LOS HECHOS 10
10
Pedro tén han Cornelio
1Apheyk axta xama énxet apwesey Cornelio m'a tegma apwányam Cesarea, sẽlpextétamo apwese' axta m'a, aptaha axta apkeláneykha nápakha sẽlpextétamo kéltéma axta apkeleñama Italia. 2Appéwomo axta nápakto' Dios xa énxet nak, elpeykeshok axta cha'a Dios yetlo m'a ekyókxoho ekheykha nak apxagkok. Awanhek axta anhan cha'a katnehek apméso selyakye yakwayam epasmok ma'a énxet'ák judíos, etnohok axta nahan cha'a nempeywa nelmaxnagko. 3Xama ekhem axta apwet'a aksok kélxekmósamo Cornelio, las tres taxnamla'a.
Tásók agko' axta apweté xama Dios apchásenneykha aptaxnegwokmo m'a aphamakxa axta Cornelio. Aptahak axta apcháneya s'e: “¡Cornelio!” 4Apkelanawók axta Cornelio m'a Dios apchásenneykha nak. Yetlo apkeye axta anhan aptaha apkelmaxneyeyncha'a s'e: “Wese', ¿yaksak amya'a apsokmo?” Aptahak axta apcháneya Dios apchásenneykha s'e: “Megkalwagkágweykmok Dios apteme nak cha'a exchep nempeywa nelmaxnagko, tén han ma'a aptémakxa nak cha'a yakwayam epasmok énxet'ák ekha nak eyéméxchexa aksok. 5Eláphés sat énxet ma'a tegma apwányam Jope, yakwayam enxoho yának exegmak Simón se'e, cham'a apkeltamhomakpo nak han Pedro. 6Aphak apxagkok ma'a pók Simón, aptaha nak apkelané aksok empe'ék, apha nak ma'a nekha wátsam ekwányam.”
7Xama axta aptakháwo Dios apchásenneykha, cham'a appakhetchesa axta Cornelio, apkelwóneyha axta Cornelio apkánet apkelásenneykha tén han xama sẽlpextétamo, cham'a aptaha axta apcháyo Dios, ektaha axta anhan apcháyókxa Cornelio. 8Apkeláphásek axta tegma apwányam Jope natámen apkeltennáseykha ekyókxoho m'a ektahakxa axta.
9Mók ekhem axta entahak, yetseksókhem axta m'a, cham'a neyseksa apkelxega axta apchágketchesekmo tegma apwányam Jope xa apkántanxo nak, apkenátweykxeyk axta Pedro tegma néten yakwayam etnehek nempeywa nelmaxnagko. 10Meyk axta enchakhak Pedro, apmokók axta etwok apto. Keñe axta apwet'a xama aksok kélxekmósamo neyseksa kélláneso apto. 11Apwet'ak axta ekmayhekxo néten, keñe axta apweywento xama apáwa, hawók nápakha napwe'ek axta kélnakteté. 12Lanawók axta mók ektémakxa aksok nawha'ák kañe' apáwa, cham'a aksok hawók nekha amagkok nak, tén han ma'a aksok nawha'ák ekhó nak yéwa, tén han ma'a náta. 13Apleg'ak axta anhan ektaha amya'a apcháneyákpo s'e: “Etnamha Pedro, ennahap, etwok sat.”
14Aptahak axta apchátegmowágko Pedro s'e: “Wese', matók ahagko' ko'o xa aksok nawha'ák elmanyása nak, tén han ma'a mantamakxa nak.” 15Entahak axta makham amya'a apcháneyákpo Pedro s'e: “Ná elteméses aksa ekmanyása Dios apteméseso nak negmowána antók.”
16Cháxa ektahakxa axta antanxo apxawé amya'a Pedro xa, keñe axta aptakháwo makham apáwa m'a néten. 17Yetnakha'awók axta apwáxok Pedro ekxéna apwáxok ma'a ektahakxa exchek aksok kélxekmósamo, keñe axta apkelwa'a apkánet énxet nekha átog Cornelio apkelásenneykha, cham'a apmáheyo axta elmaxneyha ekpayhókxa Simón apxagkok. 18Xama axta apkelwokmo m'a, apya'ásek axta apkelpeywa kañe' tegma apkeltamho elya'asagkohok apheyk kexaha Simón ma'a, apkeltamhomakpo nak han Pedro.
