HEBREOS 10

1Wánxa axta ekyetchesamaxkoho Moisés segánamakxa apagkok ma'a aksok eltakmela peya nak kalwa', háwe m'a ekmámnaksoho negwetél'a. Ekeso eñamakxa megkawagko nak katnésesek apkelpéwomo énxet'ák xa segánamakxa eñama nak Moisés, cham'a énxet'ák ektaha nak apkelya'eykekxa cha'a Dios yókxoho apyeyam yakwayam egkések aksok ektekyawa, cham'a aptémakxal'a cha'a egkések aksok Dios. 2Nakso' axta agkok eyewagko hegmasésesek ektémakxa mólya'asáxma xa segánamakxa nak, megkaxének axta apwáxok aptaha apkelsexnánemap énxet'ák, kamaskok axta nahan apkelmésa aksok kélnaktóso ektekyawa Dios xa énxet'ák nak. 3Kaxénchesekxohok cha'a egwáxok ektémakxa nenlané mólya'asáxma yókxoho apyeyam xa aksok kélnaktóso ektekyawa kélméso nak Dios, 4hakte yawanchek kalkok mólya'asáxma m'a weyke kennawók étkok éma agkok nak, tén han ma'a yát'ay apketkók éma apagkok nak.

5Xama axta apwa'a Cristo keso náxop, aptahak axta apcháneya Dios se'e:

“Mopmenyék xép kólmések

ma'a aksok kélnaktóso ektekyawa nak,

tén han megkapmenyého kólmések

ma'a aksok kélméso naksa nak,

wánxa agkok, egkések axta exchep se'e

ektémakxa nak sekyókxa.

6Megkapeykásekxék cha'a exchep apwáxok

aksok ektekyawa ekwatnamáxche nak,

tén han ma'a aksok kélméso naksa nak xép

yakwayam kamaseksek mólya'asáxma.

7Ektahak ko'o sekpeywa s'e: ‘Keso sekha ko'o s'e, yakwayam alának xép apmopmenyého Oh Dios,#Sal 40.66-8. ekhawo m'a ektémakxa nak eknaktáxésamaxche weykcha'áhak sekxénamaxko ko'o.’ ” 8Apxénchek axta sekxo' Cristo megkapeykesáseykekxoho apwáxok Dios ma'a aksok kélnaktóso ektekyawa nak, tén han ma'a aksok nawha'ák kélméso naksa nak, tén han apxéna megkapmenyého Dios ma'a aksok kélnaktóso ekwatnamáxche nak yakwayam kamaseksek mólya'asáxma, segánamakxa eykhe eltémo kalanaxchek xa ektaha nak. 9Apyepetchesekmók axta nahan apxeyenma Cristo s'e: “Ekxegakmek ko'o yakwayam alának xép apmopmenyého.” Hakte apmasések Dios ma'a ektémakxa axta kélméso aksok kélnaktóso ektekyawa kélmeykegkoho axta cha'a nano', keñe appekkenákxo axnagkok ektaha ekyakmagkaso xa nano' nak. 10Entemésesek axta negko'o Dios nelpagkanamaxche hakte apkelanak axta Jesucristo m'a Dios apmopmenyého, cham'a apmeyáseykpoho axta apagko' yakwayam emátog wánxa xama, meyke teyp.

11Elanagkok cha'a apkeltamheykha ekyókxoho ekhem ma'a apyókxoho judíos ektaha nak appasmo apkelmaxnéseso Dios énxet'ák apagkok, apkelenxanakmók nahan apmeyáseykekxoho cha'a Dios ma'a aksok kélnaktóso ektekyawa ekhawo m'a aptamheykegkaxa nak cha'a, neyseksók eykhe megkamowána kamaseksek nentémakxa mólya'asáxma xa aptamheykegkaxa nak.#Ex 29.38. 12Wánxa agkok, xama apmeyásamákpekxoho apagko' axta eyke Jesucristo m'a Dios, meyke teyp, keñe axta aphákxo m'a ekpayhókxa nak apkelya'asamakxa Dios, 13cham'a apkeleyxwákxexa nak yakwayam enegkenchesek Dios kóneg apmagkok#Sal 110.1. ekyókxoho apkelenmexma, 14aptemésesek axta anhan Cristo apkelpéwomo énxet'ák ektaha axta kélteméseso apkelpagkanamap, eñama m'a wánxa xama apmeyásamákpekxoho apagko' axta Dios, meyke teyp. 15Espíritu Santo eyke senxekmóso ektaha ekmámnaksoho xa, cham'a aptaha axta appeywa s'e:

