- नहेम्याह 9
9
पाप कौ स्वीकारबो
1फिन ओई मईना के चौबीसबें दिना हों इस्राएली उपास कौ टाट पैरकें और मूड़ पै धूरा डाले भए, इकट्ठे हो गए। 2तब इस्राएल के बंस के जनें सब अन्यजातन सें न्यारे हो गए, और ठांड़े होकें, अपने अपने पापन और अपने पुरखन के अधरम के कामन हों मान लओ। 3तब उनोंरन ने अपनी अपनी जागां पै ठांड़े होकें दिन के एक पहर लौ अपने यहोवा परमेसुर की ब्यवस्था की पोथी पढ़त, और दूसरे पहर अपने पापन हों मानत, और अपने यहोवा परमेसुर हों दंडवत करत रए। 4येशू, बानी, कदमीएल, शबन्याह, बुन्नी, शेरेब्याह, बानी और कनानी ने लेवियन की छिड़ियन पै ठांड़े होकें ऊंची आवाज सें अपने यहोवा परमेसुर की दुहाई दई। 5फिन येशू, कदमीएल, बानी हशब्नयाह, शेरेब्याह, होदिय्याह, शबन्याह और पतह्यह नाओं लेबियन नें कई, “ठांड़े हो; अपने यहोवा परमेसुर हों अनादिकाल सें लेकें अनंतकाल लौ धन्य कओ। तोरो महिमामय नाओं धन्य कहो जाए, जो सब धन्यबाद और स्तुति सें भौत जादां ऊंचो आए।”
पाप स्वीकारबे की बिन्तवाई
6तेंई अकेलो यहोवा परमेसुर आय; सरग बल्कि सबसें ऊंचे सरग और ऊके सब ग्रह, और पृथ्वी और जो कछु ऊमें आय, और समंदर और जो कछु ऊमें आय, सबई हों तेंई नें बनाओ, और सबई की रक्षा तेंई करत आय; और सरग की पूरी सेना तोहों दंडवत करत आय। 7हे यहोवा परमेसुर! तें ओई परमेसुर आय, जो अब्राम हों चुनकें कसदियन के ऊर नगर में सें काड़ लाओ, और ऊकौ नाओं अब्राहम रखो; 8और ऊके हिया हों अपने संगै सच्चो पाकें, ऊसें बाचा बांधी, कि “मैं तोरे बंस हों कनानियों, हित्तियों, एमोरियों, परिज्जियों, यबूसियों और गिर्गाशियों कौ देस दैहों; और तेंने अपनो ऊ बचन पूरो सोई करो, कायसें तें धरमी आय।
9फिन तेंने मिस्र में हमाए पुरखन के दुख पै नजर करी; और लाल समंदर के किनारे पै उनकी दुहाई सुनी। 10राजा फिरौन और ऊके सब करमचारी बल्कि ऊके देस के सब जनों हों दंड देबे के लाने चिन्ह और चमत्कार दिखाए; कायसे तें जानत हतो कि बे उनसें ढिठाई कौ ब्यवहार करत आंय; और तेंने अपनो ऐसो बड़ो नाओं करो, जैसो आज लौ बनो आय। 11तेंने उनके अगारें समंन्दर हों ऐसो दो भाग करो, कि बे समंदर के मजारें धरती धरती पै चलकें पार हो गए; और जो उनके पाछें पड़े हते, उनहों तेंनें गैरी जागां में ऐसो डालो, जैसे पथरा गैरे समंदर में डालो जाए। 12फिन तेंने दिन हों बादल के खंबे में होकें और रात हों आगी के खंबे में होकें उनकी अगुवाई करी, कि जौन गैल पै उनहों चलने हतो, ऊमें उनहों उजयारो मिलै। 13फिन तेंने सीनै पहरवा पै उतरकें आकास में सें उनके संगै बातें करीं, और उनहों सूदे नियम, सांची ब्यवस्था, अच्छी बिधियां और हुकम दए। 14उनहों पवित्तर बिसराम दिन कौ ज्ञान दओ, और अपने दास मूसा के द्वारा हुकम, बिधियां और ब्यवस्था दईं। 15उनकी भूख मिटाबे हों आकास सें उनें भोजन दओ और उनकी प्यास बुझाबे हों चट्टान में सें उनके लाने पानू काड़ो, और उनहों हुकम दओ कि जौन देस हों मैंने तुमें दैबे की कौल खाई आय, ऊके अधकारी होबे हों तुमोंरें ऊमें जाओ।
