Romabi 11
11
Mawu mɔbɔnami kɛ ha Israel
1Jeha nɛ i ngɛ bie ke: Anɛ Mawu kua e ma a lo? Dɛbi! Ejakaa imi hu Israel no ji mi, nɛ i je Abraham nina kɛ Benyamin weku ɔ mi. 2Mawu kua we e ma nɛ e le to momo ɔ. Aloo nyɛ li nɔ́ nɛ ngmami ɔ de ngɛ Elia yi nɔ ɔ, benɛ e da Mawu hɛ mi nɛ e po Israel nya ke: 3“Nyɔmtsɛ, o gbali ɔmɛ ɔ, a gbe mɛ, nɛ o bɔ sami latɛ ɔmɛ ɔ, a hule mɛ pue si, nɛ e piɛ ye nɔ kaketoo, nɛ a ngɛ mi hlae nɛ a gbe.” 4Se mɛni heto Mawu ha lɛ? “I si nyumuhi aakpe kpaago ngɔ ha ye he nɛ na we nɛ a kɛ a nakutsohi nɛ kpla si ngɔ ha Baal.” 5Jã kɛ̃ mwɔnɛ mwɔnɛ be nɛ ɔmɛ a mi hu e piɛ ni komɛ nɛ a hla mɛ ngɛ dloomi nya. 6Se ke dloomi nya ʼi ɔ, lɛɛ pi ngɛ ni tsumihi a nya hu; ejakaa lɔ ɔ lɛɛ dloomi ɔ pi dloomi hu.
7Lɛɛ kɛ ji lɛ kɛɛ? Nɔ́ nɛ Israel ngɛ hlae ɔ, e nine sui nɔ; se ninɛmɛ nɛ a hla a, a nine su nɔ; ninɛmɛ nɛ piɛ ɔ, a wlua a tsui, 8kaa bɔ nɛ a ngma a ke: “Mawu ngɔ kɔnuɛ demi mumi ko ngɔ fɔ a nɔ, hɛngmɛhi nɛ a kɛ hyɛ we nɔ, kɛ tuehi nɛ a kɛ nui nɔ kɛ ba su mwɔnɛ ligbi nɛ ɔ nɔ.” 9Nɛ David de ke:
“Ha a ni yemi okplɔɔ ɔ nɛ pee lohwe pɛlitsɛ dumi kpa,
Kɛ klama kɛ temi nɔ́ kɛ tue gblami ha mɛ.
10Ha a hɛ mi nɛ wo diblii, nɛ a ko hyɛ nɔ́,
Nɛ daa nɛ ɔ o ha a dɔ kɔmɔɔ.”
11Jeha nɛ i ngɛ bie ke: “Blɔɔ pe a tɛ si nɛ a nɔ si butuu lo?” Dɛbi! Se mohu a gu a sigbeemi ɔ nɔ kɛ he maje li ɔmɛ a yi wami, konɛ e ha a je hunga. 12Se ke a si gbeemi ɔ plɛ je ɔ ni nami, nɛ a nɔ gbɔmi ɔ hu plɛ majeli ɔmɛ a ni nami ɔ, lɛɛ kɛ a gbaami ɔ maa hiɛ ha kɛɛ, ke Israel tsuo tsake ɔ?
Majeli ɔmɛ a yiwamihemi
13Se nyɛ majeli a bimɛ ɔmɛ ɔ, i ngɛ nyɛ dee ke: Be abɔ nɛ imi ji maje li ɔmɛ a bɔfo nɛ ɔ ɔ, ma wo ye sɔmɔmi ɔ hɛ mi nyami, 14kaa eko ɔ, i kɛ ma ha ye wekuli ɔmɛ maa je hunga, nɛ ma he a ti ni komɛ a yi wami lo. 15Ejakaa ke a kuami ɔ ji je ɔ kɛ Mawu kpɛti kpatami ɔ, lɛɛ a yi wami hemi ɔ anɛ pi si temi kɛ gbeje jemi ʼi lo?
16Ke ma nɛ a sa a ngɛ klɔuklɔu ɔ, lɛɛ jã ma mluku ɔ kulaa hu ngɛ; nɛ ke tso sipoku ɔ ngɛ klɔuklɔu ɔ, lɛɛ jã kɔni ɔmɛ hu ngɛ. 17Ke a po tso kɔni ɔmɛ ekomɛ, nɛ a ngɔ mo nɛ o ji nga mi nu tso ɔ ngɔ ta he, nɛ o na nu tso ɔ poku ɔ kɛ e mi nyu ɔ eko ɔ, 18koo fia ngɛ kɔni ɔmɛ a nɔ; ke o fia ngɛ a nɔ ɔ, oʼɛ, tsa pi mo nɛ o hɛɛ poku ɔ, se poku ɔ mohu lɛ hɛɛ mo.
