1 CORINTIOS 1
1
Ekxeyenma ewáxok
1Ko'o Pablo, elwóneyha axta ko'o yakwayam atnehek Jesucristo seykha amya'a apagkok eñama Dios apmopmenyého. 2Ektáxésesek ko'o weykcha'áhak elyáxeg'a aptaha nak Dios énxet'ák apagkok apheykha nak xa tegma apwányam Corinto,#Hch 18.1. yetlo sekxegexma egyáxeg Sóstenes, cham'a apkelánamákpoho énxet'ák ektaha axta kélteméseso apkelpagkanamap eñama Cristo Jesús, cham'a apkelwóneykencha'a axta nahan Dios yakwayam etnésásekxak énxet'ák apagkok, yetlo nahan ma'a apyókxoho énxet apheykha nak ekyókxoho yókxexma, ektaha nak apkelpeykesamo apwesey Jesucristo, negko'o Wese' egegkok, tén han Wese' apagkok xa énxet'ák nak. 3Dios Egyap tén han Jesucristo Wese' egegkok sat etnehek apméso naksa kéxegke m'a ektémakxa nak segemleykekxoho, tén han ma'a meyke ektahakxa egwáxok, ektaha nak apagkok ma'a.
Nenxawé aksok eltakmela eñama Cristo
4Agkéshok cha'a ko'o ekxeyenma ewáxok Dios kéxegke eñamakxa, hakte apmések axta kéxegke Dios aksok eltakmela eleñama néten eñama Cristo Jesús. 5Cristo nahan keñamak apmésama kéxegke Dios ekxámokxoho aksok eltakmela eleñama nak néten, cham'a kélmowána nak kóltennaha appeywa, tén han ma'a ekxámokxoho ektémakxa nak kélya'ásegwayam. 6Hakte ekmámnaksoho temegwokmok ekyetno kélnepyeseksa kéxegke m'a amya'a ekxeyenma nak Cristo Jesús. 7Ekeso eñamakxa eksawhexkoho nak ekyetna kéxegke m'a kélmowána Dios apméso nak, neyseksa kélhaxanma ekhem yakwánxa nak ewatak Jesucristo Wese' egegkok. 8Dios sat elyennaktésesek kéxegke kélteme megkólya'áseyam ekwokmoho ektemegwánxa néxa ekhem, yakwayam enxoho megkólxénchásekxók kéltémakxa kéxegke apwakto sat Jesucristo Wese' egegkok. 9Esawhohok cha'a elának Dios ma'a apxénakxa enxoho elána', axta anhan apkelwóneykha kéxegke yakwayam kólxek xamo' Apketche Jesucristo Wese' egegkok ma'a.
Apkexpanchesamap nepyeseksa Dios énxet'ák apagkok
10Elyáxeg, yetlo sekxeyenma Jesucristo Wese' egegkok apwesey ko'o, eltamhok kaxhok mók kélpakmeyesma kélyókxoho kéxegke, yakwayam enxoho megkólexpanchesaxche. Kólteme megkólchexémáxkoho, yetlo kélhésamo mók elchetamso kélwáxok ma'a yakwánxa enxoho kóllána'. 11Elyáxeg selásekhayo, ektemék ko'o seláneya kéxegke xa, hakte ekleg'ak axta ko'o amya'a ekyetna kélexpanchásamáxche kéxegke, axta seltennáseykha m'a ekheykha nak Cloé apxagkok. 12Eyke ekmokók ko'o altennaksek kéxegke kéltéma cha'a kélpeywa kélnápakha s'e: “ko'o sekteme Pablo apkelxekmóso”; keñe nápakha etnehek cha'a apkelpeywa s'e: “ko'o eyke sekteme Apolos#Hch 18.24. apkelxekmóso”; keñe etnehek nahan cha'a nápakha s'e: “ko'o eyke sekteme Pedro apkelxekmóso”; keñe etnehek nahan nápakha apkelpeywa s'e: “ko'o eyke sekteme Cristo apkelxekmóso”. 13¿Wánxaya aksa xama nekha apkelxekmóso Cristo? ¿Pabloya axta kélyepetchesók aksok ektegyéso kéxegke eñamakxa? ¿Kélyakpasásegkek enxoho axta eykel'a yegmen kéxegke eñama apwesey Pablo? 14¡Ekmések ko'o ekxeyenma ewáxok Dios hakte axta ayakpásesók ko'o yegmen kélxama kéxegke, wánxa axta aksa sekyakpásesa yegmen ma'a Crispo#Hch 18.8. tén han ma'a Gayo!#Hch 19.29; Ro 16.23. 15Ekeso eñamakxa méko kawának kaxének eñama ko'o sekwesey kélyakpasáseyak yegmen. 16Ekyakpasásegkek axta nahan ko'o yegmen ekheykha nak Estéfanas apxagkok,#1 Co 16.15. wánxa agkok, eneykek eyke ko'o mayakpasáseykegkok yegmen pók énxet'ák nak. 17Hakte axta heyaphásak ko'o Cristo yakwayam ayakpásesagkok yegmen énxet, wánxa axta aksa apkeltamho altennaha m'a ektémakxa nak amya'a nelmeyamáxche, háwe eyke yetlo m'a negya'ásegwayam eñama nak keso náxop, yakwayam enxoho megkamassegwomek ma'a ektémakxa nak ekmowána apketsapma axta Cristo néten aksok ektegyéso.
