Luc 12
12
Aiekwamictowakok iriniwok ka miro iriniwikasotcik
(Natawapata kaie Matio 10.26-27)
1Aiapitc mitcetiwakopan iriniwok e ki mawotcihitowakopanen neta Cecoca e ici tacikeritci. E apitc micta sitcikapowinaniwonik irinikotc tatakositeckatowakopan. Cecoc pitama owitcewakana ki itew: “Aiekwamisikw aka kitci apatcihimekw ociwockitcitcikaniwaw Pharisien iriniwok. Ociwockitcitcikaniwaw, enkweriw omiro iriniwikasowin. 2Kaskina ka katakaniwok kata nokotakaniwon, kaie kaskina aka ka kiskeritcikatek kata kiskeritakon. 3Kaskina ka ki iteiekw e ici kiski tipiskak, kata petakon waseake, kaie ka ki aitekw awik e kimotci aimihekw aricapik e kipahikaterik, nanake kata atisokaniwon kitci kiciwaniwok, kaskina awik kitci petak.”
Anahwe ka acterik kitci koctakaniwitc
(Natawapata kaie Matio 10.28-31)
4“Ki witamatinawaw, kirawaw nikwimesak: aka koctakok iriniwok ka wi nipahitakok, tepirak kiwiawiwariw ke ki nipatatcik, aka aric awocamec ke ki nipahatcik kitcitcakociwawa. 5Ki ka wapatahitinawaw anahwe ke koctekw: enko na Kice Manito, anahwe ka takonik mackawisiwiniw kitci ki iciwepinitakw atamaskamikok ickwa nipoekwe. Tapwe, ki witamatinawaw, enko anahwe acterik kitci koctekw!”
6“Tepirak nicw comarike itakitakosiwok niaran pirecicak#12.6,7 pirecicak: Mia itemakan: kice natcakamecicak. E emitikociwictek: “moineaux.” e otapinakaniwitcik, taina? Peikon Kice Manito nama otci peikw onikatew. 7Kaie kirawaw, e apitc miro kiskerimitakw, kaie e apitc miro nakatawerimitakw, wawatc kiskeritam tan e tatinik kirisisiwariw. Akawir tca koctatcikw. Tato nta e taciekw kirawe kicteritakosiw patok pirecicak e mitcetitcik.”
E nosanehwakaniwitc Cecoc kekotc e wepakonakaniwitc
(Natawapata kaie Matio 10.32-33; 12.32; 10.19-20)
8“Ki witamatinawaw: kecpin awik aka cakwerimote kitci witak e nosanehwitc, kotakihik iriniwok e petakik, kaie wir anihi Ka ki pe iriniwihitisoritci#12.8 Ka ki pe iriniwihitisotc: Arimomitiso ota Cecoc. kata witamakeriw tapwe e tiperimikotc, e petamiritci Kice Manito otacerima. 9Kecpin aric awik itete aka e kiskerimitc, kotakihik iriniwok e petakik, kaie wir anihi Ka ki pe iriniwihitisoritci kata witamakeriw aka e kiskerimikotc, e petamiritci Kice Manito otacerima.”
10“Anahwe ka marerimatc anihi Ka ki pe iriniwihitisoritci, kata kasihamawakaniwiw. Aric anahwe ka marerimatc Miro Manitowa, nama kata kasihamawakaniwiw.”
11“Nikotin tca iciwirikoiekwe cota aiamihe mikiwamik kitci tipaskonikowiekw, kekotc arimitakosiwikamikok iciwirikoiekwe kitci tipaskonitakw kice okimaw kekotc ma kotakihik ka nikaniwitcik, akawir arimeritamokw e mamitoneritamekw ke ki naskomoekw, kekotc ke ki iteiekw. 12Ki ka witamakowaw meka Miro Manito mia ke aiteiekw ani apitc.”
Atisokanicic: Micikita iriniw ka ki marisitc
13Minawatc neta e mitcetinaniwonik, awik ki itew Cecoca: “Kiskinohamake iriniw, witamo nictes kitci miritc apita kaskina aniheriw e ici tatakipan notawinapan ka ki nakatak ka nipotc.”
14Itiko Cecoca: “Nikwimes, awin ka ki itactatc nin kitci tipaskonamatakok, kekotc kitci witaman tan anahwe nta e taciekw ke mirakaniwitc aniheriw?”
