Valooma 14

Avɨɨdɨki valekage ʉkʉhɨgana

1Mumwʉpɨlɨlage ʉnʼjiinyo ʉvɨ nadʉlwiki mu lwɨdɨko. Ʉnyie kwʉ baako ʉkʉkaningʼana nʉ muunu ndʉʉjwa pa kulongwi jya kʉlekengʼana kɨmasaago ʉnyie nʉ mwene. 2Tʉte, ʉmuunu ʉvadʉlwike mu lwɨdɨko ivona iweesa ʉkʉlya ɨkɨveetsaga, wʉ hʉmbe ʉjyʉnge ʉvɨ nadʉlwiki mu lwɨdɨko, imanya ʉlwɨdɨko lukʉntavʉla ʉkʉlya kwene ɨmboga. 3Ʉjwa ʉviilya ɨkɨveetsaga aleke ʉkʉmʼbeda ʉlya ʉviilya ɨmboga jyene, nʉʉjwa ʉviilya ɨmboga jyene, namwene aleke ʉkʉmmɨga ʉjwa ʉviilya ɨkɨveetsaga, manya ʉNgʉlʉve amwʉpɨlye ndʉwʉ alɨwo. 4Ʉlɨ vʉvʉle ʉvʉtavʉlɨlwa napadebe wa kʉmmɨga ʉmbombi va muunu ʉjyʉnge. Ʉntwa va mwene vɨ alʉmanyile ɨngave ʉmbombi va mwene anangile evo nanangili. Nʉ mbombi ʉjwa jiivombaga ndʉwʉ jilondiwa, manya ʉNtwa ʉYɨɨsʉ alɨ na maka ga kʉmbɨɨka avombage ewo.

5Ʉmuunu ʉjyʉnge ivona ɨkɨgono ɨkɨtʉnga kyɨmɨkiwa ʉkʉlʉtɨɨlɨla isigono isinge, wʉ kʉnʉ ʉmuunu ʉjyʉnge ivona isigono syoni silɨngʼiine. Ʉmuunu nʉ muunu akongage ʉmwʉ ilolela jyʉmwene. 6Ʉmuunu ʉjwa ʉvɨ ivona ɨkɨgono ɨkɨtʉnga ʉkʉta kyɨmɨkiwa, ivomba ewo pa vʉsumbe wa kʉmmovosa ʉNtwa ʉYɨɨsʉ. Namwene ʉjwa ʉvɨ iilya ɨkɨveetsaga, ivomba ewo pa vʉsumbe wa kʉmmovosa ʉNtwa, manya nakaalye kɨtsila kʉtala ʉkʉnsaana ʉNgʉlʉve. Namwene ʉviilya ɨmboga jyene, ivomba ewo kʉ nongwa jya kʉmmovosa ʉNtwa ʉYɨɨsʉ, namwene iiva ikʉnsaana ʉNgʉlʉve. 7Manya napali ʉmwɨdɨki ʉvɨ itaama kʉ lʉvʉmbʉlɨlo lwa mwene, pange ʉvɨ iiswa kʉ lʉvʉmbʉlɨlo lwa mwene jyʉmwene. 8Tʉngave twiva vʉʉmi, tutaama pa vʉsumbe wa kʉmbombela ʉNtwa, ikange tʉngave twiswa, pwʉ twiswa kʉ wɨɨmɨkiwa wa Ntwa. Pwʉ lɨno, tʉngave tʉlɨ vʉʉmi evo tʉsue, tʉlɨ kyʉma kya mwene. 9Manya ʉKɨlɨsiti aasue ikange aatsʉʉkile, lɨno mwʉmi, pakʉta ʉmwene ave Ntwa va vaanu vooni, avaswe na vʉʉmi.

10Lɨno, kɨki avange pagati paanyie vihɨga avɨɨdɨkivajyavo? Ikange, kɨki avange vibeda avɨɨdɨkivajyavo? Manya ʉwe twɨ vooni tʉlɨɨma pavʉlongolo pa Ngʉlʉve pakʉta tʉhɨgwe. 11Pa kulongwi ɨjɨ, ʉVʉvɨge ʉVʉvalatse wiita,

“Tsa jɨlweli, ʉNtwa itsova iita, ‘Ʉmuunu nʉ muunu alasugama paane,

nʉ kʉtsova kʉ lʉlimi lwa mwene ʉlʉginio lwane ndɨ Ngʉlʉve.’ ”#Yesaya 45:23; 49:18

12Pwʉ lɨno, ʉmuunu nʉ muunu pagati paawe, alapanga jyʉmwene ikulongwi tsa mwene pavʉlongolo pa Ngʉlʉve.

