FILIPENSES 2

Ménnaktésamakpoho Cristo apteme anhan meyke ekhémo

1Cristo agkok apkelwaskakkáseykekxoho kéxegke, mések agkok nahan ektakmelwayam kélwáxok kéxegke m'a ektémakxa nak segásekhayo Cristo, apheyk agkok nahan kélwáxok kéxegke Espíritu, kélya'ásegkok agkok nahan kéxegke ektémakxa m'a negásekhayo nak egmók, tén han ma'a ektémakxa nak apmopyósa anlanok egmók, 2kólteme cha'a ekhémo mók elchetamso kélwáxok kélyókxoho nak, yakwayam enxoho helyánchesesagkohok selméso ko'o ekpayheykekxa ewáxok, kólteme megkólchexeymáxkoho eñama m'a ekhémo nak mók kélásekhamaxkoho, kólteme anhan ekhémo mók kélwáxok, tén han kóltehek ekhémo mók kélwáxok ma'a aksok yakwánxa enxoho kóllána'. 3Nágkóllána aksa xama aksok eñama enxoho m'a kélenmexamaxche nak esenhan ma'a kéleymáxkoho nak, wánxa agkok, kóllána cha'a aksok yetlo megkeymáxkoho kélwáxok. Nágkaxén aksa kélwáxok ektakmela kéltémakxa kéxegke. Kaxén aksa kélwáxok ektakmela apkeltémakxa m'a pók énxet'ák nak. 4Nágkólchetam aksa kélxakko' aksok yakwayam nak kapasmok kélxakko' kélxama enxoho, wánxa agkok, kólchetagkas nahan aksok yakwayam kapasmok ma'a kélnámokkok.

5Katne kéxegkáxa elchetamso kélwáxok ma'a ektémakxa axta elchetamso apwáxok Cristo Jesús.

6Aphawók axta eykhe m'a aptémakxa

nak Dios,#Jn 1.1-3; Col 1.15. axta eyke

elenxáneykmok exnésakpohok Dios,

7-8wánxa agkok apcháxñákxók axta aksa

apwaya keso náxop,

apheyáseykpekxók axta aptémakxal'a

énxet kélásenneykha, apheyásamákpók axta

énxet apteyékmo.

Axta énnaktésamakpohok apagko',

cham'a aphéyáseykpoho axta m'a

aptémakxal'a énxet,

apmatñegkek#Mt 26.39; Jn 10.18; He 5.8. axta eñama

ekha apkelyaheykekxoho, negmegkaktamakxa axta eykhe m'a

ektémakxa axta apmatñama néten aksok ektegyéso.

9Ekeso eñamakxa apmésa nak Dios yakwayam

etnehek néten agko' meyke ekhémo,

aptemésesek axta nahan#He 2.9; 12.2. ektakmela agko' apwesey

neyseksa m'a ekxámokxoho kélwesey nak.

10Yakwayam enxoho eltekxeyagkok aptapnák apyókxoho

ektaha nak apheykha néten, tén han keso náxop,

tén han ma'a elmaheykegkaxa nak eghagák

Jesús apwesey eñamakxa ekteme ektakmela agko',

11yakwayam enxoho anhan elya'ásegwomhok#Is 45.23.

apyókxoho énxet aptaha Jesucristo Wese',

yakwayam enxoho kóltemésesek

apcheymákpoho Dios Egyap.

Enxet'ák apkelyetleykekxa Cristo apteme elseyexma keso náxop

12Elyáxeg selásekhayo, kólyánchesagkoho kélteme kélyaheykekxoho sekpeywa keso sekha nak makhawo' kélhágkaxa kéxegke, ekhawo ektémakxa axta cha'a kélyaheykekxoho sekpeywa sekha enxoho kélnepyeseksa kéxegke. Nágkólyensem ekxéneykha kélwáxok kéxegke m'a ektémakxa nak kélwagkásamáxche teyp, kólteme yetlo kéláyo agko'. 13Hakte Dios aptaha aptekkeseso kéxegke m'a kélmámenyého nak kóllának kéltémakxa ektakmela, aptaha nak han appasmo kéxegke yakwayam kólsawhohok kélteme kélyaheykekxoho m'a ektémakxa nak apmopmenyého.