15Minawatc ki itew Cecoc, kaskina awiriw e aimihatc: “Aiekwamisikw! Nanakatcihitisokw aka orina kitci sakitaiekw kekocic e ici takok askik. Nama tepirak okekocicima kata otci pimatisiw iriniw, misawatc e micta micikitatc.”
16Ekoni e ici atisoketc ohweriw atisokaniciciriw, e aitetc: “Peikwaw takopan iriniw e micikitatc. Micaripan okitikan aski ke ki otci mitcisotc. Nipara okitikana ki mawotcitaw. 17Mamitoneritam, e iteritak: ‘Tan ke ki totaman? Nama takon wiec ke ki ici nahikaman kaskina nikitikana.’ 18Aci minawatc iteritam: ‘Ke ki totaman, ni ka orapaten nitactasokiwam. Ni ka ocitan kotak kirawe e micak, kaskina kitci ki nahikaman nikitikana kaie e ici tataman. 19Kaie ni ka ititison: Aci mitcen ke miro apatcitaian, mitceto pipona kitci mirwatcitaian. Ni ka arwepin, ni ka miro mitcison kaie ni ka miro minikwan. Kata micta mireritakon!’ 20Aci aric itiko Kice Manitowa anahwe iriniw: ‘Ki pisinatisin! Anotc ke mi tipiskak ki ka poni pimatisin. Awin tca minawatc ke irapatcitatc kaskina aniheriw ka ki mawotcitawotc?’”
21Aci minawatc itew Cecoc: “Ekoni e iciwepasitc awik ka mawotcitatc kitci ki micikitatc, wir tepirak e mamitonerimitisotc, aka aric e micikitatc Kice Manitowa e iterimikotc.”
E asperimototawakaniwitc Kice Manito
(Natawapata kaie Matio 6.25-34)
22Minawatc itew Cecoc owitcewakana: “Ekoni wetci ititakok: Aka arimeritamokw e mamitoneritamekw ke mitciekw kitci otci pimatisiekw, aka kaie kitci takok ke owikasimiekw. 23Kirawe meka kicteritakon pimatisiwin patok mitcim, kirika kiwiawiwaw kirawe kicteritakon patok wikasi. 24Kanawapamakok kotc ahasiwok. Nama matce kitikewok. Nama kaie mawotcitawok kitikaniw. Nama takoniw ke ici nahikakik kekociciriw. Nama kaie takoniw actasokiwamiriw. Peikon acamikowok Kice Manitowa. Kirawe kirawaw ki kicteritakosinawaw patok pirecicak. 25Awin neta e taciekw ke ki kackitatc kitci rikitatc opimatisiwin irikik e acterik kitci pimatisitc, tepirak e arimeritak e mamitoneritak ke ki isparinik? 26Kecpin aka wawatc e kackitaiekw anihe kitci totamekw, kekwan wetci arimeritamekw kaskina kotak kekocic? 27Kanawapatamokw wapikonia kotc e ici nitawikiki notcimik. Nama otamiromakano, nama kaie ocitamakano wikasia. Ki witamatinawaw tca, misawatc e ki micikitatc okimaw Salomon, nama tca peikon ki otci takoniw wikasiriw kirawe kitci mirwacinik patok peikw e tatiki ohwi wapikonia. 28Ocitaw Kice Manito kitci mirwacinik wapikoniriw askik e nitawikinik, misawatc tepirak memacic e pimatisimakanik, wapake tca ke motcictewepinikaterik. Kirawe kirawaw ki ka miro wespitikowaw patok anihi wapikoniriw e asitci miro wespitatc! Wesa nama micaw kit asperimowiniwaw! 29Aka tca mocak micta arimihitisokw e nantowapatamekw ke mitciekw kirika ke minikweiekw. 30Iriniwok aka ka kiskerimatcik Kice Manitowa, enkweriw aspinikotc ka nanto kiskeritakik. Aric kirawaw taw Kotawiwaw e kiskeritak kekwariw ka wi apatcitaiekw. 31Kirawe nanto kiskeritamokw Kice Manito Okimawin. Ki ka mirikowaw kaie kotakeriw ke wi ici apatcitaiekw kitci otci pimatisiekw.”
