2 Korintobi 1
1
1Imi Paulo, nɛ ji Yesu Kristo bɔfo ngɛ Mawu suɔmi nya a, kɛ wa nyɛmi Timoteo ɔ ngma ya ha Mawu asafo nɛ ngɛ Korinto kɛ he tsɔli kulaa nɛ ngɛ Akaia tsuo ɔ:
2Dloomi kɛ he jɔmi nɛ je wa tsɛ Mawu kɛ Nyɔmtsɛ Yesu Kristo dɛ mi ɔ ha nyɛ.
Paulo naa Mawu si
3A gbaa Mawu kɛ wa Nyɔmtsɛ Yesu Kristo Tsɛ ɔ, nɔ nɛ ji mi mi sali a tsɛ, kɛ ɛbua womi kulaa Mawu ɔ, 4nɔ nɛ jɔɔ wa bua ngɛ wa nɔ nami ɔmɛ kulaa mi, konɛ wɔ hu wa nyɛ nɛ waa kɛ bua womi nɛ Mawu kɛ woɔ wa bua a nɛ wo nihi nɛ naa amanehlu tsuaa amanehlu ɔmɛ a bua. 5Nɛ bɔ nɛ Kristo amanehlu ɔmɛ baa wa nɔ kɛ bee nɔ ɔ, ja nɔuu kɛ Kristo he ɔ, wa bua womi ɔ hu hiɛɛ kɛ bee nɔ. 6Se ke amanehlu wa naa a, nyɛ bua womi kɛ yi wami hemi he ʼi; nɛ ke wa bua a woɔ hu, e ji nyɛ bua womi nɛ haa nyɛ toɔ nyɛ tsui si kpoo kɛ naa amanehlu nɛ wa naa a nɔuu eko. 7Nɛ wa hɛ nɛ ngɛ nyɛ nɔ ɔ gbɔle we, ejakaa wa le kaa bɔ nɛ nyɛ naa amanehlu ɔ eko ɔ, ja nɔuu kɛ nyɛ naa bua womi ɔ hu eko.
8Mamimɛ, wa sume kaa waa ngɔ wa nɔ́ nɛ wa na ngɛ Asia a kɛ laa nyɛ. Wa na nɔ tsɔ, pe bɔ nɛ wa ma nyɛ po, nɛ wa hɛ be je mi himi nɔ tete. 9Wɔ nitsɛmɛ wa na ngɛ wa mi paa kaa wa ma gbo, konɛ wa ko ngɔ wa hɛ ngɔ fɔ wɔ nitsɛmɛ wa he nɔ, se mohu wa ngɔ fɔ Mawu nɛ tleɔ ni gbogboehi a si ɔ nɔ, 10Mawu nɛ je wɔ kɛ je gbenɔ nɛ ngɛ gbeye nɛ ɔ mi, nɛ e ngɛ wɔ jee kɛ mwɔɔ, nɛ wa hɛ ngɛ e nɔ kaa e maa kpale je wɔ kulaa. 11Nyɛ hu nyɛɛ piɛ wa he kɛ kpa pɛɛ konɛ nihi fuu nɛ na si ha wɔ ngɛ dloomi nike nihi nɛ a kɛ ha wɔ ngɛ nihi fuu a pɛɛ kpami ɔ he.
Paulo tsake e yimitomi ɔmɛ
12Se wa fiami ji nɛ ɔ nɛ: wa he ni lemi odase nɛ e yeɔ wɔ, kaa Mawu klɔuklɔu peemi kɛ he tsɔmi mi wa ba wa je mi ngɛ ngɛ je nɛ ɔ mi, titli ɔ, ngɛ nyɛ kpɛti, nɛ pi he lo mi ni lemi nya, se mohu Mawu dloomi nya. 13Ejakaa wa ngmɛ́ ni kpahi ha we nyɛ, pe nihi nɛ nyɛ kaneɔ nɛ jehanɛ hu nyɛ le, nɛ ye hɛ ngɛ nɔ kaa nyɛ maa le kɛ maa ya nyagbe hulɔ ɔ. 14Kaa bɔ nɛ nyɛ na le wɔ hulɔ fa kɛ fa, kaa nyɛ fiami nɔ́ ji wɔ, kaa bɔ nɛ nyɛ hu nyɛ ji wa nɔ́ ngɛ Nyɔmtsɛ Yesu ligbi ɔ nɔ ɔ.
15Kikɛmɛ a hɛ kɛ nɔ fɔmi nɛ ɔ he je nɛ i to ye yi mi kaa ma ba nyɛ ngɔ kekle ɔ nɛ, konɛ nyɛ na dloomi si enyɔ. 16Ma ba gu nyɛ ngɔ kɛ ya Makedonia, nɛ jehanɛ hu ma kpale ye se kɛ je Makedonia kɛ ba nyɛ ngɔ ekohu, konɛ nyɛ ya je mi blɔ kɛ ya Yudea. 17Blɔɔ nɛ i to ye yi mi kikɛ ɔ, yi flɛflɛ i kɛ pee lo? Aloo ye yi mi nɛ i to ɔ, he lo nya i to ngɛ konɛ ma de “Ee,” kɛ “Dɛbi,” ngɛ be kake mi lo? 18Mawu ji wa odase, kaa wa munyu nɛ waa kɛ nyɛ tu ɔ, e pi “Ee” kɛ “Dɛbi” ngɛ be kake mi. 19Ejakaa Mawu bi Yesu Kristo, nɔ nɛ i kɛ Silvano kɛ Timoteo fiɛ e he sane ngɛ nyɛ kpɛti ɔ, e pi “Ee” kɛ “Dɛbi” se mohu e ji “Ee”. 20Ejakaa Mawu si womihi abɔ nɛ ngɛ ɔ, e mi “Ee” ɔ ngɛ, nɛ e mi nɔuu “Amen” ɔ ngɛ, konɛ a gu e nɔ kɛ wo Mawu hɛ mi nyami. 21Se Mawu ji nɔ nɛ haa waa kɛ nyɛ tsuo nane pii si ngɛ Kristo mi, nɛ e pɔ wɔ nu, 22nɛ e sɔu wa nya, nɛ e kɛ Mumi ɔ yi ba pomi nɔ́ ha wɔ ngɛ wa tsui mi hulɔ.
23Se imi lɛɛ i ngɛ Mawu tsɛe nɛ ba ye ye klaa he odase kaa yɛ yi baami he je nɛ i na we ma ba Korinto ɔ nɛ. 24Wa yi nyɛ hemi kɛ yemi nyɔguɛ, ejakaa nyɛ daa si tutuutu ngɛ hemi kɛ yemi ɔ mi, se mohu wa piɛ nyɛ he kɛ ngɛ nyɛ bua jɔmi he ni tsue.
Currently Selected:
2 Korintobi 1: DAN77
Highlight
Copy
Compare
Share
Want to have your highlights saved across all your devices? Sign up or sign in
Dangme New Testament © United Bible Societies, 1977.