16“Sat katnehek seláneso ekhémo mók

nelpakhetchásamáxkoho énxet'ák se'e ektaha nak,

cham'a egmonye sat, aptahak Wese' egegkok:

Apekkenchesek sat ko'o apwáxók

seltémókxa etnahagkok xa énxet'ák nak,

atáxésesek sat nahan apwáxók.#Jer 31.33.

17Megkaxénwakxók sat ewáxok apkeltémakxa nak melya'asáxma, tén han ma'a apkeltémakxa elmasagcha'a nak.”#Jer 31.34. 18Kamaskok sat kélámenyého kólmések Dios aksok kélnaktóso ektekyawa, cham'a megkólyakmagkáseykxo enxoho nentémakxa mólya'asáxma.

Kéméxchek agyo'ókxak Dios

19Elyáxeg egwanchek kaxwo' ólántexek kañe' tegma appagkanamap ekpagkanamaxchexa agko' nak, yetlo megkatnaheykha egwáxok, eñama m'a Jesucristo éma apagkok, 20enlánések axta negko'o ámay axnagkok ekyennaktésamo nak egnenyek, cham'a segmeykesesa axta Cristo apyeyk'a m'a apáwa apyexnama axta neyseksa, cham'a apyenyawa axta apyókxa. 21Jesús apteme apkemha apmonye egagkok appasmo apkelmaxnéseso Dios énxet'ák apagkok, aptaha nak han apkelmeykha Dios énxet'ák apagkok; 22Ekeso eñamakxa eyéméxko nak agyo'ókxak Dios yetlo ektakmalma elchetamso egwáxok tén han antehek ekmámnaksoho nenteme magya'áseyam, yetlo m'a megkaxénweykekxoho nak egwáxok ekyetna nensexnánemaxche, tén han yetlo m'a sẽlteméseso nak negáxñeyo eñama sẽlyakpáseso yegmen ektakmela agko' nak.#Lv 8.30; Ez 36.25. 23Olwaskápekxohok hana neyseksa ektémakxa nak nelhaxneykha meyke negya'áseyam xama enxoho, cham'a magya'áseyam nenxeyenma nak ekyetna negko'o, hakte elának sat Dios ma'a ektémakxa axta sempekkencháseykekxa appeywa. 24Antegyaha hana ektémakxa yakwánxa antehek ólpasmaxkohok negko'o, yakwayam enxoho kayágwomhok ekyetna negko'o nelásekhamaxkoho, tén han kayágwomhok nenlané m'a aksok eltakmela nak. 25Magyensemek hana nentaxnegweykekxa m'a negakneykekxexa nak, mantehek ma'a aptamheykegkaxa nak nápakha énxet'ák melántaxnegweykekxa nak cha'a, wánxa agkok, tásek ólyáteyaxkohok negko'o hakte negwet'ak eyágketwokmo apweyktamxa Wese' egegkok.