14Kóllána ekyókxoho aksok yetlo meyke kélpakmeteykha, tén han meyke kélxamáseyak kélpeywa, 15yakwayam enxoho megkataxchék ekyetna kéxegke kélsexnánemaxche tén han eyesógwayam kéllané xama aksok enxoho. Kólteme kéxegke Dios apketchek meyke elenchahamaxche kéltémakxa nepyeseksa xa énxet'ák elmasagcha'a nak apkeltémakxa, cham'a apkelxegányam nak.#Dt 32.5. Máxa yaw'a kéltahak kélápogwata kéxegke nepyeseksa xa énxet'ák nak, keso náxop ekyaktésamakxa nak exma, 16hakte kéltekkáseyha kéxegke amya'a kélxena m'a amya'a ekyennaktésamo nak egnenyek. Kapayhekxak sat ko'o ewáxok kéxegke eñamakxa, hakte ay'asagkohok sat ko'o megkatnama eyakhémo m'a ektémakxa nak ko'o selteyásamáxche, tén han ma'a ektémakxa nak sektamheykha, cham'a apwakto sat Cristo. 17Kayegkenaxchek eykhe ko'o éma ahagkok yakwayam kasawhaxkohok ma'a ektémakxa nak kéxegke kélméso aksok Dios eñama m'a megkólya'áseyam nak, kapayhekxak akke aksa ko'o ewáxok, kawakxohok nahan kélyókxoho kéxegke ektahakxa enxoho ekpayheykekxa ewáxok ko'o. 18kalpayhekxa' kéxegkáxa kélwáxok, kawakxoho nahan kéxegkáxa s'e ektémakxa nak ko'o ekpayheykekxa ewáxok.

Timoteo tén han Epafrodito

19Apkeltamhok sat agkok Wese' egegkok Jesús, wáphaksek sat heykxa Timoteo#Hch 16.1-3. kélhágkaxa kéxegke, yakwayam enxoho kapayhekxak ewáxok sekleg'a enxoho amya'a ektémakxa kélha kéxegke. 20Hakte maték ko'o pók énxet elchetamso apwáxok ektémakxa nak ko'o elchetamso ewáxok, cham'a ekmámnaksoho nak ekxéneykha apwáxok yakwayam epasmok kéxegke. 21Apyókxoho énxet apketámak ma'a aksok apagkok apagko' nak, mektámak ma'a aksok eñama nak Jesucristo. 22Kélya'ásegkok eyke kaxwo' kéxegke m'a ektémakxa nak aptakmelchásamákpoho Timoteo, kélya'ásegkok nahan ma'a ektémakxa nak sepasmeykha sektamheykha yakwayam ampasmok ma'a ektémakxa nak kéltenneykha tásek amya'a, máxa hatte ektemék sepasmeykencha'a sektamheykha. 23Emenyék ko'o wáphaksek Timoteo kélhágkaxa kéxegke, cham'a sekya'ásegwokmo enxoho yakwánxa hetnehek ko'o. 24May'ásekmok nahan ko'o Wese' egegkok peya kañehémhok sekmeyeykekxa ko'o xa kélhágkaxa nak kéxegke.

25Xénchek nahan ko'o ewáxok wáphaksek kélhágkaxa kéxegke egyáxeg Epafrodito aptaha nak sekxegexma sektamheykha, aptaha nak han sennapmáxkoho xamo', cham'a kéláphaso axta kéxegke yakwayam hepasmok hegkések ma'a aksok eyéméxchexa nak ko'o. 26Awanhek apmopmenyého elwetekxak kélyókxoho kéxegke xa egyáxeg nak, yetnakha'awók nahan apwáxok, hakte kéllegayak hek kéxegke amya'a apháxamákpo. 27Nakso' axta apháxekpo, xegkásawók axta yetsapok; Dios axta eyke apkemleykxohok xa egyáxeg nak, háwe axta apwánxa apagkok apkemleykxoho Dios xa egyáxeg nak, ko'o axta anhan eyemleykxoho, yakwayam enxoho megkayágwomok selapwayam ko'o. 28Ekeso eñamakxa sekpekheyásawo nak seyáphaso kélhágkaxa kéxegke xa egyáxeg Epafrodito, yakwayam enxoho kalpayhekxak kélwáxok kéxegke kélwetákxo enxoho makham, yakwayam enxoho kasextohok selapwayam ko'o. 29Kóláhapmakha sat yetlo ekpayheykekxa kélwáxok nentémakxal'a anlának egyáxeg nentémo xamo' nak magya'áseyam Wese' egegkok. Kalkoho cha'a kélwáxok kólwetak kéxegke m'a énxet'ák ekhawo nak aptémakxa Epafrodito, 30hakte xegkásawók axta yetsapok eñama apkelané aptamheykha eñama nak Cristo. Axta yeyásak apyókxa eyesagkexa sepasma ko'o, cham'a megkólewagko axta kóllának kéxegke.

Currently Selected:

FILIPENSES 2: LEGN

Highlight

Copy

Compare