1 Korintobi 16
16
Oniatsumi kɛ ha Yerusalem asafo ɔ
1Jehanɛ ngɛ onia nɛ a tsuɔ kɛ haa Mawu webi ɔmɛ a he ɔ, kaa bɔ nɛ i to ha Galatia asafo ɔmɛ ɔ, nyɛ hu nyɛɛ pee ja. 2Daa otsi kekleekle ligbi ɔ nɔ ɔ, nyɛ ti nɔ tsuaa nɔ nɛ je nɔ́ ko ngɔ to, ngɛ bɔ nɛ e naa a nya, konɛ ma ko ba loko a tsu onia a. 3Nɛ ke i ba a, ma tsɔ nihi nɛ nyɛ buu kaa a sa kɛ womi nɛ a hɛɛ nyɛ nike ni ɔmɛ kɛ ya Yerusalem. 4Se ke e sa kaa imi hu ma ya a, i kɛ mɛ maa ya.
Paulo yimitomi
5Se ma ya gu Makedonia loko ma ba nyɛ ngɔ, ejakaa Makedonia ma ya gu. 6Eko ɔ ma hi nyɛ gɔ bɔɔ, nɛ eko ɔ ma ye fiɛ̃ be ɔ hu ngɛ lejɛ ɔ, konɛ he tsuaa he nɛ i yaa a nɛ nyɛ ya je mi blɔ. 7Ejakaa i sume kaa ma na nyɛ ngɛ blɔ kpɛ kɛkɛ, se ye hɛ ngɛ nɔ kaa ke Nyɔmtsɛ ɔ maa ngmɛ mi blɔ ɔ, ma kɛ bɔɔ ngɛ nyɛ ngɔ.
8Se ma hi Efeso kɛ maa su Pentekoste ligbi ɔ nɔ. 9Ejakaa a bli sinya kpetekpleenyɛ nya ha mi, kɛ ha ni tsumi fuu nɛ maa wo yiblii, se ninɛmɛ nɛ kuɔ nya a hu hiɛ.
10Ke Timoteo ba nyɛ ngɔ ɔ, nyɛɛ hyɛ nɛ nyɛ he lɛ hɛmuɔ, ejakaa Nyɔmtsɛ ɔ ni tsumi nɔuu e ngɛ tsue kaa imi. 11Kɔlɔ ɔ he ɔ nɔ ko ko bu lɛ kaa pi nɔ ko ji lɛ; se nyɛ je lɛ blɔ ngɛ he jɔmi mi konɛ e ba ye ngɔ. Ye hɛ ngɛ nɔ kaa e kɛ nyamimɛ ɔmɛ maa ba.
12Wa nyɛmi Apolo ɔ, i kpa lɛ pɛɛ hluu nɛ e kɛ nyɛmimɛ ɔmɛ nɛ ba nyɛ ngɔ, se e kplɛɛ we kulaa kaa e maa ba amlɔ nɛ ɔ, se ke e na e he deka hu e maa ba.
Nyagbe munyuhi
13Nyɛɛ huɔ, nyɛɛ da si kpɛii ngɛ hemi kɛ yemi ɔ mi, nyɛɛ pee nyumu, nɛ nyɛ he nɛ wa! 14Nyɛɛ pee nyɛ nihi kulaa ngɛ suɔmi mi.
15Mamimɛ, nyɛ le Stefana we mi bi ɔmɛ kaa mɛ ji Akaia kekleekle yiblii, nɛ a ngɔ Mawu webi ɔmɛ a sɔmɔmi ɔ ngɔ fɔ a nɔ. 16I kpa nyɛ pɛɛ konɛ nyɛ hu nyɛɛ ba nyɛ he si ha ni nɛ ɔmɛ, kɛ nɔ tsuaa nɔ nɛ kɛ mɛ tsuɔ ni nɛ e bɔɔ mɔde ɔ.
17I na buajɔmi ngɛ Stefana kɛ Fortunato kɛ Akaiko bami ɔ he, ejakaa nɛ nyɛ be ye ngɔ nɛ ɔ, mɛ lɛ a ba ye nyɛ nɛne mi. 18Ejakaa a ba wo ye bua kaa bɔ nɛ a wo nyɛ hu nyɛ bua a. Lɔ ɔ he ɔ, nimli nɛ ngɛ kaa ni nɛ ɔmɛ ɔ nyɛɛ le mɛ saminya.
19Asia asafo ɔmɛ biɔ nyɛ. Akwila kɛ Priskila kɛ asafo nɛ ngɛ a we ɔ mi ɔ biɔ nyɛ saminya ngɛ Nyɔmtsɛ ɔ mi. 20Nyɛmimɛ ɔmɛ kulaa biɔ nyɛ. Nyɛ nga nyɛ he kɛ nya he fiɔmi klɔuklɔu.
21Ami Paulo nitsɛ ye nine nya biɔmi ji nɛ ɔ nɛ.
22Ke nɔ ko sume Nyɔmtsɛ Yesu Kristo sane ɔ, jamɛ a nɔ ɔ e plɛ musutsɛ! Wa Nyɔmtsɛ, ba! (Maran ata.)
23Nyɔmtsɛ Yesu Kristo dloomi ɔ kɛ nyɛ nɛ hi si!
24Ye suɔmi ɔ kɛ nyɛ tsuo nɛ hi si ngɛ Kristo Yesu mi! Amen.
Currently Selected:
1 Korintobi 16: DAN77
Highlight
Copy
Compare
Share
Want to have your highlights saved across all your devices? Sign up or sign in
Dangme New Testament © United Bible Societies, 1977.
