1 CORINTIOS 7
7
Ekxénamaxche ektémakxa sẽlyamhopma
1Kaxwo' peyk wátegmowagkok selmaxneyeykha axta kéxegke, cham'a seltáxesesa axta weykcha'áhak. Nakso', tásek eykhe megkalyamhápok énxet; 2Wánxa agkok, kéméxchek eyke etegyek aptáwa xama énxet, keñe nahan kategyek atáwa ma'a kelán'a, hakte yágwokmók kaxwo' ma'a ekmaso nentémakxa nak mansexta. 3Enxet ekha nak aptáwa, hawók nahan ma'a kelán'a ekha nak atáwa, kéméxchek cha'a kólyahakxohok kélmók yakwayam kóllának ma'a nentémakxal'a ekha entáwa. 4Kelán'a ekha nak atáwa, háwe agkok agko' ma'a ekyókxa nak, atáwa eyke ektaha apagkok xa ekyókxa nak, ekhawo nahan ma'a énxet ekha nak aptáwa, háwe apagkok apagko' ma'a apyókxa nak, aptáwa eyke ektaha agkok xa apyókxa nak. 5Ekeso eñamakxa, kólyahakxoho cha'a kélnakteyegka'a, kélmoko enxoho kólának ma'a nentémakxal'a ekha entáwa. Kélwanchek eyke megkólyepetchaha sekxo' kélmók yakwatakxoho, cham'a ekhawo enxoho mók kélpakmeyesma, yakwayam kóltehek nempeywa nelmaxnagko mók xama ekhem. Natámen akke, kéméxchek kólyepetchekxak makham kélmók, hakte kalanaksek katnehek megkólya'asáxma Satanás, eñama megkólenmáxamáxkoho m'a aksok kélyespagko nak.
6Eltennásek ko'o kélewagko kóllának xa, ektahakxa nak elchetamso ewáxok, háwe eyke m'a seltémo ahagko' enxoho kóllának. 7Xénchek ko'o ewáxok ektakmela etnehek apyókxoho énxet sektémakxa nak ko'o; wánxa agkok, apmések axta eyke Dios megkaxnémo mók ektémakxa apkelmopwancha'a apyókxoho énxet, móktémakxa aksok cha'a apmopwána elának nápakha énxet, keñe nahan ma'a nápakha énxet apkelxawáya mók ektémakxa apkelmopwána eleñama nak Dios.
8Kéxegke meyke kélnakteyegka'a nak, tén han xa tampe' nak, eltennásek ko'o kéxegke ektakmela megkóltegyek kélnakteyegka'a, ekhawo sektémakxa nak ko'o. 9Wánxa agkok, megkólwanchek agkok kelláneykegkoho kéltémakxa kélagko' nak, kóltegye kélnakteyegka'a, ektakmela agko' kóltegyek kélnakteyegka'a yakwayam enxoho megkayekhágwomók agko' kélmáheyo kóllának ma'a aksok kélyespagko nak.
10Kéxegke ekha nak kélnakteyegka'a, eltennásek ko'o kéxegke s'e nelánémaxchexa antehek megkatnaha nak sekpeywa ahagko' ko'o, Wese' egegkok akke keñamak, megkapayhawok kayenyók atáwa kelán'a. 11Yenyókek agkok atáwa kelán'a, kéméxchek megkategyekxék pók énxet, kásekhekxohok aksa makham ma'a atáwa axta. Hawók nahan ma'a énxet, megkatakmelak ényók aptáwa.#Mt 5.32; 19.9; Mr 10.11-12; Lc 16.18.
