2 Korintobi 4
4
Mumi mi juetli ngɛ zu buɛhi a mi
1Akɛnɛ wa hɛɛ kikɛmɛ a sɔmɔmi nɛ ɔ, kaa bɔ nɛ a na wɔ mɔbɔ ɔ, wa ji fɔ́, 2Wa kua zo nihi nɛ a kɛ laa a, nɛ wa bɛ wa je mi ngɛ kutupɔ mi, nɛ jehanɛ hu wa futuu we Mawu munyu ɔ, se mohu waa kɛ anɔkuale ɔ kpo jemi ɔ jeɔ wa he yi ngɔ tsɔɔ ni mli a he nilemi tsuo ngɛ Mawu hɛ mi. 3Se ke pe a ha wa Sane Kpakpa a nɔ tete po ɔ, nihi nɛ a hɛ mi ngɛ kpatae ɔmɛ a mi kɛkɛ a ha nɔ ngɛ, 4nihi a mi nɛ je nɛ ɔ mi mawu ɔ yu nihi nɛ he we yi ɔmɛ a hɛngmɛ ngɛ, konɛ Kristo, nɛ ji Mawu subai ɔ, hɛ mi nyami ɔ sane kpakpa a la nɛ ngɛ tsoe ɔ nɛ ko kpɛ ha mɛ. 5Ejakaa pi wɔ nitsɛmɛ wa he nɛ wa ngɛ fiee, se mohu Kristo Yesu, kaa lɛ ji Nyɔmtsɛ, se wɔɔ lɛɛ, nyɛ sɔmɔli ji wɔ ngɛ Yesu he. 6Ejakaa Mawu nɛ de ke: “La nɛ je diblii mi nɛ e kpɛ” ɔ, lɛ nɔuu lɛ e kpɛ ngɛ wa tsui mi hulɔ, konɛ Mawu hɛ mi nyami he ni lemi ɔ nɛ kpɛ ngɛ Yesu Kristo hɛ mi.
7Se wa hɛɛ kikɛmɛ a juetli nɛ ɔ ngɛ zu buɛhi a mi, konɛ he wami nɛ hiɛ kɛ be nɔ ɔ nɛ pee Mawu nɔ́, se pi wa nɔ́. 8A haoɔ wɔ ngɛ he tsuaa he, se kɛ̃ ɔ, a yi wa nɔ; wa yi mi peɔ wɔ enyɔ enyɔ, se kɛ̃ ɔ, wa nine mi wui nyu; 9a waa wɔ yi mi, se kɛ̃ ɔ, a kua we wɔ; a fiaa wɔ si, se kɛ̃ ɔ, wa gbo we; 10daa nɛ ɔ wa hɛɛ Nyɔmtsɛ ɔ gbenɔ ɔ ngɛ wa nɔmlɔ tso ɔ mi kɛ nyɛɛ, konɛ Yesu wami ɔ hu nɛ je kpo ngɛ wa nɔmlɔ tso ɔ mi. 11Ejakaa wɔ nɛ wa hɛ ngɛ nɛ ɔ ɔ, daa nɛ ɔ, a tu wɔ ngɔ wo gbenɔ dɛ mi ngɛ Yesu he, konɛ Yesu wami ɔ hu nɛ je kpo ngɛ wa he lo nɛ ma gbo ɔ mi. 12Lɔ ɔ he ɔ jehanɛ, gbenɔ tsuɔ ni ngɛ wa mi, se nyɛɛ lɛɛ, wami tsuɔ ni ngɛ nyɛ mi.
13Se akɛnɛ wa ngɛ jamɛ a hemi kɛ yemi mumi ɔ nɔuu, kaa bɔ nɛ a ngma ke: “I he ye, nɛ lɔ ɔ he ɔ i de” ɔ, wɔ hu wa heɔ yeɔ, nɛ lɔ ɔ he je ɔ wa deɔ hulɔ; 14ejakaa wa le kaa nɔ nɛ tle Nyɔmtsɛ Yesu si ɔ, e ma tle waa kɛ Yesu si, nɛ e kɛ waa kɛ nyɛ tsuo ma ba da e hɛ mi. 15Ejakaa nyɛ he nɛ a ngɛ enɛ ɔ kulaa pee, konɛ dloomi nɛ hiɛ babauu nɛ gu nihi fuu a sina nɔ kɛ be nɔ kɛ ha Mawu hɛ mi nyami womi.
Hemi kɛ yemi nya sihimi
16Lɔ ɔ he nɛ wa tsui pui ɔ nɛ, se ke wa kpo nɔ blɔ nɔmlɔ ɔ puɛɔ kulaa tete po ɔ, kɛ̃ ɔ, wa mi nɔmlɔ ɔ plɛɔ ehe daa ligbi. 17Ejakaa wa nɔ nami nɛ nya wa nɛ se kɛ we nɛ ɔ ngɛ neneene hɛ mi nyami babauu nɛ be nɔ nɛ he jua wa hluu nya buae ha wɔ. 18Wɔ nɛ wa pi nihi nɛ hyɛɛ nihi nɛ a naa a, se mohu nihi nɛ a nɛ ɔ wa hyɛɛ ɔ; ejakaa nihi nɛ a naa a hii si be bɔɔ ko kɛkɛ, se nihi nɛ a nɛ́ ɔ hii si kɛ yaa neneene.
Currently Selected:
2 Korintobi 4: DAN77
Highlight
Copy
Compare
Share
Want to have your highlights saved across all your devices? Sign up or sign in
Dangme New Testament © United Bible Societies, 1977.
