Kessa 5
5
Museynne Aaroni Gibxe Kawa Sinthan
1Hessafe guye, Museynne Aaroni Gibxe kawako bidi, “Goday, Isra7eele Xoossay, ‘Ta asay tana bonchanaw mela biittan, ba7aale oothana mela enta yedda’ yaagees” yaagidosona.
2Kawoy, “Taani iyaw kiitetada Isra7eele yeddanaw I, Goday oonee? Taani Godaa erike; Isra7eelaka yeddike” yaagis.
3Enti zaaridi, “Ibraaweta Xoossay nuus qoncis. Ha77i nuuni Godaas, nu Xoossaas, yarsho yarshanaw heedzu gallasa oge mela biitta baana mela nuna yeddarki. Hessa nu oothonna ixiko I nuna hargen woyko olan dhaysana” yaagidosona.
4Shin Gibxe kawoy, “Muse, Aarona, Asaa ayis ooso diggetii? Guye bidi hinte oosuwa oothite. 5Heko, ha biittan hinte darideta; qassi hinte asaa ooso diggeta” yaagis.
6Kawoy he gallas Gibxe kaapotanne Isra7eeleta oosiseyisata haysada yaagidi kiittis; 7“Kaseysada xuube oothanaw asaas utulla immofite. Enti utulla bantaw koyidi shiisho. 8Shin kaseysafe taybuwa guuthonna enti xuube medhidi shiishana mela kiittite; issinnoka pacisopite. Enti, ‘Nuuni nu Xoossaas yarshsho yarshana mela nuna yedda’ yaagidi tana oychey entaw oosoy guuxida gishosa. 9Enti ooson gundana melanne wordo oda si7onnaw entaw wodey doonna mela ooso deexisite” yaagidi kiittis.
10Gibxe kaapotinne Isra7eeleta oosiseysati keyidi, asaako, “Kawoy, ‘Taani hintew utulla immike. 11Hinte bidi awupeka koydi demmite. Shin hinte oothiya xuube taybuwape issoyka pacenna’ yaagis” yaagidosona. 12Hessa gisho asay utulla koyanaw Gibxe biitta ubban laaletidosona. 13Gibxe kaapoti entaw utulli imetin enti oothiya xuube taybuwa keena oothidi shiishana mela enta un7ethidosona. 14Gibxe kaapoti bantafe garsara de7iya Isra7eele kaapota, “Hinte kase oothiya xuube keena ayis oothi shiishibeketii?” yaagidi wadhidosona.
15Hessafe guye, Isra7eele kaapoti kawako bidi, “Abeeti godaw, neeni ne aylleta haysada ayis oothay? yaagidi maggannidosona. 16Ne aylletas utulli imetenna, shin xuube oothana mela kiitetida. Hessa bolla nuna wadhosona; shin balay ne asaa bollana” yaagidosona.
17Shin kawoy, “Hinte ooso dosonna azallata; hinte wora wodhida azallata. Hinte, ‘Nuuni Godaas yarshanaw baana; nuna yedda’ yaagidi zaari zaari tana oychey hessa gishosa. 18Ha77i guye bidi oothite. Hintew ayba utullika imetenna, shin hinte kaseysa keena xuube oothanaw bessees” yaagis.
19Isra7eele kaapoti, enti kaseysa keena xuube oothana mela kiitetida wode enti meton gelidaysa eridosona.
20Enti kawa matape keyidi, bantana karen naagiya Musekonne Aaronako bidosona. 21Enti Musekonne Aaronako, “Hinte nuna kawoynne iya moorinnati ixana melanne wodhana mela hinte oothidaysa Xoossay xeello; I pirdo” yaagidosona.
Muse Woosa
22Musey Godaako simmidi, “Godaw, neeni ha asaa bolla meto ayis ehadii? Neeni tana kiittiday hessasee? 23Taani ne sunthan kawas odanaw bida wodepe doomin I ha asaa bolla meto ha darsis. Qassi neka ne asaa ashshabaaka” yaagis.
Currently Selected:
Kessa 5: GFBLVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
