FILIPENSES 3
3
Ekmámnaksoho agko' meyke ekhémo
1Elyáxeg selásekhayo, kalpayhekxa' kélwáxok kéxegke eñama kélteme kélyepetcheyo Wese' egegkok. Meheleklágwomek ko'o sektáxéseso kéxegke m'a sektahakxa axta sektáxéseso, yakwayam kapasmok akke kéxegke xa. 2Kóláwho sat kéxegke m'a énxet aphésamo nak aptémakxa semheg, cham'a énxet'ák apkeláneykegko nak apkeltémakxa ekmaso, cham'a énxet'ák apkelyenyekheykencha'awol'a egyempehek. 3Hakte negko'o nenteme m'a ekmámnaksoho sẽlkahaso kélyenyekhamol'a egyempehek,#Jer 4.4; Ro 2.28-29; Gá 6.14-15; Col 2.11-13. negko'o nelpeykesamol'a cha'a Dios eñama senteméseso m'a Espíritu apagkok nak. Kelpayheykxek nahan egwáxok negko'o nentaha Cristo Jesús énxet'ák apagkok, mantahak cha'a negko'o negáyo m'a kéltemésesamakxal'a cha'a egyempehek. 4Ewanchek eykhe ko'o xa atnehek seyáyo ektémakxa nak elánamáxche xa aksok nak. Méko kawának heyeykhágwomhok ko'o ektémakxa negáyo xa aksok nak: 5hakte ocho ekhem sekteyam axta ko'o selkahasa m'a kélyenyekhamol'a egyempehek, ko'o sekteme señama Israel, eñamak ko'o m'a nepyeseksa nak Benjamín énxet'ák apagkok,#Ro 11.1. ko'o sekteme hebreo, hebreo apketche ko'o. Ekyetlamchek axta eltémókxa nak antehek judíos segánamakxa apagkok, cham'a aptémakxa nak apcháyo énxet'ák fariseos.#Hch 23.6; 26.5. 6Ekyeykhásamáxkók axta sektémakxa ko'o sekmasma xa segánamakxa nak, weykmók axta sekmenxeneykha m'a énxet'ák apkelpeykesamo nak Cristo.#Hch 8.3; 9.1-2; 22.4; 26.9-11. Méko axta kawának hexénchásekxohok masawhomo selané m'a eltémókxa nak antehek segánamakxa. 7Enagkamchek axta ko'o katakmelak xa aksok nak, wánxa agkok, Cristo eyke keñamak sektemésesa ko'o kaxwo' mékoho xa aksok nak. 8Mók sekxeyenma anhan. Maxneyásawok ko'o ekyókxoho aksok sekyetchásawo enxoho m'a ektémakxa nak negyekpelchágwayam Cristo Jesús Wese' ahagkok. Cristo nahan keñamak ekmassa ekyetna ko'o ekyókxoho aksok, máxa apák ektemesásak ko'o ekyókxoho aksok yakwayam enxoho atnehek Cristo énxet apagkok, 9tén han atnehek sekyepetcheyo. Maktámak ko'o yakwayam hexének Dios sektaha sekpéwomo eñama selyaheykekxoho m'a eltémókxa nak antehek segánamakxa, wánxa agkok emenyék ko'o hexének Dios sektaha sekpéwomo eñama sekteme may'áseyam ma'a Cristo; cham'a ektémakxa nak senteméseso nempéwomo Dios eñama magya'áseyam. 10Emenyék eyke eykpelchágwomhok ko'o m'a Cristo, tén han eykpelchágwomhok agko' ma'a ektémakxa axta apmopwána apxátekhágweykmo, tén han hewatámho ko'o m'a ektémakxa axta aplegeykegkoho, tén han kaxhok sétsapma m'a ektahakxa axta apketsapma,#Ro 6.11-13; 8.29; 2 Co 3.18; Gá 4.19. 11yakwayam enxoho ko'o xa helxátekhásók nepyeseksa m'a énxet'ák apkeletsapma axta.
Nelenxáneykmoho yakwayam agwók néxa
12Maxénak ko'o sektwet'a kaxwo' ekyókxoho xa aksok nak, maxénak nahan seltemésesama sekpéwomo; wánxa agkok, elenxanakmók eyke ko'o yakwayam enxoho amok ma'a apma axta apmonye Cristo, hakte Cristo Jesús axta sema apmonye. 13Elyáxeg, maxénaxkohok ahagko' ko'o sekwet'a kaxwo' xa aksok nak; akke ko'o kaxénak ewáxok ma'a aksok ekyetna nak netámen, ekwaskápekxók eyke aksa seltamho awók ekyetnakxa m'a aksok ekyetna nak emonye, 14yakwayam enxoho awomhok néxa, tén han amok ma'a ekyanmaga, cham'a segwónencha'a axta Dios peya hegmések eñama Cristo Jesús.
15Negyókxoho ekyennakwayam nak nenteme magya'áseyam, kéméxchek katnehek elchetamso egwáxok xa ektaha nak, wánxa agkok, yetneyk agkok kéxegke mók ekxénakxa kélwáxok, Dios sat nahan elya'asásegwók kéxegke xa ektéma nak. 16Kéméxchek negko'o agyetlók ektémakxa m'a aksok ekyetnama nak negko'o.
17Elyáxeg kólteme sektémakxa nak ko'o,#1 Co 4.16; 11.1. kóllano nahan apkeltémakxa m'a énxet'ák ektaha nak apkelyetlo nentémakxa negko'o, cham'a negmésa axta kéxegke. 18Hágkaxwe altennaksek kéxegke, eltennásekxók eyke makham yetlo sekwóno, hakte apxámok énxet aptaha apkenmexma m'a Cristo aksok ektegyéso apagkok nak, 19emasesók sat eyke Dios xa énxet'ák nak. Kalánhok cha'a apwáxok ma'a aksok apyespagkamakxa nak, cham'a dios apagkok ma'a. Keyxkohok nahan apkelpeywa exének ma'a aksok eyéméxko neykhe kagkések apkelmegkakto. Wánxa aksa kaxének apwáxok ma'a aksok eleñama nak keso náxop. 20Negko'o eyke nentaha neleñama néten. Nelhaxneyk nahan negko'o exyók Jesucristo Wese' egegkok segmasma apkeñama m'a néten, 21cham'a peya nak hegyakmagkasesek negyókxa ekmaso nak, yakwayam enxoho katnekxak negyókxa m'a ektémakxa nak apyókxa eyeymáxkoho. Elának sat Cristo xa eñama m'a apmopwána nak, cham'a apmopwána ekmowána nak kasawhekxohok eláneykha ekyókxoho aksok.
Currently Selected:
FILIPENSES 3: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