19Appakhetchesek axta Espíritu Santo Pedro neyseksa elchetagkaso apwáxok ma'a ektahakxa exchek aksok kélxekmóso. Aptahak axta apcháneya s'e: “Elano, apkántanxo énxet apketámak xép. 20Etnamha, etyep náxop, elyetlakxa' yetlo meyke ektamheykha apwáxok xa énxet'ák nak, hakte ko'o exchek seláphaso.”
21Aptekkek axta náxop Pedro. Aptahak axta nahan apkeláneya énxet'ák se'e:
—Ko'o m'a kélchetama nak kéxegke; ¿yaksak ektaha kélxegakmo nak?
22Aptahak axta apkelátegmowágko s'e:
—Nelxegakmek negko'o eñama sẽláphaso m'a Cornelio aptaha nak sẽlpextétamo apwese', aptaha nak énxet appéwomo. Elpeykeshok nahan Dios, cham'a ekleklamo nak apwáxok apyókxoho énxet'ák judíos ma'a, apmenyék apagko' nahan. Xama Dios apchásenneykha axta appakhetchásak, apkeltamho yáneyha exchep, yakwayam enxoho emhagkok xép apxagkok ma'a sẽlpextétamo apwese' nak, yakwayam enxoho eñak yakwánxa etnehek yának xép ma'a.
23Keñe axta apkelántaxnésa Pedro xa énxet'ák nak. Apnakteyenwokmek axta anhan ma'a aphakxa axta Pedro. Mók ekhem axta entahak apkelyetlákxo Pedro xa énxet'ák nak, cham'a apkeltakháwo axta. Apkelyetlókek axta anhan nápakha énxet'ák apkeleñama Jope. Melya'áseyam Jesús axta anhan ma'a.
24Mók ekhem axta entahak apkelwákxo m'a tegma apwányam Cesarea, cham'a apkelhaxnakxa axta Cornelio yetlo apteme apnámokkok, tén han ma'a énxet'ák apkelásekhayókxa nak. 25Xama axta apwokmo Pedro xa tegma nak, aptekkek axta Cornelio apkelanyexagko, apkeltekxekwokmek axta aptapnák xóp apkenmágkaxa Pedro apmoko elpeykeshok. 26Wánxa agkok, aptahak axta apcháneya Pedro apkempáseykxo néten se'e:
—Etnamha, énxet nahan ko'o xa, ekhawo ko'o exchep.
27Neyseksa apkelpakhetchásamap axta aptaxna Pedro kañe' tegma. Apwetágwokmek axta apchaknákxo énxet apxámokma m'a. 28Aptahak axta apkeláneya Pedro s'e:
—Kélya'ásegkok kéxegke megkahayo xama judío épetchaha pók énxet ma'a ektémakxa nak apcháyo. Mopwanchek nahan etxek apxagkok. Wánxa agkok, exekmósek axta eyke ko'o Dios yakwayam maxének ekmaso émók esenhan altemésesek ekmanyása m'a aptémakxa enxoho. 29Ekeso eñamakxa sekxegakmo axta ko'o yetlo meyke ekxénakxa ewáxok, cham'a seltennasakxa axta. Eltamhok ay'asagkohok yaksak ektaha seláneyeyncha'a nak.
30Aptahak axta apchátegmowágko Cornelio s'e:
—Hawók nekha ekhem egwokmok, sektaha axta ko'o nempeywa nelmaxnagko s'e exagkok, taxnam axta m'a keso ekwánxa nak hora, exekmowásekpók axta ko'o xama énxet apkelyenma axta aptaxno. 31Aptahak axta seyáneya s'e: ‘Cornelio, apleg'awók Dios xép apkelmaxnagko, megkalwagkakmok nahan Dios aptémakxa nak cha'a appasmo m'a énxet ekha nak eyéméxchexa aksok. 32Eláphés énxet ma'a Jope yakwayam enxoho yának exegmak Simón apkeltamhomakpo nak han Pedro, aphak ma'a pók Simón apxagkok, aptaha nak aksok empe'ék apkelané, apha nak nekha wátsam ekwányam.’ 33Ekeso eñamakxa seláphasa axta ko'o xa énxet'ák nak, yakwayam ektamok xép, ektakmelakxoho agko' apxegakmo exchep. Kaxwo', negháha negyókxoho s'e nápakto' Dios. Egmenyék ageyxhok negko'o ekyókxoho m'a apkeltamho axta Wese' egegkok hẽltennaksek negko'o exchep.