26Nenlenxanakmók agkok negmáheyo anlának mólya'asáxma natámen negya'ásegwayam enxoho m'a amya'a ekmámnaksoho nak, kamaskok ekyetna m'a yakwayam nak kamaseksek mólya'asáxma 27wánxa aksa henleyxek ma'a sẽlyekpelchásesamo ekmaso agko' nak, tén han ma'a táxa ekmexanma peya nak kamasésók apyókxoho ektaha nak apkelenmexma Dios.#Is 26.11. 28Axta agkok cha'a elyahákxohok énxet segánamakxa eñama nak Moisés, kólakhekxohok axta cha'a meyke apmopyósa kólano',#Dt 17.6; 19.15. cham'a apyetna enxoho apkánet énxet ektaha apweteykegkoho, esenhan ma'a apkántanxo enxoho. 29¿Yagkaxénak kélwáxok kéxegke peya kayeykhágwomhok kéllegasáseykegkoho ekyentaxno agko' ma'a ektaha nak apwanyeykha Dios Apketche, cham'a aptaknagko nak Cristo éma apagkok, tén han ma'a apyemneykha nak Dios Espíritu apagkok, cham'a Dios aptaha nak apkelásekhayo xa énxet'ák nak? Hakte cháxa ektaha nak ekteméseso ekmámnaksoho nelpakhetchásamáxkoho Dios xa Cristo éma apagkok nak,#Ex 24.8; He 13.20. cháxa ektaha nak han ekteméseso apkelpagkanamap énxet xa. 30Negya'ásegkok eyke negko'o aptéma appeywa Wese' egegkok se'e: “Ko'o epayhawok axnéshok mók apkeltémakxa xa énxet'ák nak, ko'o sat ayakmagkásekxak.”#Dt 32.35. Aptemegkek nahan appeywa s'e: “Elyekpelkohok sat Wese' egegkok ma'a ektaha nak énxet'ák apagkok.”#Dt 32.36. 31¡Megkatnehek magaye segma enxoho Dios!

32Wánxa agkok, kaxén kélwáxok kéxegke m'a nano' axta, cham'a sekxo' axta kélxawáya elseyexma, kélenmáxamáxkók axta kéxegke yetlo kélwaskápeykekxoho kéllegeykegkoho eñama m'a kélenxáneykmoho kélagko' axta. 33kélwanyeykha axta kélnápakha kéxegke nápakta'awo' énxet'ák, sagkek axta nahan kéltemésesamakxa kéxegke, keñe axta kélnápakha kéxegke appaxkeykxo m'a énxet'ák ektéma axta kélnaktawáseykegkoho xa ektaha nak. 34Apyósekak axta kéllanyo kéxegke m'a énxet'ák apheykha axta sẽlpextétamakxa, yetlo ekpayheykekxa kélwáxok axta anhan kél'awók kélyementama aksok kélagkok, hakte kélya'ásegkok kéxegke ekyetna aksok ektakmela agko' ma'a néten, ektaha nak han megkamassegwayam. 35Nágkólyensem aksa m'a ektémakxa nak megkólya'áseyam kéxegke, hakte sat kañék ekméso kéxegke aksok kélxawé naksa xa, ektaha nak ektakmela agko'. 36Kéméxchek kéxegke kólwaskápekxohok neyseksa kéllegeykegkoho, yakwayam enxoho kóllának ma'a ektaha nak Dios apmopmenyého, yakwayam enxoho nahan kólxawak ma'a apxeyenma axta egkések kéxegke Dios. 37Hakte temegkek eknaktáxésamaxche s'e:

“Yahamók agko' sat ewatak ma'a peya nak ewata',

epekhaksohok sat ewata'.

38Enxet ahagkok apteme nak appéwomo,

megyetsepek sat cha'a,

eñama apteme mey'áseyam,

massegwokmek agkok apteme seyáyo xa énxet nak,

mehepeykesásekxék sat ko'o ewáxok.”#Hab 2.3-4.

39Háwe negko'o neleñama nepyeseksa m'a énxet'ák apkelyenseykmo nak apteme apcháyo Dios, cham'a apkelmahágko nak yakwánxa kólmasesók, akke negko'o nelxegexma'a m'a énxet'ák peya nak elwagkasakpok teyp eñama apteme melya'áseyam.

Currently Selected:

HEBREOS 10: LEGN

Highlight

Copy

Compare