Romabi 12

Wami ngɛ Mawu sɔmɔmi mi

1Lɔ ɔ he ɔ, mamimɛ, i kɛ Mawu mɔbɔ nami ngɛ nyɛ pɛɛ kpae, kaa nyɛɛ ngɔ nyɛ nɔmlɔ tso ɔmɛ ngɔ da si kaa bɔ klɔuklɔu nɛ hɛ ngɛ nɛ he tsɔ nɛ sa Mawu hɛ mi nɛ nyɛ jami ɔ nɛ pee mumi mi jami. 2Nɛ nyɛ je mi bami ko pee kaa je mi bihi a je mi bami, se mohu nyɛ ha Mawu nɛ tsake nyɛ juɛmi, konɛ nyɛ yɔse nihi nɛ ji Mawu suɔmi nya ni kpakpahi nɛ sa e hɛ mi saminya nɛ hi kɛ pi si ɔ.

3Se i kɛ dloomi nɛ a kɛ dloo mi ɔ ngɛ nyɛ ti nɔ tsuaa nɔ dee ke e ko bu lɛ nitsɛ e he babauu tsɔ pe bɔ nɛ sa kaa e buu e he, se mohu e susu hɛ si kami susumi, nɔ tsuaa nɔ ɔ, kaa bɔ nɛ Mawu kale hemi kɛ yemi kalemi ɔ ngɔ ha lɛ ɔ. 4Ejakaa kaa bɔ nɛ nɔmlɔ tso kake he ɔ wa ngɛ he nihi fuu, se he ni ɔmɛ tsuo tsu we ni tsumi kake ɔ, 5ja nɔuu wɔ fuu nɛ ɔ, nɔmlɔ tso kake ji wɔ ngɛ Kristo mi, nɛ wa ti nɔ tsuaa nɔ ɔ, e nyɛmi he nɔ́ ji lɛ. 6Nɛ ngɛ dloomi nɛ a ngɔ ha wɔ ɔ nya a, wa ti nɔ tsuaa nɔ ngɛ dloomi ke ni slɔɔtohi slɔɔtohi: Ke gbami ʼi ɔ, waa gba ngɛ hemi kɛ yemi kalemi ɔ nya. 7Ke sɔmɔmi ʼi ɔ, waa hɛɛ sɔmɔmi ɔ nɔuu mi; ke ni tsɔɔmi ɔ, wa hɛɛ ni tsɔɔmi ɔ mi; 8nɔ nɛ tuɔ munyu tsɔɔ nihi ɔ, e hɛɛ munyu tumi kɛ tsɔɔmi ɔ mi; nɔ nɛ dlaa ni ngɔ haa nihi ɔ, e pee kɛ tsui jɔjɔɛ. Nɔ nɛ yeɔ nɔkɔtɔma a, e bɔ mɔde. Nɔ nɛ naa mɔbɔ ɔ, e pee kɛ tsui mi jɔmi.

9Suɔmi ɔ, osato ko hi mi. Nyɛɛ nyɛ yayami kulaa; nyɛɛ pɛtɛ nɔ kpakpa he. 10Nyɛɛ kɛ nyɛmimɛ a suɔmi nɛ suɔ nyɛ he; nɔ tsuaa nɔ kɛ bu nɛ ha e nyɛmi kekle. 11Nyɛ mɔde bɔmi ɔ nya ko ba si; nyɛ mumi ɔ he nɛ dɔ la; nyɛ sɔmɔ Nyɔmtsɛ ɔ. 12Nyɛ nya ngɛ hɛ kɛ nɔ fɔmi mi; nyɛ mia nyɛ hɛ mi ngɛ dengme gbomi mi; nyɛɛ hɛɛ sɔlemi mi daa. 13Ni klɔuklɔu ɔmɛ a kɔmɔ ɔ e pee nyɛ kɔmɔ; nyɛɛ bɔ nibwɔ peemi he mɔde.

14Nyɛɛ gbaa nihi nɛ waa nyɛ yi mi ɔ, nyɛɛ gbaa nɛ nyɛ ko gbiɛ. 15Nyɛɛ kɛ nihi nɛ ngɛ nyae ɔ nɛ nya, nɛ nyɛɛ kɛ nihi nɛ ngɛ ya foe ɔ nɛ fo. 16Nyɛ susu nɔ́ kake; nyɛ ko susu ni nguahi, se mohu nyɛɛ kɛ he si bali ɔmɛ nɛ bɔ. Nyɛ ko bu nyɛ he nileli.

17Nyɛ ko ngɔ yayami ngɔ ma nɔ ko nɔ ko yayami nane mi. Nyɛ susu nɔ́ nɛ ngɛ fɛu ngɛ nimli kulaa a hɛ mi ɔ he. 18Ke e maa hi ɔ, nyɛ blɔfami ɔ, nyɛɛ kɛ nimli tsuo nɛ hi si ngɛ he jɔmi mi. 19Suɔli, nyɛ ko ye nyɛ nitsɛmɛ nyɛ he lue, se mohu nyɛɛ ngmɛ mi mi fumi ɔ blɔ; ejakaa a ngma ke:

“Ye nɔ ji lue yemi,

Imi ma to nane mi, Nyɔmtsɛ ɔ lɛ de.”

20Lɔ ɔ he ɔ, ke hwɔ ngɛ o he nyɛlɔ yee ɔ, ha lɛ ni nɛ e ye. Ke kuma ngɛ lɛ tɔe ɔ, ha lɛ nyu nɛ e nu; ejakaa ke o pee ja a, o ma kpane hã kɛ la nya ngɔ pue e yi kpɛti. 21Ko ha yayami nɛ ye o nɔ, se mohu o kɛ kpakpa peemi nɛ ye yayami nɔ.

Currently Selected:

Romabi 12: DAN77

Highlight

Copy