Pedro apkeltenneykha Cornelio apxagkok
34Aptahak axta apkeltenneyncha'a Pedro s'e:
—Ekya'ásegkok kaxwo' ko'o aptemésesama Dios meyeykhamap pók énxet,#Dt 10.17. 35Metakheksók Dios ma'a pók énxet'ák ektaha nak apcháyo, tén han ma'a apkelané nak ekpayhawo nak anlának. 36Apkelpakhetchesek axta Dios Israel aptawan'ák neptámen, apkeltennásek axta amya'a meyke ektahakxa egwáxok eñama nak Jesucristo, aptaha nak Wese' meyke ekhémo negyeseksa negko'o. 37Kélya'ásegkok kéxegke ektémakxa axta ekyókxoho yókxexma énxet'ák judíos apchókxa, Galilea axta eyeynókxa, cham'a, natámen axta apkeltenneykha Juan apxeyenma ekpayhawo kólyakpásesagkok yegmen énxet. 38Kélya'ásegkok kéxegke apmésama axta ekyawe agko' apmopwána Dios ma'a Jesús apkeñama nak Nazaret, tén han apmésama m'a Espíritu Santo. Kélya'ásegkok nahan ma'a apkeláneya axta cha'a Jesús ektakmela aptamheykha, apkeltakmelcheseykmek axta m'a apyókxoho énxet eknaktawáseykegkoho axta kelyekhama'. Apwanchek axta apkelana Jesús xa, hakte apxegexma axta aptemék Dios. 39Negko'o eyke nentaha negweteykegkoho ekyókxoho aksok apkelané axta Jesús ma'a yókxexma Judea, tén han ma'a tegma apwányam Jerusalén. Keñe axta apmatña, aksok ektegyéso axta kélyepetchásak. 40Wánxa agkok, Dios axta eyke apxátekhásekmok ekwokmo axta antanxo ekhem. Enxekmowásekxók axta nahan negko'o Dios ma'a Jesús. 41Axta eyke exekmowáseykpekxohok Jesús ma'a apyókxoho énxet'ák nak. Negko'o axta eyke enxekmowáseykpekxohok, nentaha nak Dios sẽlyeyseykha nano' agko', yakwayam antehek negweteykegkoho xa. Nentokók axta negko'o nento xamo', natámen apxátekhágwayam Jesús, negyenágkek axta anhan xamo' negyeneyak. 42Ẽláphásek axta negko'o Jesús yakwayam óltennasha énxet'ák apcháphásama Dios yakwayam etnehek apkelyekpelchémo m'a énxet'ák meletsapma nak, tén han ma'a apkeletsapma nak. 43Apyókxoho Dios appeywa apkellegaso axta apxeyenmak Jesús. Apkelxeyenmék axta peya megkólyakmagkásekxék nentémakxa mólya'asáxma nenteme nak magya'áseyam eñama m'a Jesús.
Enxet'ák metnaha nak judíos apkelxaweyak Espíritu Santo
44Apkeltennáha axta makham Pedro m'a apwa'a axta Espíritu Santo apyetseksa'ák apyókxoho énxet ektaha axta apháxenmo apkeltenneykha. 45Pelakkasek axta apkelwet'a m'a énxet'ák judíos melya'áseyam axta Jesús aptaha axta apkelxegexma'a Pedro apkelwokmo m'a, cham'a apkelxawágko axta Espíritu Santo énxet'ák metnaha nak judíos, 46hakte apkelleg'ak axta apkelpakmeta mók ektémakxa apkelpeywa, tén han apkeltemésesa apcheymákpoho Dios. 47Keñe axta aptaha appakmeta Pedro s'e:
—¿Kélwanchek enxeykel'a megkólhok kólyakpásesagkok yegmen xa énxet'ák apkelxawágko nak kaxwo' Espíritu Santo, ekhawo nak han negko'o xa?
48Apkeltamhok axta anhan kólyakpásesagkok yegmen eñama nak Jesucristo apwesey. Keñe axta apkeltamho énxet'ák exnekxak sekxo' yakwatakxoho Pedro.
Currently Selected:
LOS HECHOS 10: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