Micikitawin e ici takok wakwek
(Natawapata kaie Matio 6.19-21)
32“Aka sekisikw, nimaritcenicimak! Mireritam meka Kotawiwaw kitci miritakw Okimawin kitci tiperimitakw. 33Atawekw e ici tatamekw, mirakok tca aniheriw coriariw ka kitimakisitcik. Apatcitakw mackimotacica aka wiskat ke pakickiritiki. Mawotcitakw tca wakwek anihe micikitawin aka wiskat ke tcakiparik. Kimoti iriniwok nama kata ki katcitanamok, nama kaie kinepikocicak#12.33 kinepikocicak: Peikon kata ki ici nisitotakon: kwakwapitowok; mantcocak. kata ki mitciwok aniheriw. 34Neta meka e ici takok kimicikitawiniwaw, enko anihe ke kicteritamekw kitehiwaw.”
Ka nanakatisitcik arotakanak
35“Nisawikw kitci totamekw anihe ke mirikoiekw kitci itotiskeiekw kitci atoskectawekw Kice Manito, e opokotehoniekw kirika e iskahakik kiwactenamakaniwaw. 36Totamokw mia peikon ka atoskectaketcik e pehatcik okimamiwawa apitc ke takociniritci, e ici makocaniwonik e nipowinaniwonik e ki icaritci, kitci tca cenamowatcik ickwatemiriw kotc mia apitc ke takociniritci acitc ke papawohamiritci ickwatemik. 37Kata caweritakosiwok aniki ka atoskectaketcik, kecpin takociniritena anihi ka tiperitamiritci, wapamikotawe tca aka e nipatcik kaie e nanakatisitcik. Tapwe ohwe ka witamatakok: anahwe ka tiperitak kata meckotciho, mia arotakan kitci icihotc. Kata itew anahweriw otarotakana kitci orapiritci mitcisowakanatikok, wir tipirawe kitci atoskectawatc, kitci miratc ke mitciritci. 38Kecpin pe kiwete apita tipiskarike kekotc epwamoci pe wapanik#12.38 apita tipiskarike kekotc epwamoci pe wapanik: Mia itemakan: “à la deuxième veille, ou à la troisième.” pe kiwete, e wapamatc tca aka moci e niparitci kaie e nanakatisiritci anahweriw otarotakana, kata caweritakosiriwa.”
39“Miro nisitotamokw ohwe: iriniw e taciketc omikiwamik, kecpin tca e kiskeritak apitc mia ke pe icaritci kimoti iriniwa, nama kata pakitinepan kitci pitakeritci omikiwamik. 40Nisawikw tca kaie kirawaw kitci nanakatcihitisoekw. Anahwe meka Ka ki pe iriniwihitisotc kata pe icaw apitc mia aka e iteritamekw kitci takocik.”
Ka miro atoskectaketc kirika aka ka miro atoskectaketc
(Natawapata kaie Matio 24.45-51)
41Minawatc Pien kokwetcimew Cecoca, e itatc: “Teperitcikein, kit atisokan ia anihe atisokanicic tepirak ninan otci, kekotc ma kaskina iriniwok otci?”
42Itiko Teperitcikeritci: “Tan anahwe ka miro atoskectaketc, mocak ke ki asperimototawakaniwitc kitci miro otamirotc kirika ka kakitaweritak? Anahwe ka mirikotc anihi ka tiperimikotc kitci nanakatcitatc mikiwamiriw, kaie tato kickwa kitci miratc kotakihi ka atoskectakeritci omitcimimiriw apitc pakateritena. 43Kata mirwaciniw wir otci, anahwe ka atoskectaketc, kecpin e takociniritci okimama omikiwamirik, miskakote mekwata e taci otamirotc. 44Tapwe ohwe ka witamatakok: kata miriko anihi okimama kitci nanakatcitamowatc kaskina e ici tatamiritci. 45Kecpin aric iteritake anahwe arotakan: ‘Nokimam nama nac pe takociniw,’ kecpin tca kaie iti macikwate anihi kotakihi ka atoskectakeritci, iriniwa kaie iskwewa, kekotc ma kitciparite e mitcisotc kaie e minikwetc nac kitci kiwockwepitc, 46kek nikotin kata takociniw anahwe ka tiperitak, apitc mia tekaci aka e pehikospan anihi otarotakana, aka e kiskeritamiritci apitc mia ke takociniritci. Anahwe ka tiperitak kata matceticahwew anihi ka atoskectakotc, mitowi e ici anwerimakaniwitcik iriniwok aka ka nosanehwatcik Kice Manitowa.”