Ʉnʼdʉlʉsu mu lwɨdɨko aleke ʉkʉmpɨnza ʉvɨ nadʉlwiki

13Pwʉ lɨno, ndajɨve ndeeti twɨlekelwe ʉkʉhɨga avɨɨdɨkivajiitu, ikange tʉlamule ʉkʉleka ʉkʉvomba ɨkɨveetsaga ɨkikʉmpela ʉmwɨdɨkinʼjiitu apɨnzanike evo avombe imbiivi. 14Ʉne ndɨlʉmanyile, kʉ nzɨla jya lʉmanyiiso lwa Ntwa ʉYɨɨsʉ ʉkʉta, nakɨpali ɨkyakʉlya ɨkɨveetsaga ɨkɨnyala. Apeene, ʉmuunu angavone ɨkyakʉlya ɨkɨtʉnga kɨnyala, pwʉ ɨkyakʉlya ɨkyo kʉ mwene kiiva lweli kɨnyala. 15Pwʉ ʉngave ʉve vukʉmpelela ʉlʉsʉsʉvalo ʉmwɨdɨkinnino wʉ wiilya ɨkyakʉlya ɨkɨtʉnga, jɨlweli apo ʉve wiiva nʉlɨ nʉ lʉgano kʉ nnino ʉjwa. Lɨno, kwʉ baako ʉkwɨdɨka napadebe ʉkʉta, kʉ nzɨla jya kyakʉlya kyako ʉnʼjatse ʉmuunu ʉvɨ ʉKɨlɨsiti aanswɨlye! 16Pwʉ lɨno, ʉve ʉleke ʉkʉpela ɨkɨɨnu ɨkyʉ vukʉkɨvona kɨnonu kɨtsowaagwe na vange ʉkʉta kɨɨnu kɨviivi. 17Manya isiinu sya kʉvɨɨkɨla ʉntɨma mu wɨɨdɨki nʉ vʉkongi wiitu kwa Ngʉlʉve#14:17 ƗKɨyunaani kiita ʉLʉdeeva lwa Ngʉlʉve. natsʉ kulongwi tsa kʉlya evo ʉkʉnywa, apeene ikulongwi tsa kʉvomba ʉvʉgolosu, ʉkʉva nʉ lʉnotsehetso nʉ lʉhekelo isyʉ ihʉmya ʉMepo ʉMbalatse. 18Nʉ mwene ʉvikʉmbombela ʉKɨlɨsiti ndavʉle, ikʉmmovosa ʉNgʉlʉve, ikange inogela pamiiho ga vaanu.

19Pwʉ ʉnsɨkɨ gwoni twɨjʉmɨɨlɨtsaage ʉkʉvomba isiinu isikʉtʉpelela tʉtaamage paninie nʉ lʉnotsehetso ni syʉ sitangɨla ʉkʉdʉlʉsania mu lwɨdɨko. 20Ʉleke ʉkwɨdɨka ʉkʉta ʉvʉnogwe waako wa kyakʉlya vʉnange ɨmbombo jya Ngʉlʉve. Isyakʉlya syoni isilɨɨwa sitsila mwiko, napeene vʉnangi kʉ muunu ʉkʉlya ɨkyakʉlya ɨkɨveetsaga ɨkyʉ kiweesa ʉkʉmpɨnza ʉnnine avombe imbiivi. 21Hʉba ʉleke ʉkʉlya ɨnyama, evo ʉkʉnywa ʉvʉgɨmbɨ, evo ʉkʉvomba ɨkɨveetsaga ɨkikʉmpelela ʉmwɨdɨkinnino apɨnzanike. 22Ʉve ʉmwʉ vukwɨdɨkɨla ikulongwi itsi, kɨveetsage kɨɨnu kyave nʉ Ngʉlʉve, ʉleke ʉkʉtsova kʉ vaanu ʉwʉ navadʉlwiki mu lwɨdɨko. Pwʉ inʼgatalʉsu ʉmuunu ʉvɨ nikɨpʉlɨka ʉkʉvomba imbiivi wʉ ivomba ɨkɨɨnu ɨkyʉ ivona kya lweli. 23Lɨno, ʉvikɨdwatsa mu numbula pa kulongwi jya kyakʉlya ɨkiilya, alahɨgwa nʉ Ngʉlʉve ʉlwakʉva alʉmanyile ʉkʉta lɨlya ɨlyʉ ivomba liviivi pamiiho ga Ngʉlʉve. Ʉmuunu angavombe ɨkɨɨnu ɨkɨveetsaga ɨkyʉ nikwɨdɨka ʉkʉta kya lweli, alʉmanye ʉkʉta ʉkwa kʉvomba imbiivi.

Currently Selected:

Valooma 14: zga

Highlight

Compare

Copy