1 CORINTIOS 5
5
Ekmaso nentémakxa mansexta
1Legáxchek axta amya'a kélxama kéxegke aptamhákxo aptáwa apteme egken.#Dt 22.30. Cháxa ektaha nak magmasexta ekmaso agko' nentémakxa xa, magwetyehek nahan katnehek nepyeseksa énxet'ák melya'áseyak nak Dios xa. 2¡Megkamassak makham eleymáxkoho kélwáxok kéxegke! ¡Tásek eykhe kalánhok kélwáxok ellapwámeyak! Enxet ektahakxa enxoho apteme xa, kéméxchek kóltekkesek kélnepyeseksa kéxegke. 3Maxnak eykhe ko'o sekyókxoho kélnepyeseksa kéxegke kaxwo' nak, xénchek eyke ewáxok máxa entahak sekwokmo enxoho sekyókxoho. Yetlo sekxeyenma Jesucristo Wese' egegkok apwesey ekxénak ko'o seltamhókxa kóltemésesek énxet apteme enxoho xa, hakte máxa entahak sekwokmo enxoho sekyókxoho xa. 4Kélaknakxeyk sat agkok kéxegke, kaxének sat ko'o ewáxok kéxegke, máxa sat katnehek sekwokmo enxoho sekyókxoho, keytek sat nahan Jesús Wese' egegkok apmopwána kélnepyeseksa kéxegke. 5Keñe sat kólmések Satanás, yakwayam kamasésók apyókxa xa énxet nak, aphagák sat eyke kawagkasaxchek teyp, apwakto sat Wese' egegkok.
6Megkatakmelak keyxkohok kélpeywa kéxegke eñama elánamáxche xa ektéma nak; Kélya'ásegkok eyke ektémol'a cha'a amya'a s'e: “ketsék kempáseyak awanchek kampasagkok apyókxoho hótahap kélyelakteso.”#Gá 5.9. 7Kólchexa' kéxegke xa kempáseyak apák eknaktawáseykencha'a nak, yakwayam enxoho kólxohok kéxegke m'a pan kaxwé kélyelaktesól'a. Kélhawók kéxegke m'a pan meyke kempáseyak aptamákpohol'a ekhem mólwagkayam Pascua. Hakte apmatñegkek axta Cristo negko'o segyanmaga, aptaha nak Nekkések Apketkok kélpagkancheso ekhem mólwagkayam nak Pascua.#Ex 12.5. 8Kéméxchek negko'o ólsawáseshok Pascua egagkok nak, yetlo magyexamaxkoho, tén han antemésesek ekmámnaksoho agko' nentémakxa, ekyetchesamaxkoho nak ma'a pan meyke kempáseyak nak;#Ex 13.7; Dt 16.3. akke katakmelak ólsawáseshok yetlo ekmaso nentémakxa, tén han ma'a nentémakxa nak mólya'asáxma, ekyetchesamaxkoho nak kempáseyak apák.
9Mók sektáxéseso weykcha'áhak axta seltennasa kéxegke maltamho kólpaxkaha m'a énxet ektaha nak apkeláneyak ekmaso nentémakxa mansexta. 10Axta altennásak kéxegke maltamho kólpáxakwomhok kélagko' ma'a énxet apkeláneyak nak ekmaso nentémakxa mansexta keso náxop, esenhan ma'a énxet apkelmeyókásamákpoho nak aksok apagkok, esenhan ma'a apkelmenyexmo nak, esenhan ma'a apkelpeykesamo nak kéleykmáseso, kéméxchek eykhe kéxegke kamaskok kélha keso náxop yakwayam megkólpaxkaha xa énxet'ák nak. 11Axta eyke eltennásak ko'o kéxegke maltamho kólyepetchaha m'a énxet apkeltemesásamap nak egyáxeg, cham'a apkelané nak ekmaso nentémakxa mansexta, esenhan ma'a apkelmeyókásamákpoho nak aksok apagkok, esenhan ma'a apkelpeykesamo nak kéleykmáseso, esenhan ma'a aptekkeseyam nak apmopwána amya'a, esenhan ma'a anmenáto nak, esenhan ma'a apmenyexmo nak. Nágkóltawho nahan xamo' kélto énxet apteme nak xa. 12-13Mehepayhawok ko'o atnehek selyekpelchémo énxet'ák mehentémo xamo' nak magya'áseyam; Dios sat eyke etnehek apkelyekpelchémo xa énxet'ák nak. Akke kéméxchek kéxegke kóltehek kélyekpelchémo m'a egyáxeg nentémo xamo' nak magya'áseyam. Kóltekkes kélnepyeseksa kéxegke#Dt 13.5; 17.7. énxet apkelané nak mey'asáxma.
Currently Selected:
1 CORINTIOS 5: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
