2 Korintobi 3
3
Somi He ɔ he sɔmɔli
1Anɛ pe wa kpale ngɛ wa he yi jee? Aloo e hia kaa wa hɛɛ yi jemi womi, kaa bɔ nɛ ni komɛ hɛɛ kɛ ba haa nyɛ loo kɛ jee nyɛ ngɔ ɔ lo? 2Nyɛ nitsɛmɛ ji wa womi nɛ a ngma ngɔ wo wa tsui mi nɛ nihi tsuo le nɛ a kaneɔ. 3A je nyɛ ngɔ tsɔɔ paa kaa nyɛ ji Kristo womi nɛ wa ngma, pi kɛ ni ngmami nyu, se mohu Mawu hɛ kalɔ ɔ mumi ɔ a kɛ ngma, pi ngɛ tɛ sleetihi a nɔ, se mohu tsui nɛ ji he lo sleeti nɔ.
4Kristo he nɛ wa ngɛ kikɛmɛ a hɛ kɛ nɔ fɔmi nɛ ɔ ngɛ Mawu blɔfami: 5pi kaa wɔ nitsɛmɛ ɔ wa sa nɛ wa susu kaa nɔ ko je wɔ nitsɛmɛ wa mi, se wa sami ɔ Mawu mi nɛ e je; 6lɛ nɔuu lɛ e ha wa sa, nɛ wa plɛ Somi He ɔ he sɔmɔli, pi ngmami okadi nɔ́ se mohu mumi nɔ́, ejakaa ngmami okadi ɔ gbee nɔ, se mumi ɔ haa nɔ yi naa wami.
7Se ke gbenɔ sɔmɔmi nɛ a kpɛ ngɛ tɛhi a nɔ ɔ hɛ mi ba nyami bɔ nɛ Israelbi ɔmɛ nyɛ we Mose hɛ mi nɛ a hyɛ po ngɛ nyami nɛ se poo ɔ he ɔ, 8anɛ mumi sɔmɔmi ɔ be nyami pee hluu pe kɔlɔ ɔ lo? 9Ejakaa, ke fɔ bumi sɔmɔmi ɔ hɛ mi ba nyami ɔ, anɛ dami sɔmɔmi ɔ hɛ mi be nyami bae kɛ be nɔ lo? 10Niinɛ, ngɛ enɛ ɔ mi ɔ, nɔ́ nɛ ngɛ hɛ mi nyami sa a, hɛ mi be nyami bae hu ngɛ hɛ mi nyami kpã nɛ pã lɛ ɔ he. 11Ejakaa ke nɔ́ nɛ se poo ɔ ba kɛ hɛ mi nyami ɔ, lɛɛ nɔ nɛ hii si ɔ mohu hɛ mi nyami ɔ hiɛ hluu.
12Jehanɛ, akɛnɛ wa ngɛ kikɛmɛ a hɛ kɛ nɔ fɔmi nɛ ɔ he je ɔ, wa peɔ ka babauu, 13nɛ wa pee we kaa Mose nɛ kɛ hɛ mi hami nɔ ha e hɛ mi, konɛ Israelbi ɔmɛ ko hyɛ nɔ nɛ se poo ɔ nya gbemi ɔ. 14Se mohu a nga a juɛmi nya. Ejakaa kɛ ba su mwɔnɛ ligbi nɛ ɔ nɔ ɔ, jamɛ a hɛ mi hami nɔ́ ɔ nɔuu lɛ ha Somi Momo ɔ kanemi ɔ nɔ; ejakaa Kristo mi pɛ nɛ e se poo ngɛ. 15Se kɛ ba su mwɔnɛ ligbi nɛ ɔ nɔ ɔ, be tsuaa be nɛ a ngɛ Mose Womi ɔ kanee ɔ, hɛ mi hami nɔ́ ha a tsuihi a nɔ; 16se ke a kpale a se kɛ ba Nyɔmtsɛ ɔ ngɔ ɔ, a ma je hɛ mi hami nɔ́ ɔ. 17Jehanɛ, Nyɔmtsɛ ɔ ji Mumi ɔ nɛ; nɛ he nɛ Nyɔmtsɛ ɔ Mumi ɔ ngɛ ɔ, lejɛ ɔ he yemi ngɛ. 18Se wɔ kulaa nɛ waa kɛ hɛ mi kpetekplee hyɛɛ Nyɔmtsɛ ɔ hɛ mi nyami ɔ, kaa a hyɛɛ ahuhuɛ mi ɔ, wa ngɛ tsakee kɛ ngɛ jamɛ a subai ɔ nɔuu plɛe kɛ ngɛ hɛ mi nyami mi jee kɛ yaa hɛ mi nyami mi, ejakaa enɛ ɔ je Nyɔmtsɛ nɛ ji Mumi ɔ ngɔ.
Currently Selected:
2 Korintobi 3: DAN77
Highlight
Copy
Compare
Share
Want to have your highlights saved across all your devices? Sign up or sign in
Dangme New Testament © United Bible Societies, 1977.
