1 CORINTIOS 4
4
Seykha amya'a apkeltamheykha
1Kéméxchek kaxének kélwáxok kéxegke nentaha negko'o nempasmeykha aptamheykha Cristo, nenxawáyak axta negko'o yakwayam ólxekmósek énxet'ák ma'a aksok ekpowásamáxkoho apkeláneykekxa axta Dios. 2Enxet ektahakxa enxoho kélasennagko yakwayam elának xa, kéméxchek exekmóshok aptémakxa ekpayhawo nak kóltehek kéláyo. 3Ko'o nak se'e, asextók ektamheykha ewáxok kóltehek selyekpelchémo kéxegke, esenhan ma'a aptaha enxoho sekpelchémo énxet'ák apheykha nak sẽlyekpelchémókxa. Matnék nahan cha'a ko'o sekyekpelchamáxchekxoho ahagko'. 4Mehesexnenék eykhe ko'o m'a ektémakxa nak elchetamso ewáxok ekmaso, háwe eyke eñama sexeyenma ko'o Dios sektaha meyke seksexnánémaxche xa. Wese' egegkok akke aptaha cha'a sekpelchémo ko'o.#1 Jn 3.19-21. 5Nágkólteme aksa kélyekpelchémo kélmók kéxegke amonye ekwayam ekhem nelyekpelchamáxchexa; kólleyx ewata' Wese' egegkok, kólleyx nahan enegkenekxak neyseksa elseyexma m'a aksok ekhágko nak neyseksa ekyaktesakxaxma, kólleyx nahan elyekpelchásesók kéxegke ektémakxa nak ekmámenyého kalának egwáxok. Keñe sat egkések ekpayheykekxa apwáxok Dios apyókxoho énxet ekpayhawo nak exkak xa.
6Elyáxeg, eltennásek ko'o kéxegke xa sekyetchásekxoho nak ma'a aptémakxa nak Apolos, tén han sektémakxa nak ko'o xa, yakwayam enxoho kólya'asagkohok kéxegke. Eltennásek ko'o kéxegke xa, yakwayam enxoho kaltámeyagkok megkólyeykháseykegkoho m'a ektémakxa nak eknaktáxésamaxche weykcha'áhak eñama kélyetleykekxa nentémakxa nak negko'o, yakwayam enxoho megkeyxkók kélwáxok eñama kélweyheneykekxoho xama énxet, keñe kóltaknók ma'a pók. 7¿Yaksak ekteméseso exchep néten nepyeseksa apnámokkok? ¿Ya egkésók xép Dios ekyókxoho aksok? Apmésegkek agkok Dios aksok xép, ¿yaksak ektaha eyeyxkoho nak apwáxok, máxa aptahak xép ma'a apweté apagko' enxoho aksok?
8¿Kélteméya kaxwo' kéxegke ekxámokma aksok kélagkok? ¿Sawhexkoya ekyetna kéxegke ekyókxoho aksok? ¿Kélhagweykxóya kéxegke kelwese'e megkalmopmenyého nak aksok eleñama nak negko'o? Katnoho anna nakso' kélteme kéxegke kelwese'e, keñe nahan negko'o xa antehek kelwese'e xamo' kéxegke. 9Eneykek ko'o heghésekmok Dios axayo' agko' negko'o nenteme nak seykha amya'a, máxa entemesásak ma'a énxet la'a yakwayam etekyók nápakta'awo' apyókxoho énxet keso náxop, tén han ma'a Dios apkelásenneykha nak, tén han ma'a énxet'ák nak, ektémol'a kólya'ammok yakwayam kóllanha ektahakxa ekneywomáxche. 10Cristo keñamak nelánémaxko negko'o antahak sẽlyéháxma; keñe kéxegke kelánémaxko kaxnak kélya'áseyak, Cristo eñamakxa. Negko'o nenteme nelyelkamáxkoho, keñe kéxegke kélteme ekha kélyennakte. Mólasekhaxchék cha'a negko'o, keñe kéxegke apchekawo cha'a énxet. 11Megkamassegwokmok negko'o nenlegeykegkoho meyk sẽlnapma, tén han hem sẽlnapma, tén han senteme meyke apáwa, ekwokmoho keso kaxwo' nak; énxet sennaktawáseykegkoho, tén han meyke enxanák, 12tén han nelyampayo eñama nentamheykha.#Hch 18.3. Hentakneyagkohok cha'a negko'o énxet, keñe cha'a negko'o agámenyéhok katakmelek ektahakxa énxet; ẽlmenxenáha agkok negko'o, ólenmaxaxkoho' aksa. 13Nelxénamaxchék cha'a ekmaso negko'o, keñe cha'a negko'o agátegmowagkok aksa yetlo negásekhayo. Ẽltemésesegkek negko'o máxa aksok apák keso nelwanmegkaxa, ektémol'a aksok apák apkexakha énxet, ekwokmoho s'e kaxwo' nak.
14Matáxesásak ko'o kéxegke yakwayam agkések kélmegkakto, yakwayam alxekmósagkok akke, sektémol'a alxekmósagkok ma'a étchek ahancha'awo nak, hakte elásekhayók ko'o kéxegke. 15Diez mil eykhe katnehek apyókxoho énxet apkelxekmóso kéxegke apkeltennaso m'a amya'a eñama nak Cristo, wánxa agkok apkantawók eyke m'a kélyepmeyk. Ko'o sekteme kélyap kéxegke hakte eltennasegkek axta kéxegke m'a amya'a segwagkasamo nak teyp, axta keñamak kélyepetcheykekxo kéxegke Cristo Jesús xa amya'a nak. 16Eltamhok ko'o kólyetlakxak kéxegke sektémakxa nak ko'o.#1 Co 11.1; Flp 3.17.
17Cháxa keñamak seyáphásesa nak kéxegke Timoteo, aptaha nak seyásekhayo tén han aptaha hatte meyenseyam apyetlo Wese' egegkok. Sat eltennásekxohok makham kéxegke sektémakxa nak ko'o may'áseyam Cristo Jesús ma'a, ekhawo sektémakxal'a ko'o alxekmósek énxet ekyókxoho apchakneykekxexa sekmahágkaxa enxoho. 18Nápakha énxet apheykha kélnepyeseksa kéxegke nahan aptamhágkok apkeleymákpoho, hakte apkeneykek matyánegwakxók; 19apkeltamhok sat agkok Wese' egegkok, kaxwo' sat atnehek meyk'a kéxegke. Keñe sat óteyágwakxak ektémakxa apmopwancha'a elanagkok aksok xa énxet'ák eleymáxkoho nak cha'a apkelpeywa, háwe eyke ekwánxa agkok xa apkelmopwancha'a nak apkelpeywa. 20Hakte háwe amya'a naksa m'a aptémakxa nak Wese' apwányam Dios, kótaxkohok cha'a xa eñama m'a apmopwána nak apkeláneyak apkeltamheykha énxet. 21¿Yaksak kélamenyého atnésesek kéxegke? ¿Kéltamhok enxekel'a atyánegwomhok yakwayam allegásesagkohok kéxegke, atyánegwomhok enxeykel'a yetlo seyásekhayo, tén han yetlo ektakmeleykha ewáxok?
Currently Selected:
1 CORINTIOS 4: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
