1 Korintobi 4
4
Kristo sɔmɔli
1Bɔ pɛ nɛ sa nɛ nimli nɛ bu wɔ ji nɛ ɔ nɛ, kaa Kristo sɔmɔli kɛ Mawu laami sane ɔmɛ a nɔ sɔmɔli nikɔtɔmahi. 2Nɔ nɛ piɛ nɛ a hlaa ngɛ sɔmɔli nikɔtɔma amɛ a dɛ ji kaa, a na a ti nɔ tsuaa nɔ kaa anɔkualetsɛ. 3Se imi lɛɛ i bui lɛ sane slɔɔto ko kaa nyɛ kojoɔ mi aloo kaa a kɛ nimli a kojomi maa kojo mi; se imi nitsɛ ɔ, i kojo we ye he. 4Ejakaa i li nɔ ko yaya ko ngɛ imi nitsɛ ye he mohu, se kɛ ɔ pi lɔ ɔ he nɛ a maa wo mi nguɔ ngɛ; nɔ nɛ kojoɔ mi ji Nyɔmtsɛ ɔ. 5Lɔ ɔ he ɔ nyɛ ko kojo nɔ ko loko e su be ɔ, kɛ yaa su be nɛ Nyɔmtsɛ ɔ maa ba, nɔ nɛ kɛ diblii mi nihi nɛ a kɛ laa a tete maa ba la hɛ mi nɛ e ma je tsuihi a mi juɛmi ɔmɛ a si ɔ. Lɔ ɔ mi ɔ, nɔ tsuaa nɔ ma na e yi jemi kɛ maa je Mawu dɛ mi.
6Mamimɛ, nyɛ he nɛ i kɛ kikɛmɛ a ni nɔmɛ ngɛ i kɛ Apolo he toeɔ nɛ, konɛ nyɛɛ kase wɔ nɛ nɔ ko ko susu pe nɔ nɛ a ngma a, konɛ nyɛ ti nɔ ko kɛ he nɔ womi ko bu nɔ ko pe nɔ ko. 7Mɛnɔ ha eslo mo? Nɛ jeha nɛ mɛni o ngɛ nɛ pi nɛ a kɛ ha mo? Se ke pe a kɛ ha mo ɔ, mɛ he je o fiaa kaa nɔ nɛ pi nɛ pe a kɛ ha mo ɔ?
8Nyɛ tɔ mo, nyɛ na ni mo, nyɛ si wɔ se nɛ nyɛ ngɛ matsɛ yee. I na nɛ jinɛ nyɛ ngɛ matsɛ yee niinɛ, konɛ wɔ hu waa kɛ nyɛ nɛ ye! 9Ejakaa e peɔ mi kaa Mawu ngɔ wɔ nihi nɛ wa ji bɔfo ɔmɛ mohu ngɔ pee se kpɛli, kaa nihi nɛ a gbaa a nɔ ngɔ ha gbenɔ ejakaa a kɛ wɔ pee hyɛmi nihi ha je ɔ kɛ hiɔwe bɔfohi kɛ nimli. 10Wɔɔ lɛɛ, kuasiahi ji wɔ ngɛ Kristo he, se nyɛɛ lɛɛ ni leli ji nyɛ ngɛ Kristo mi. Wɔɔ lɛɛ, gbɔjɔli ji wɔ, se nyɛɛ lɛɛ, he wali ji nyɛ; nyɛ lɛ nyɛ hɛ mi ngɛ nyami, se wɔɔ lɛɛ wa hɛ mi be nyami. 11Kɛ ba su be nɛ ɔ tsuo ɔ, hwɔ kɛ kuma yee wɔ, nɛ wa nyɛɛ wa he gu, nɛ a gbaa wɔ mahi, nɛ wa be hi he tutuutu ko, 12nɛ wa gboɔ dengme waa kɛ wa ninehi tsuɔ ni; benɛ a ngɛ wɔ jɛe ɔ, wa ngɛ gbaae; benɛ a ngɛ wɔ yi mi wae ɔ, wa toɔ wa tsui si; 13benɛ a ngɛ wa biɛ puee ɔ, wa ngɛ pɛɛ kpae. Wa plɛ kaa je ɔ kuku nɔ nihi, nihi kulaa a dwɔmi kɛ ba su be nɛ ɔ.
14I ngmɛ́ nyɛ enɛ ɔmɛ nɛ ma kɛ gbe nyɛ zo, se mohu i ngɛ munyu tue kɛ ngɛ nyɛ tsɔɔe kaa ye bimɛ nɛ i suɔ. 15Ejakaa ke nyɛ ngɛ nɔ hyɛli akpe-nyɔngma tete ngɛ Kristo mi ɔ, kɛ ɔ pi tsɛmɛ fuu nɛ nyɛ ngɛ. Ejakaa i gu Sane Kpakpa a nɔ kɛ fɔ nyɛ ngɛ Kristo Yesu mi. 16Lɔ ɔ he ɔ, i kpaa nyɛ pɛɛ nɛ nyɛɛ kase mi. 17Enɛ ɔ he hulɔ nɛ i tsɔ Timoteo nɛ ji ye suɔmi bi kɛ anɔkualetsɛ ngɛ Nyɔmtsɛ ɔ mi ɔ nyɛ ngɔ ɔ nɛ; e ma kae nyɛ bɔ nɛ i baa ye je mi haa ngɛ Kristo mi, kaa bɔ nɛ i tsɔɔ ngɛ asafo tsuaa asafo mi, ngɛ he tsuaa he ɔ.
18Se akɛnɛ nyɛ ti ni komɛ susu kaa i be nyɛ ngɔ bae he je ɔ, a wo a he nɔ. 19Ke Nyɔmtsɛ ɔ suɔ ɔ, e be kɛe nɛ ma ba nyɛ ngɔ nɛ ma ba na ninɛmɛ nɛ woɔ a he nɔ ɔmɛ a he wami, se pi a munyu. 20Ejakaa tsa pi munyu mi nɛ Mawu matsɛ yemi ɔ ngɛ, se mohu he wami mi. 21Kɛ nyɛ ngɛ lɛ hlae kɛɛ? Ma hɛɛ tso kɛ ba nyɛ ngɔ, aloo ma ba ngɛ suɔmi kɛ mi mi jɔmi mumi mi?
Currently Selected:
1 Korintobi 4: DAN77
Highlight
Copy
Compare
Share
Want to have your highlights saved across all your devices? Sign up or sign in
Dangme New Testament © United Bible Societies, 1977.