19Jeha nɛ eko ɔ, o ma de ke: Pe a po kɔni ɔmɛ, benɛ pee nɛ a ngɔ mi ngɔ ta tso ɔ he. 20Saminya; hemi nɛ a he we yi he je nɛ a po mɛ; nɛ moo lɛɛ hemi kɛ yemi o kɛ daa si nɛ ɔ nɛ. O yi ko fu, se mohu yee o he gbeye. 21Ejakaa, ke Mawu baa we tso ɔ nitsɛ kɔni ɔmɛ a yi ɔ, eko ɔ, mo hu e be o yi baae. 22Lɔ ɔ he ɔ, hyɛ Mawu mi mi himi kɛ e sane wami ɔ tsuo. E sane wa ngɛ nihi nɛ gbee si ɔmɛ a nɔ, se moo lɛɛ e mi mi hi ngɛ o nɔ, ke o hi e mi mi himi ɔ mi ɔ; ke pi ja a, a maa po mo ngɔ sake ngɔ fɔ he. 23Nɛ mɛ hu, ke a ngmɛɛ hemi nɛ a he we yi ɔ he ɔ, a maa ngɔ mɛ ngɔ ta he; ejakaa Mawu ma nyɛ maa ngɔ mɛ ngɔ ta he. 24Nɛ ke moo lɛɛ pe a po mo ngɛ tso nɛ ji nga mi nu tso ngɛ bɔ su nya a he, nɛ a ngɔ mo ngɔ ta nu tso kpakpa a he, nɔ́ ko nɛ a pɔɛ peemi ɔ, nihi nɛ a ji tso ɔ nitsɛ kɔni ɔmɛ ɔ, a nɛ a be mɛ ngɔe ngɔ ta mɛ nitsɛmɛ a nu tso ɔ he hluu lo?
Mawu mɔbɔnami kɛ ha nimli
25I sume kaa ma laa nyɛ kikɛmɛ a sane nɛ ɔ nɔ, mamimɛ, konɛ nyɛ ko bu nyɛ he ni leli, ke: Pe a wlua Israel tsui fa kɛ fa kɛ yaa si be nɛ majemajeli ɔmɛ a hiɛmi ɔ maa su, 26nɛ lɔ ɔ loko a ma he Israel tsuo yi wami kaa bɔ nɛ a ngma a ke:
“Jelɔ ɔ maa je Zion kɛ maa ba,
Nɛ e ma ba je Yakob he nɔ yayami peemi ɔ kɛ je lejɛ ɔ,
27Nɛ enɛ ɔ ji i kɛ mɛ wa kpɛti somi ɔ,
Kaa ma je a he yayami ɔmɛ kɛ ho.”
28Ngɛ Sane Kpakpa a blɔfami ɔ, he nyɛli ji mɛ ngɛ nyɛ he. Se ngɛ hlami ɔ blɔfami ɔ, a suɔ mɛ ngɛ tsɛmɛ ɔmɛ a he. 29Ejakaa Mawu pia we e he ngɛ e dloomi ni ɔmɛ kɛ e tsɛmi ɔ he. 30Ejakaa kaa bɔ nɛ sa a nyɛ hu nyɛ bui Mawu tue, se jeha nɛ a na nyɛ mɔbɔ ngɛ a tuegbenɔ ɔ he ɔ, 31ja nɔuu kɛ̃ mɛ hu a tue gbo, konɛ bɔ nɛ a na nyɛ mɔbɔ ɔ mɛ hu a na mɛ mɔbɔ. 32Ejakaa Mawu nga nihi kulaa a yi ngɔ wo tuegbenɔ mi, benɛ pee nɛ e na mɛ kulaa mɔbɔ.
Mawu yijemi
33Oo, bɔ nɛ Mawu Ni hiɛhiɛ kɛ ga kɛ ni lemi mi kuɔ ha ji nɛ ɔ nɛ! E kojomi ɔmɛ ɔ, a nyɛ we sisi nami, nɛ e blɔ ɔmɛ bu, a nyɛ we hiɔmi!
34“Ejakaa mɛnɔ le Nyɔmtsɛ ɔ juɛmi ɔ,
Aloo mɛnɔ wo lɛ ga hyɛ?
35Aloo mɛnɔ sɛ hlami ha lɛ nɔ́ ko,
Nɛ jinɛ a ko to lɛ nane mi?”
36Ejakaa e dɛ mi nihi tsuo je, nɛ e nɔ a gu kɛ ba, nɛ lɛ nɔuu a ngɛ kɛ ha. A ngɔ hɛ mi nyami ngɔ ha lɛ kɛ ya neneene! Amen.
Currently Selected:
Romabi 11: DAN77
Highlight
Share
Copy
Want to have your highlights saved across all your devices? Sign up or sign in
Dangme New Testament © United Bible Societies, 1977.