47“Arotakan ka kiskeritak e ici nataweritamiritci okimama, aka aric e ickwa aiketc kitci totak aniheriw, mitcetwaw kata paskactehwakaniwiw. 48Aric arotakan aka ka kiskeritak mia e ici nataweritamiritci okimama, aka kaie mia e itotisketc, memantcic tepirak kata paskactehwakaniwiw. Awik meka nipara ka cawerimakaniwitc, mictahi kata nataweritamawakaniwiw.#12.48 mictahi kata nataweritamawakaniwiw: Wi itemakanotake: mictahi kata nataweritamawakaniwiw kitci atoskectaketc. Awik nipara ka ki acotamawakaniwitc, kirawe awocamec kata nataweritamawakaniwiw.”
Wetci ki pe icatc Cecoc askik
(Natawapata kaie Matio 10.34-36)
49“Ni ki pe ican ota askik ickote kitci petaian. Mictahi tca ni nataweriten aci kitci iskahikatek! 50Aric pitama ni ka pe otitikon sikahatakewin. Ni ka micta nekateriten nac kitci poniparik irikik ke nekatcitaian. 51Kit iteritenawaw ia wetci ki pe icaian, pekateritamowin kitci petaian ota askik? Nama! Ki witamatinawaw, ni ki pe ican kitci papikanitotcik iriniwok.#12.51 ni ki pe ican kitci papikanitotcik iriniwok: Pot wi itemakanotake: Ni ki pe ican kitci kiskeritakik iriniwok ke apitc nosanehwiwakwen kekotc nama, tan pitoc e ici mirwacinik kaie e ici maratanik. 52Esko anotc, niaran iriniwok e peikotenwesitcik kata matciparihitowok. Kata nictokasowok aniki, minawatc kaie wirawaw aniki kotakihik kata nicokasowok. 53Kata wi kokwetcihitowok iriniw kirika okosa, iskwew kaie wir kirika otanisa, peikon kaie onahakaniskwema kata kokwetcihitowok.”
E nisitowinikatek tan e aicikicikak
(Natawapata kaie Matio 16.2-3)
54Minawatc Cecoc itew iriniwa e mitcetiritci: “Kecpin e wapatamekw e pe rikoskok nakapehonok, kit itwanawaw: ‘Aci kata kimiwon.’ Ekoni tapwe e iti kimiwok. 55Kecpin e kiskeritamekw e cawonirowek, kit itwanawaw: ‘Aci kata kicitew.’ Ekoni tapwe e iti kicitek. 56Ki miro iriniwikasonawaw! E wapatamekw kekocica ota askik kaie icpimik, ki kackitanawaw e nisitowinamekw tan ke ici kicikak. Kekwan tca wetci aka kackitaiekw kitci nisitowinamekw anotc e iciwepak?”#12.56 Pot wi itemakanotake: Kekwan wetci aka nisitowinamekw aniheriw ka totak Kice Manito ota e ici tacikeikw?
Kitci miskikatek ke ici nahitatonaniwok
(Natawapata kaie Matio 5.25-26)
57“Kekwan wetci aka kirawaw tipirawe oreritamekw icikowisk kitci itatisiekw? 58Kecpin awik wi arimihiske, tecikotc wecito mekwata e pimoteiekw, epwamoci takociniekw arimitakosiwikamikok. Kecpin aka ni itotiskeine, tipaskonike irinik ki ka iciwirikw. Minawatc wir tipaskonike iriniw ki ka iti iciwirikw takonike irinik, kitci tca kipohokoin. 59Tapwe ni ohwe ka ititan: Kecpin kipohotowikamikok iciticohokoine, nama wipatc ki ka orowin neta, patoc kaskina kicikamane irikik ka actakaniwok kitci orowiin. Ekoni patoc ke pakitinikoin.”
Currently Selected:
Luc 12: ATMK
Highlight
Share
Copy
Want to have your highlights saved across all your devices? Sign up or sign in
Canadian Bible Society, 2014