16परन्त उनोंरन ने और हमाए पुरखन ने घमंड करो, और हठीले बने और तोरो हुकम नईं मानो; 17और हुकम मानबे सें मना करो, और जो चमत्कारी काम तेंनें उनके मजारें करे हते, उनहों याद नईं करो, बल्कि हट करके इतै लौ बलवा करबेवारे बने, कि एक मुखिया ठैराओ कि अपनी गुलामी की दसा में फिन लौटें। परन्त तें छमा करबेवारो अनुग्रह और दया करबेवारो, देर सें गुस्सा करबेवारो और भौतई प्रेम करबेवारो ईसुर आय। तेंनें उनहों त्यागो नईंयां। 18बल्कि जब उनोंरन ने सोने कौ एक बछड़ा ढालकें कई, ‘तुमाओ यहोवा परमेसुर जो तुमें मिसर देस सें छुड़ा लाओ आय, ऊ जौई आय,’ और तोरो बिलात अपमान करो, 19तब भी तें जो भौतई दयालु आय, तेंने उनहों नें तौ जंगल में त्यागो; नें तौ दिन हों अगवाई करबेवारो बादल कौ खम्भा उन पै सें हटो, और नें रात हों उजयारा देबेवारो और उनहों गैल दिखाबेवारो आगी कौ खम्भा हों दूर करो। 20बल्कि तेंनें उनहों समजाबे के लाने अपनी आत्मा हों जौन भली आय दई, और अपनो मन्ना#- निर्गमन 16:14; 31. उनहों खिलाबो नईं छोड़ो, और उनकी प्यास बुझाबे हों पानी देत रओ। 21चालीस साल लौ तें जंगल में उनकौ एैसो पालन पोसन करत रओ कि उनहों कछु कमी नईं भई; नें तौ उनके उन्ना पुराने भए और नें उनके गोड़े में सूजन भई। 22फिन तेंने राज्य राज्य और देस देस के जनों हों उनके बस में कर दओ, और अलग-अलग जांगा उनहों बांट दई; और ई तरहां सें उनोंरन ने हेशबोन के राजा सीहोन और बाशान के राजा ओग दोंनों के देसों हों अपने अधकार में लै लओ। 23फिन तेंने उनकी संतान हों आकास के तारों जैसो बढ़ाकें ऊ देस में पोंचा दओ, जीके बारे में तेंने उनके पुरखन सें कई हती कि बे ऊमें जाकें ऊके अधकारी हो जाहैं। 24सो जा संतान जाके ऊकी अधकारी हो गई, और तेंनें ऊके द्वारा उनके देस के निवासी कनानियन हों दबाओ, और राजाओं और देस के लोगों समेंत उनहों, उनईं के हाथ में कर दओ, कि बे उनसें जो चाए सो करें। 25उनोंरन ने गढ़वाले नगर और उपजाऊ धरती ले लई, और सब तरहां की अच्छी चीजन सें भरे पूरे घरन के, और खुदे भए हौदों के, और दाख और जैतून की बारियों के, और खाबे के फलवाले मुतके पेड़ों के अधकारी हो गए; बे ऊहों खा खाकें अफर गए, और मोटे-ताजे हो गए, और तोरी बड़ी भलाई के कारन सें खूब सुख भोगत रए।
26परन्त बे तोसें दूर होकें बलवा करबेवारे बन गए और तोरी ब्यवस्था हों त्याग दओ, और तोरे जो आगमवक्ता तोरी कोद उनहों फेरबे के लाने ऊनहों चितात रए उनहों उनोंरन ने मार डालो, और तोरो बड़ो अपमान करो। 27ई कारन तेंने उनहों उनोंरन के दुस्मनों के हाथ में कर दओ, और उनोंरन ने उनहों आफत में डाल दओ; फिन भी जब जब बे आफत में पड़कें तोहों पुकारत हते, तब तें सरग सें उनोंरन की सुनत रओ; और तें जो भौतई दयालु आय, ई कारन सें उनोंरन के छुड़ाबेवारन हों भेजत रओ जो उनहों दुस्मनों के हाथ सें छुड़ात हते। 