12Apyókxoho énxet kaxwo' eltennásak ektaha nak sekpeywa ahagko', háwe eñama m'a Wese' egegkok; yetneyk agkok kelán'a aptáwa xama egyáxeg megkatnaha nak megkay'áseyam Cristo, wánxa agkok, kaxének eyke awáxok kalenxanmohok ekyepetcheykha m'a atáwa, megkapayhawok ényók egyáxeg nentémo xamo' magya'áseyam xa kelán'a nak. 13Hawók nahan ma'a kelán'a ekteme nak megkay'áseyam Cristo ekteme enxoho atáwa énxet metné nak mey'áseyam Cristo, wánxa agkok, kaxének eyke apwáxok elenxanmohok apyepetcheykha xa aptáwa nak, megkapayhawok kayenyók kelán'a xa énxet nak. 14Aptáwa kañék kélteméseso appagkanamap nápakto' Dios xa énxet metné nak mey'áseyam Cristo, atáwa nahan kañék kélteméseso ekpagkanamaxche nápakto' Dios xa kelán'a megkatné nak megkay'áseyam Cristo. Axta agkok katnék xa ektaha nak, ekmanyása apkeltémakxa axta etnahagkok kélketchek kéxegke; wánxa agkok, Dios énxet'ák apagkok akke aptamheykegkok kaxwo'. 15Kelenxanakmek agkok kaxpanchesaxchek ma'a ekha nak anakteyegka'a, megkatné nak megkalya'áseyam Cristo, énxet esenhan ma'a kelán'a, kaxpanchesaxchek agkok ma'a. Temék agkok egyáxeg nentémo xamo' magya'áseyam xa ektaha nak, énxet esenhan ma'a kelán'a, méko kalya'aksexma, hakte apkelwóneyha axta kéxegke Dios yakwayam kóltehek meyke ektahakxa kélwáxok. 16¿Háxko ektahakxa ekya'áseykegkoho exche kelán'a ekha nak atáwa, awanchek enxeykel'a kawagkasek teyp atáwa? ¿Háxko ektahakxa apya'áseykegkoho exchep xa, énxet ekha nak aptáwa, apwanchek enxeykel'a ewagkasek teyp aptáwa?
17Enxama cha'a negko'o kéméxchek anlának ma'a ektémakxa enxoho negmowána segméso Wese' egegkok, ekhawo ektahakxa axta segméso Dios, cham'a sẽlwóneykencha'a axta. Cháxa seltémól'a cha'a kalanaxchek ekyókxoho apchakneykekxexa xa. 18Apwóneyha agkok Dios xama énxet ekha nak kélkahaso kélyenyekhamol'a egyempehek, tásek memaseksek ma'a ektémakxa nak ekyetno kélkahaso apyempehek, apwóneyha agkok nahan Dios xama énxet megkólyenyekhásesama axta apyempehek kólkahaksek, megkapayhawok yának kólyenyekhásesek apyempehek kólkahaksek. 19Akke tásek negko'o ólyahakxohok ma'a apkeltémókxa nak antehek Dios, megkeyxek ma'a ekyetna enxoho sẽlkahaso kélyenyekhamol'a egyempehek esenhan ma'a méko enxoho. 20Enxama cha'a kéméxchek antehek ma'a nentémakxa axta sekxo' sẽlwóneykencha'a Dios. 21Neyseksa apteme apmomap axta agkok xép ma'a kélwóneykencha'a axta, nágkatneykha apwáxok; apwet'ak agkok xép kélmáheyo kólyenyekxak, tásek elyentamakpoho. 22Enxet apmomap axta agkok ma'a kélwóneykencha'a axta yakwayam etnehek mey'áseyam Wese' egegkok, etnehek kaxwo' Wese' egegkok apchásenneykha ektémol'a énxet kélyenyeykekxal'a; hawók nahan ektémakxa kélwóneykencha'a axta m'a énxet memomap nak, aptemék kaxwo' apmomap nápakto' Cristo. 23Apkelmeyk axta kéxegke Dios ekha ekyanmaga; nágkólho aksa etnésesek kélmomaxche pok énxet'ák nak. 24Elyáxeg, tásek antehek negyepetcheyo Dios ma'a nentémakxa axta sekxo' sẽlwóneykencha'a.
25Peyk kaxwo' axének ko'o ektémakxa m'a meyke entáwa nak, méko eyke ko'o m'a nelánémaxchexa nak antehek eñama Wese' egegkok ekxeyenma xa, wánxa agkok, altennaksek sat eyke ektahakxa nak elchetamso ewáxok, ektémol'a énxet megkólya'áseyamla'a exének aksok, eñama m'a seyemleykekxoho axta Wese' egegkok. 26Xénchek ko'o ewáxok ektakmela katnehek apha énxet ma'a ektémakxal'a cha'a apha, eñama m'a ekyentaxnamo nak negheykha. 27Yetneyk agkok xép aptáwa, ná eyenyaw aksa; méko agkok nahan xép aptáwa, neytegyaha aksa. 28Kelyamhopchek agkok xép, melanak mey'asáxma; kelyamhopchek agkok nahan xama kelán'a étkok, megkalanak nahan megkay'asáxma. Wánxa agkok, énxet'ák ektaha nak elyamhápeyak étak sat eyesógwayam sentamhomol'a cha'a, cháxa seltamho nak ko'o megkólwetyek kéxegke xa.