Negya'ásegwayam eñama Dios tén han negya'ásegwayam eñama nak énxet
18Yának cha'a amya'a ekyéháxma kéltenneykha apketsapma axta Cristo néten aksok ektegyéso m'a énxet'ák apkelmahágko nak yakwánxa kólmasésók; wánxa agkok, negya'ásegkok eyke negko'o ektaha eñama Dios apmopwána xa amya'a nak, negko'o peya nak ólwagkasaxchek teyp.#Ro 1.16. 19Ekhawo ektémakxa nak eknaktáxésamaxche weykcha'áhak se'e:
“Amasésesek sat ko'o apkelya'áseyak énxet
ekha nak apkelya'áseyak,
wának sat nahan kamassegwók
ektémakxa ekha apkelmopwancha'a m'a
énxet'ák ekha nak apkelmopwancha'a.”#Is 29.14.
20¿Háxko apmahágkaxa kaxwo' ma'a énxet ekha nak apya'áseyak?#Job 12.17; Is 19.12; 33.18. ¿Háxko nahan apmahágkaxa m'a énxet apkelxekmóso nak apnámokkok? ¿Háxko nahan apmahágkaxa m'a énxet apya'áseykegkoho nak apya'asakxa appeywa exének aksok keso náxop? Aptemesásekxeyk axta Dios mékoho negya'ásegwayam eñama nak keso náxop.#Is 44.25.
Dios apxekmósamo aptaha ekha apmopwána.
21Dios, aptaha nak ekha apya'áseykegkoho, apkeltamhok axta mékpelchehek Dios énxet'ák apheykha keso náxop eñama m'a apkelya'áseykegkoho apancha'awo nak; xénchek axta eyke apwáxok elwagkasek teyp ma'a énxet'ák apteme nak apcháyo eñama m'a appeywa nak, neyseksók eykhe eyánemaxche amya'a ekyéháxma xa amya'a nak.
22Apmenyék cha'a elwetak aksok sempelakkaso agwetak ma'a énxet'ák judíos, keñe énxet'ák griegos apkeltamho cha'a keytek apkelya'áseyak. 23Wánxa agkok, nenlegásek eyke negko'o m'a Mesías kélyepetchesama axta aksok ektegyéso. Cháxa ellókasa nak cha'a énxet'ák judíos xa, keñe m'a énxet'ák metnaha nak Judíos apkenagkama cha'a ekyéháxma neltenneykha; 24Keñe m'a énxet'ák ektaha nak apkelwóneykha Dios, aptemésesama Mesías apxekmóso Dios apmopwána, tén han ma'a ektémakxa nak han apya'áseykegkoho Dios, nepyeseksa énxet'ák judíos esenhan nepyeseksa m'a énxet'ák metnaha nak judíos. 25Hakte aksok aptemésesamol'a Dios máxa ekyéháxma elanok énxet apheykha nak keso náxop, cháxa ektaha ekyeykhágweykmoho agko' ektémakxa nak apkelya'ásegwayam énxet keso náxop; keñe m'a aptemésesamol'a Dios máxa meyke ekyennakte, cháxa aksok ektaha ekyennakte agko' megkaxnawok ma'a ekwánxal'a apkelyennakte énxet keso náxop. 26Elyáxeg, kéméxchek kaxének kélwáxok kéxegke apkelwóneykencha'a axta aksa Dios, neyseksa kélteme eykhe kélkantawo ekha nak kélya'áseyak, ekhawo ektémakxa nak ekxeyenma apwáxók énxet'ák apheykha nak keso náxop. Apkelwóneyha axta aksa nahan Dios neyseksa kélteme kélkantawo kéxegke ekha nak kélyaheykekxoho, neyseksók eykhe anhan kélteme kélkantawo kéleñama nak nepyeseksa kelwese'e nak. 27Apkelyésáha axta Dios énxet'ák apkelánémakpo nak elyéháxma keso náxop, yakwayam enxoho egkések apkelmegkakto m'a énxet'ák ekha nak apkelya'áseyak; apkelyésáha axta anhan Dios ma'a énxet'ák apkelánémakpo nak etnahak mékoho keso náxop, yakwayam egkések apkelmegkakto m'a énxet'ák apkelyennakte nak. 28Apkelyésáha axta Dios énxet megyásekhamap nak, tén han ma'a meyke nak kéláyo keso náxop, cham'a énxet'ák mékoho nak, yakwayam enxoho etnésásekxak meyke kéláyo m'a énxet'ák apkelánémakpo nak etnahak néten nepyeseksa apnámokkok. 29Cháxa keñamak méko kaxwo' kawának katnésesaxchek néten nápakto' Dios. 30Dios axta apyepetcháseykekxa kéxegke Cristo Jesús, aptemésesek axta anhan Cristo yakwayam etnehek segya'asásegwayam, tén han aptemésesama yakwayam etnehek sẽlteméseso nelpéwomo negko'o, keñe nahan antehek nempagkanchásamáxche Dios, tén han sẽlchexakkasama m'a nelsexnánémaxche axta eñama m'a segyanmaga axta. 31Ekeso eñamakxa ektéma nak eknaktáxésamaxche weykcha'áhak se'e: “Apmokók agkok keyxkohok appeywa exénakpekxohok apagko' xama énxet, kéméxchek keyxkohok appeywa exének ma'a Wese' egegkok.”#Jer 9.23-24.
Currently Selected:
1 CORINTIOS 1: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