28परन्त जब जब बे आराम सें रैत हते, तब तब बे फिन तोरे सामूं बुराई करत हते, ई कारन तें उनहों दुस्मनों के हाथ में कर देत हतो, और बे उनपै राज करन लगत हते; फिन भी जब बे तोरे कुदाऊं फिरकें तोय पुकारत हते, तब तें सरग सें उनकी सुनत और तें जो दयालु आय, ई लाने बार बार उनहों छुड़ात, 29और उनहों चिताऊत हतो कि उनहों अपनी नेम ब्यवस्था के आधीन कर दे। परन्त बे घमंड करत रए और तोरो हुकम नईं मानत हते, और तोरे नेम, जिनहों अगर मान्स माने, तौ उनके कारन जियत रए, उनके बिरुद्ध पाप करत, और ढ़िटाई करत हते और नें सुनत हते। 30तें तौ मुतके साल लौ उनकी सहत रओ, और अपनी आत्मा सें अागमवक्तन के द्वारा उनहों चिताऊत रओ, परन्त बे कान नईं लगात हते, ई लाने तेंने उनोंरन हों देस देस के लोगों के हाथ में कर दओ। 31तौभी तेंने जो भौतई दयालु आय, उनकौ अंत नईं कर डालो और नें उनहों त्याग दओ, कायसें तें अनुग्रहकारी और दया करबेवारो ईसुर आय।
32अब हे हमाए यहोवा परमेसुर! हे महान बलवान और भययोग्य ईसुर! जो अपनी बाचा पालत और दया करत रओ आय, जो बड़ो कस्ट, अश्शूर के राजाओं के दिनन सें लेकें आज के दिना लौ हमें और हमाए राजाओं, हाकिमों, याजकों, नबियों, पुरखाओं, बल्कि तोरी सबरी परजा हों भोगने पड़ो आय, ऊ तोरी नजर में थोड़ो नें ठैरे। 33तौभी जो कछु हम पै बीतो आय ऊके बारे में तें तौ धरमी आय; तेंने तौ सच्चाई सें काम करो आय, परन्त हमने दुस्टता करी आय। 34हमाए राजाओं और हाकिमों, याजकों और पुरखाओं ने नें तौ तोरी ब्यवस्था हों मानो आय और नें तोरो हुकम और चितौनियों की कोद ध्यान दओ आय, जीसें तेंने उनहों चिताओ हतो। 35उनोंरन ने अपने राज्य में, और ऊ बड़े कल्यान की बेरा जो तेंने उनोंरन हों दओ हतो, और ई लम्बे चौड़े और उपजाऊ देस में तोरी सेवा नईं करी; और नें अपने बुरे कामन सें पछताव करो। 36हेर, हम आज कल भी गुलाम आंय; जौन देस तेंने हमाए पुरखन हों दओ हतो कि ऊकी अच्छी उपज खाएं और अच्छी बस्तों हों पाएं, ऐई में हम गुलाम आंय। 37ऐई उपज सें उन राजाओं हों जिनहों तेंने हमाए पापों के कारन हमाए ऊपर ठैराओ आय, मुतकौ धन मिलत आय; और बे हमाए सरीरों और हमाए पसुअन पै अपनी अपनी इच्छा के अनसार पिरभुता जतात आंय, ई लाने हम बड़े संकट में पड़े आंय।”
बाचा कौ बांधो जाबो
38ई सब के कारन, हम सच्चाई के संगै बाचा बांधत, और लिख सोई देत आंय, और हमाए हाकम, लेवीय और याजक ऊपै छाप लगात आंय।
Currently Selected:
- नहेम्याह 9: BHB
Highlight
Copy
Compare
Share
Want to have your highlights saved across all your devices? Sign up or sign in
New Testament books: © 2018 Central India Christian Mission.
Old Testament books: © 2018 Central India Christian Mission and Pioneer Bible Translators
