi si7anee?” yaagis.
13Goday Musenne Aarona, “Bidi, Isra7eela asaa Gibxefe kessana mela, taani hintena kiitidaysa Isra7eeletasinne Gibxe kawas odite” yaagis.
Musenne Aarona Yeleta
14Haysafe kaallidi xaafetidaysati enta mayzata; Yayqooba bayra na7aa Robeela adde nayti, Heenoke, Faalu, Esroomenne Karma. Haysati Robeela soo asaas mayzata.
15Simoona adde nayti, Yamu7eela, Yamina, Ohada, Yakina, Zohaaranne Kanaane biitta maccaseepe yeletida Saa7ula. Haysati Simoona soo asaas mayzata.
16Leewe adde nayti Gedisoona, Qahaatanne Maraara. Leewey xeetanne hastamanne laapun laythi de7is.
17Gedisoona adde nayti Libinanne Same7a geetetoosona. Haysati banta soo asaas mayzata.
18Qahaata adde nayti Amraama, Izara, Kebroonanne Uzi7eela. Qahaati xeetanne hastamanne heedzu laythi de7is.
19Maraara adde nayti Mahilanne Muse.
Banta yeletethaa maaran hayssafe qommon xaafetidaysati Leewe sheeshata.
20Amraami ba aawa michiw Yokebeedo machis. Iya Aaronanne Muse iyaw yelasu. Amraami xeetanne hastamanne laapun laythi de7is.
21Izarada nayti, Qore, Nefeganne Zikira.
22Uzi7eela adde nayti, Misa7eela, Elzafaananne Sitira.
23Aaroni Amnadaabe na7iw, Na7asoona michiw Elsebo machis. Iya iyaw Naadabe, Abyooda, Alaazaranne Itamaara yelasu.
24Qore adde nayti, Asira, Elqaananne Abiyasafa.
25Aarona na7ay Alaazari Puti7eela naytape issinniw machis. Iya iyaw Pinihaasa yelasu.
Haysati Leewe sheeshatanne enta mayzata.
26Goday, Musenne Aarona Isra7eele asaa yaran yaran enta soo asaara Gibxefe kaalethidi kessana mela kiittis. 27Isra7eeleta Gibxefe kessi yeddana mela Gibxe kawas odiday enta. 28Goday Gibxen Muses odida wode, 29“Taani Godaa; taani new odiyaba ubbaa Gibxe kawas oda” yaagis.
30Shin Musey, “Ta doonay lufa gideysa ne eraasa, yaatin kawoy taani odiyaba waani si7anee?” yaagis.
Currently Selected:
Kessa 6: GFBLVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