29Elyáxeg, akke eltamhok altennaksek kéxegke s'e: Yakwátegwokmek kaxwo' negheykha, ékeso eñamakxa seltamho nak kóltehek máxa meyke kéltáwa; 30Enxet'ák ektaha nak apkexekmósamo ellapwámeyak eñama apketsapma pók, kéméxchek etnahagkok ma'a nentémakxal'a kapayhekxak egwáxok, keñe m'a énxet ektaha nak elpayheykekxa apwáxók kéméxchek etnahagkok ma'a nentémakxal'a anxekmóshok senlapwayam eñama apketsapma egmók; énxet'ák ektahakxa enxoho aptegye aksok ekha ekyanmaga, kéméxchek etnehek máxa megkatnaha enxoho apagkok xa aksok nak. 31Enxet'ák ektahakxa enxoho apkelyanmagkásamap keso náxop kéméxchek etnehek máxa mexámáseyak aksok apagkok, hakte peyk kamassegwók keso náxop, ekhawo ektahakxa nak negwetayo.
32Emenyék ko'o amasésesek kéxegke ektémakxa nak ekyetnakhayo kélwáxok. Enxet ektahakxa enxoho meyke aptáwa ekxéneykha apwáxok aksok eleñama nak Wese' egegkok, kaxénmakha nahan apwáxok yakwánxa etnehek epeykesásekxak apwáxok Wese' egegkok; 33keñe m'a énxet ekha nak aptáwa ekxéneykha apwáxok aksok eleñama nak keso náxop, kaxénmakha nahan apwáxok yakwánxa etnehek epeykesásekxak awáxok aptáwa. 34Cháxa keñamak ektaha ánet ekxénakxa apwáxok énxet xa. Hawók nahan ektémakxa m'a kelán'a apketsapma nak atáwa, tén han ma'a kelán'a megkalyamhopma nak, kaxénmakha awáxok aksok eleñama nak Wese' egegkok, tén han kaxénmakha awáxok yakwayam katnehek ekpagkanchásamáxche wánxa m'a Wese' egegkok, ekyókxa, tén han ekweykmoho ma'a kañók agko' awáxok; keñe m'a kelán'a ekha nak atáwa, kaxénmakha awáxok ma'a aksok eleñama nak keso náxop, tén han kaxénmakha awáxok yakwánxa katnehek kapeykesásekxak apwáxok atáwa.
35Eltennásek ko'o kéxegke xa, háwe eyke yakwayam amásesagkok yakwánxa nak kóltehek, wánxa agkok, emenyék eyke apasmok kéxegke, yakwayam enxoho kóltehek ma'a ekpayhawo nak antehek, kóllána aksa m'a nentamheykha eñama nak Wese' egegkok meyke mók ekxénakxa kélwáxok.
36Xénchek agkok apwáxok enxama emok appagkanma, apwokmo enxoho nentegyeykxa entáwa, xénchek agkok nahan apwáxok eyéméxko etnehek xa ektaha nak, apwanchek elának ma'a ekxénakxa enxoho apwáxok ekpayhawo etnehek; etegye aptáwa, hakte háwe mólya'asáxma. 37Keñe m'a pok énxet, meyke ekyáteyeykegko enxoho, cham'a meyke enxoho elya'ásekhaxma yakwayam elának apmokókxa enxoho elána', xénchek agkok apwáxok eyámnaksoho metegyék aptáwa, tásek katnehek aptahakxa. 38Apmeyk agkok énxet ma'a ektaha nak appagkanma, tásek katnehek aptahakxa, keñe m'a pók énxet metegye nak aptáwa tások agko' katnehek aptahakxa.
39Kelán'a ekha nak atáwa, keypetkohok atáwa neyseksa apha makham; apketsekkek agkok xa atáwa nak, katnehek meyke elya'ásekhaxma yakwayam kamekxak pok énxet eyámenyéxa enxoho, akke m'a apteme enxoho mey'áseyam Cristo. 40Xénchek eyke ko'o ewáxok kayágwomhok ekpayheykekxa awáxok megkategyákxo enxoho atáwa xa kelán'a nak. Cháxa ektémakxa nak elchetamso ewáxok ko'o xa, apheyk ko'o neyk nahan ko'o xa ewáxok Espíritu apkeñama nak Dios.
Currently Selected:
1 CORINTIOS 7: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
