HEBREOS 1

Ẽlpakhetchesegkek axta negko'o Dios eñama m'a Apketche

1Xámok axta ektémakxa apkelpakhetcheso Dios ẽlyepmeyk nano', cham'a nano' axta, eñama apkeltenneykha m'a énxet'ák apkellegaso axta Dios appeywa. 2Kaxwo' eyke keso negwánxa nak, eyágketwokmo nak ektemegwánxa néxa ekhem, ẽlpakhetchesek negko'o Dios eñama m'a Apketche nak appeywa, hakte Cristo axta keñamak apkeláneya Dios ekxámokxoho aksok, cham'a Cristo, appagkanchesa nak Dios yakwayam elmeyásekxak ekyókxoho aksok. 3Cristo keñamak ekwetamaxko m'a ektémakxa nak apcheymákpoho Dios, hakte aphawók apagko' Cristo m'a Dios, aptaha nak han appasmo ekyókxoho aksok yetlo m'a appeywa ekha nak ekmowána.#Jn 1.1-3; Col 1.15-17. Aphákxek axta néten ekpayhókxa nak nelya'asamakxa nekha Dios aptaháno, cham'a, natámen axta segmaséseso nentémakxa mólya'asáxma.

Dios Apketche apteme néten nepyeseksa Dios apkelásenneykha

4Aptemék axta néten Dios Apketche nepyeseksa Dios apkelásenneykha, hakte apxakak axta ektakmela agko' apwesey megkaxnawok ma'a ektémakxa nak apkelwesey Dios apkelásenneykha. 5Hakte metnék yának Dios xama apchásenneykha s'e:

“Xép apteme hatte;

ektemék kaxwo' xép hatte.”#Sal 2.7.

Metnék nahan appeywa Dios exének xama apchásenneykha s'e:

“Apyap sat hetnehek ko'o m'a,

keñe sat etnehek hatte ko'o m'a.”#2 S 7.14; 1 Cr 17.13.

6Xama axta apcháphasa apkemha apmonye Apketche Dios keso náxop, aptahak axta anhan appeywa s'e:

“Apyókxoho Dios apkelásenneykha sat elpeykeshok.”#Dt 32.43; Sal 97.7. 7Aptahak axta anhan Dios apxéna apkelásenneykha s'e:

“Aptemésesek cha'a Dios ekhó exchahayam ma'a

apkelásenneykha nak,

keñe m'a ektaha nak apkelapháseykha#Sal 104.4.

aptemésesa ekhó táxa elálewel'a.”

8Keñe axta aptaha Dios apxéna Apketche s'e:

“Xép Dios apteme Wese' apwányam megkatnegwayam enéxa,

apteme nahan ektakmalma apkelmeykha énxet'ák apagkok.

9Apchásekha'awók cha'a exchep ma'a aksok ektakmela nak,

aptaknókek cha'a exchep ma'a aksok ekmaso nak.

Ekeso eñamakxa apkelyéseyncha'a axta exchep Dios,

xép Dios apagkok,

apyanchesásók agko' axta anhan

apméso ekpayheykekxa apwáxok

axta kaxnawok ma'a apkelxegexma'a nak.”#Sal 45.6-7.

10Aptahak axta nahan appeywa Dios se'e:

“Xép Wese' ahagkok,

xép axta apkelané xóp sekxo' agko';

xép axta anhan apkelané néten.

11Kalmassegwok sat eyke ekyókxoho xa,

wánxa agkok, memassegwomek eyke cha'a exchep.

Apák sat nahan katnahagkok ekyókxoho xa

ektémol'a apáwa etnehek aphápak;

12sat etnehek eyaksásekxak xép xóp ma'a

nentémakxal'a agyaksásekxak negaklamaxche,

eyakmagkasesek sat ektémakxa,

nentémol'a agyakmagkasek nentaxno.

Meyakmagkasemek eyke cha'a aptémakxa exchep,

megkamassegwomek sat nahan ma'a

ektémakxa nak apyennakte.”#Sal 102.25-27.

13Metnék yának Dios xama apchásenneykha s'e:

“Exa nehekha ko'o ekpayhókxa nak selya'asamakxa,

ekwokmoho seknegkenchesa kóneg apmagkok xép

ma'a apkelenmexma nak.”#Sal 110.1.

14Hakte apyókxoho Dios apkelásenneykha apteme apkeleñamakxa apagko' ma'a néten, yakwayam enxoho elyahakxohok Dios, kóláphaksohok nahan cha'a yakwayam epasmok ma'a énxet'ák ektaha nak kélpagkancheso yakwayam elwagkasakpok teyp.

Currently Selected:

HEBREOS 1: LEGN

Highlight

Copy

Compare