Kessa 39
39
Kahineta Ma7o
(Kessa 28:1-14)
1Kahineti Geeshsha Dunkaaniyan oothiya wode ma7ana boncho ma7ota, kaalosen, ocha teera daaniya qacinapenne zo7o qacinan daddidosona. Aaroni ma7iya kahinetetha ma7uwa Goday Muse kiitidaysada oothidosona.
2Qassi efuudiya, worqafe, kaalosepe, ocha teera daaniya qacinape, zo7o qacinapenne al7o liinope daddidosona. 3Enti worqaa qoxidi, lee7isidi, iya qaraaridi, qacinada kessidosona. Yaatidi kaalosen, ocha teera daaneysan, zo7o qacinaninne al7o liinon alleeqisidi daddidosona. 4Enti nam7u hashiyara wodhidi, nam7u bagga woli gathidi oysethanaw maaddiya qangota efuudiyas oothidosona. 5Goday Muse kiitidaysada, hiillanchoy alleeqisida dancoyka efuudey oosetidaysatape oosetidi, worqan, kaalosen, ocha teera daaneysan, zo7o qacinaninne al7o liinon dadetis. 6Enti margide geetetiya shuchata giigisidi, worqafe oosetida kaquwa bolla wothidosona. Maatame bolla woocidi xaafeysada, he shuchata bolla Isra7eele nayta sunthaa woocidi xaafidosona. 7Goday Muse kiitidaysada, tammanne nam7u Isra7eele nayta qofisiyaba gidana mela enta, efuudiya qangotan wothidosona.
Tiran Ma7etiya Ma7o
(Kessa 28:15-30)
8Enti, tiran ma7etiya ma7uwa efuudey oosetidaysatape oothidi, efuudiyada alleeqisidosona. 9Iyaw oyddu maazaneti de7oosona; geesaynne gompay issi issi takadho gididi, dakoyetees. 10Iya bolla oyddu maaran inqo geetetiya al7o shuchata wothidosona. Koyro maaran sardiyoone, toophazenne phooliya al7o shuchata; 11nam7antho maaran baluure, sanparenne almaaze geetetiya al7o shuchata; 12heedzantho maaran yaakinte, kelqedoonenne ametesxinoosa geetetiya al7o shuchata; 13oyddantho maaran birille, margidenne yasphide geetetiya al7o shuchata wothidosona. Hessata ubbaa worqafe oosetida kaquwa bolla wothidosona. 14Tammanne nam7u shuchata bolla issi issi Isra7eele nayta sunthay woocetidi xaafetis.
15Tiran ma7etiya ma7uwas walahi bayna worqafe wodoroda dooqada santhalaata ootha. 16Nam7u worqa kaqotanne nam7u worqa sagaayota medhidi, nam7u worqa sagaayota tiran ma7etiya ma7uwas qommo baggan de7iya maazanetara gathidi oysethidosona. 17He nam7u worqa santhalaatata nam7u worqa sagaayotara gathidi oysethidosona. 18He santhalaatata, hanko bagga xeeraa, nam7u kaqotara gasethidosona. Yaatidi, efuudiyas sintha baggara, hashiyara wodhiya qangotara gathidi qachidosona. 19Qassi nam7u worqa sagaayota medhidi, efuudiyas sintha baggara de7iya tiran ma7etiya ma7uwas, gaatha baggara de7iya nam7u maazaneta xeeran aathidosona. 20Hessadaka, worqafe hara nam7u migiddota oothada, efuudiyas sintha bagga hashiyara wodhiya qanguwas garsa baggara, sikuwa matan dancuwaafe qommo baggara oysethidosona. 21Goday Muse kiitidaysada, tiran ma7etiya ma7uwa bolla de7iya migiddota efuudiyan de7iya migiddotara gathidi, kaalose qacina qachidosona. Tiran ma7etiya ma7oy xeessafe qommon pee7iya gisho qashoy dol7enna.
Hara Kahine Ma7ota
(Kessa 28:31-43)
22Efuudiyape bollara ma7etiya adussa ma7oy kumethi kaalose afilape giigisidosona. 23He adussa ma7uwas huuphe aathiya luho medhidi, peedhetonna mela guye qalam7idi, yuushshi aathidi sikidosona. 24Adussa ma7uwas duge bagga macara yuushuwan kaalosen, ocha teera daaniya zo7o qacinaninne al7o liinon, oromaane teera misileta medhidosona. 25Enti walahi bayna worqafe daalata medhidi, adussa ma7uwas duge bagga gaxan, oromaane misileta giddon wothidosona. 26Goday Muse kiitidaysada, oromaane teera misileta, adussa ma7uwas duge bagga macaraa yuushuwan aathidosona.
27Enti, Goday Muse kiitidaysada, Aaronasinne iya naytas, shamizeta, 28huuphe qaceta, uketanne gaatha sureta al7o liinope daddidi giigisidosona. 29Qassi dancuwa kaalosen, ocha teera daaniya qacinan, zo7o qacinaninne al7o liinon alleeqisidi, giigisidosona.
30Enti, geeshsha kallacha misiliya walahi bayna worqafe medhidi, iya bolla, “Godaas Dummatis” giya qaala woocidi xaafidosona. 31Yaatidi, Goday Muse kiitidaysada, huuphe qaciya bolla kaalose qacinara qachidosona.
Oosoy Gaxa Gaketha
(Kessa 35:10-19)
32Geeshsha Dunkaaniya ooso ubbay kumethi poletis. Isra7eele asay, Goday Muse kiitidaysada oothidosona. 33Hessafe guye, enti Geeshsha Dunkaaniyanne iya miisheta Museko ehidosona. Hessatika, kaceta, tuussata, liyoota, tuuqetanne enti eqiya tohota. 34Bolla kamaas, zo7o qalamen yeggidi kessida dorsa ite, haashetida do7a ite, magarajuwa, 35Tammu kiitata oykida Taabotiya, iya tookiya kaso mithatanne nagara atotetha kamaa, 36xarpheezanne iya miisheta ubbaa, Godaa sinthan de7iya geeshsha daabbuwa, 37walahi bayna worqafe oosetida xompe wothiya kocaa, iya bolla de7iya xompeta, iya miisheta ubbaanne xompe zayte, 38worqafe oosetida yarsho bessi, shuumatetha zayte, sawiya ixaane, Geeshsha Dunkaaniya penge magarajuwa, 39naase biratape oosetida yarsho bessi, naase birata teqiya, tooho kaso mithatanne iya miisheta ubbaa, meecha kerenne iya wotheysa, 40dabaaba geliya penge magarajuwa, tuussatanne, enti eqiya tohota, dabaaba magarajuwa, tole wodorota, dhisheta, Geeshsha Dunkaaniyan go7etiya miisheta ubbaa, 41kahineti Geeshsha bessan ma7iya boncho ma7ota, Aaroninne iya nayti ma7iya kahinetetha ma7ota.
42Isra7eele asay ooso ubbaa, Goday Muse kiitidaysada oothidosona. 43Asay, ooso ubbaa, Goday kiitidaysada oothidaysa Musey be7is. Hessa gisho, Musey enta anjis.
Currently Selected:
Kessa 39: GFBLVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
