Valooma 13

Ʉkʉvɨɨdɨkɨla avalongotsi va silikali

1Ʉmuunu nʉ muunu anogye ʉkʉvɨɨmɨka nʉ kʉvɨɨdɨkɨla avalongotsi va silikali. Mulʉmanye ʉkʉta, ʉvʉtavʉlɨlwa wooni wa veene wa kʉlongotsa, wihʉma kwa Ngʉlʉve, ikange vooni vavɨɨkilwe nʉ mwene. 2Pwʉ lɨno, ʉmuunu ʉvaveetsaga ʉvibeetsa ʉvʉtavʉlɨlwa wa veene, ikʉmʼbeetsa ʉNgʉlʉve ʉvɨ avavɨɨkile avo. Nʉ muunu ʉvikʉmʼbeetsa ʉmwene ikɨvɨɨka mu vʉhɨgi wa mwene. 3Manya ʉndongotsi ʉnya vʉtavʉlɨlwa nikʉmpelela ʉlʉdwado ʉmuunu ʉvivomba inonu, apeene ʉlya ʉvivomba imbiivi. Pwʉ lɨno, ɨngave navunogwa ʉkʉdwatsiwa nʉ ndongotsi ʉjwa, vombaga inonu, namwene ikʉkʉginiaga. 4Mulʉmanye ʉkʉta ʉndongotsi imbombi va Ngʉlʉve, nɨ mbombo ɨjyʉ ivomba nya lʉvʉmbʉlɨlo kwanyie. Lɨno, ʉngavombe imbiivi, pwʉ ʉdwadage! Manya jɨlweli ʉndongotsi ʉjwa iweesa, kʉ vʉtavʉlɨlwa ʉwʉ alɨ nawo, akʉvʉnge. Pa kʉvomba ewo, ʉmwene iiva ipʉgʉla ʉlʉviipo lwa Ngʉlʉve kʉ ntulanongwa. 5Pwʉ lɨno, avaanu ndajɨve ndeeti vanogye ʉkʉvɨɨmɨka nʉ kʉvɨɨdɨkɨla avalongotsi. Najiiva ewo kwene kʉ nongwa jya kʉdwada ʉkʉvʉngwa nʉ Ngʉlʉve, apeene na kʉ nongwa jya nyɨvonelo tsiinyo.

6Ikange, pa kʉlɨmanya ɨlyo, kyʉ kɨɨnu musonga ɨsongo, manya avavombi va silikali vavombi va Ngʉlʉve. Aveene wʉ vikɨkupila pa kʉvomba imbombo tsa veene, vikʉmbombela ʉNgʉlʉve jyʉmwene. 7Pwʉ lɨno, muvombage silya isyʉ avalongotsi vanogye ʉkʉvombelwa. Ikange ɨngave mutsigilwa ɨsongo, pwʉ musongage; ɨngave jyʉ songo jya kʉgʉtsa isiinu, najyene muhombage, ikange ɨngave kʉlɨ muunu ntʉnga va kwɨmɨkiwa, namwene mumwɨmɨkage.

Ʉlʉgano wʉ vʉkwɨlanilo wa ndagɨlo tsa Ngʉlʉve

8Mulekage ʉkʉtsigilwa ɨkɨveetsaga nʉ muunu ʉvaveetsaga, peene muveetsage nʉ ntsigilo gwa kʉganana jyʉnyie kwa jyʉnyie. Manya ʉvɨ ikʉnʼgana ʉnnine iiva ivomba ndʉwʉ indagɨlo tsilagye. 9Lola, indagɨlo tsiita: Ʉlaligupaga, ʉlabudaga, ʉlahɨɨtsaga, pange ʉlanogwagwa ɨkɨɨnu kya nnino.#Kʉhʉma 20:13-17; Simiilitso tsa Ndagɨlo 5:17-21 Lɨno, indagɨlo itsi ni tsinge tsyoni tsilɨ mu nʼgati mu lʉlagɨlo ʉlwa lʉpamato ʉlwita, “Ʉnʼganage ʉnnino ndʉwʉ wɨganile jyʉve.”#Valawi 19:18 10Ʉmuunu ʉvikʉnʼgana ʉnnine, nikʉmbombela imbiivi. Pwʉ lɨno, ʉnsɨkɨ ʉmuunu ikʉvagana avaanu avange, iiva ivomba ndʉwʉ indagɨlo tsilagye.

11Pavanogye ʉkʉvomba itsi, ʉlwakʉva mulʉmanyile ʉkʉta, akavalɨlo ka kʉsisimuka kamalile ʉkʉsika. Lola, ʉnsɨkɨ gwa vʉpoki wiitu gʉlɨ piipi ʉkʉlʉtɨɨlɨla apo pa vʉtengʉlɨlo ʉpwʉ twatengwe ʉkʉmwɨdɨka ʉNtwa ʉYɨɨsʉ. 12Lɨno jɨvyʉta ɨkɨlo jisila, ikange kɨvyʉta ɨkɨgono ɨkɨpya kɨlɨ pa kʉtengʉla. Lɨno, tʉtsileke imbombo imbiivi itsʉ avaanu vivomba mu ngʼiisi, nʉ kʉtoola isilwɨlo sya lʉmuli. 13Tʉve nʉ lʉgendo ʉlʉnonu nda vaanu avitaama mu lʉmuli lwa kɨgono ɨkɨpya. Mu nyekelo tsiitu, tʉleke ʉkʉva vaanu avisyota nʉ kʉgaala, ʉkʉnema ɨmikino gya vʉligu pange ʉkʉvomba imbombo tsa soni, pange ʉkʉva vanya mbatsa evo ʉkʉva vanya kɨvini. 14Apeene lɨno, mu wʉʉmi wiinyo wooni, mulongotsiwaagwe nʉ Ntwa ʉYɨɨsʉ Kɨlɨsiti. Mulɨɨdɨkaga napadebe ʉkʉlongotsiwa nʉ vʉmuunu wa vʉtulanongwa.

Currently Selected:

Valooma 13: zga

Highlight

Compare

Copy