Valooma 12

Avɨɨdɨki vɨhʉmyage ʉwʉʉmi wa veene pa kʉmbombela ʉNgʉlʉve

1Lɨno vɨɨdɨkivajyango, ʉlwakʉva ʉNgʉlʉve ikʉtʉkolela ɨkɨsa, ndikʉvasiima kʉ numbula jyango jyoni, mwɨhʉmye muve ndi neekelo tsa sidɨɨmo isyʉmi,#12:1 Neekelo tsa sidɨɨmo isyʉmi Ɨkɨɨnu ɨkɨ kɨhenza kʉ Vakɨlɨsiti va nsɨkɨ ʉgʉ. Lɨno ʉnsɨkɨ gwa Paulo kyale kɨɨnu ɨkyʉ aVakɨlɨsiti vaakɨmanyile. AVayahudi va nsɨkɨ ʉgwa vaagegaga ineekelo tsa sidɨɨmo kʉ tembile. Isidɨɨmo isyo syabudwagwa, ʉgwalonda gwaduudwagwa paasi pa kɨteekelelo, ɨnyama jyavɨɨkwagwa pakyanya pa kɨteekelelo nʉ kʉnyianywa. imbalatse, itsikʉmmovosa ʉNgʉlʉve. Lola, ʉkʉvomba ewo jyʉ nzɨla jya lweli jya kwɨsaja kʉ mwene. 2Pwʉ lɨno, muleke ʉkwɨga ikange inyiiho itsivombwa na vaanu va mu kɨlʉnga ɨkɨ. ɄNgʉlʉve vɨ aandʉle inumbula tsiinyo muve na masaago amapya. Apo pwʉ jʉmumanyila ʉkʉlʉmanya ʉvʉnogwe wa Ngʉlʉve kwanyie, kwʉ kʉta, ɨkɨɨnu kɨlya ɨkɨnonu, ɨkɨkwɨlanie ikange ɨkikʉmmovosa.

3Lɨno, ʉlwakʉva ʉKɨlɨsiti amye ʉlʉhʉngʉ ndɨve mpositili va mwene, pwʉ ndikʉmbʉʉla mpamato mpamato mwanyie ndiita, muleke ʉkwɨvona munogelanie ʉkʉlʉtɨɨlɨla ʉmwʉ muveelye. Apeene, mwɨvonage ʉkʉta, ʉmuunu nʉ muunu apeevilwe ʉlwɨdɨko lʉlʉninie nʉ Ngʉlʉve. 4Ndʉwʉ mulʉmanyile, ʉmmana gʉlɨ mpamato, napeene gʉlɨ ni sipagɨka syongosu. Ɨkɨpagɨka nɨ kɨpagɨka kɨlɨ nɨ mbombo jya kyene. 5Vʉvʉle vʉle wʉ gʉlɨwo ʉmmana gwa Kɨlɨsiti. Ʉwe tʉlɨ sipagɨka syongosu sya mmana mpamato gwa mwene. Mu mmana ʉgʉ, ʉmuunu nʉ muunu ɨpelile kɨpagɨka kya vanine.

6Pwʉ lɨno, ʉNgʉlʉve kʉ lʉhʉngʉ lwa mwene, aampye ʉmuunu nʉ muunu ɨkɨkʉngɨlwa kya mwene ɨkɨlɨvʉnge. Ʉvɨ alɨ nɨ kɨkʉngɨlwa kya kʉpʉlɨsa ɨlimenyu lya Ngʉlʉve, avombelage ʉkʉkongana nʉ lwɨdɨko lwa mwene. 7Ʉnya kʉvavombela avanine, vɨ avavombelage kʉ numbula jyoni. Namwene ʉvimanyiisa, vɨ amanyiisaage vʉnonu. 8Ʉnya kɨkʉngɨlwa kya kʉvatseesa avanine, vɨ avombage ewo. Ʉmwipa kʉ vaanu, ahʉmyage isiinu kʉ numbula jyoni. Ʉndongotsi namwene, vɨ ɨkupilage ʉkʉlongotsa. Namwene ʉnya kɨsa kya kʉvatanga avanine, vɨ avombage ewo kʉ lʉhekelo.

Avɨɨdɨki pavanogye vagananage

9Muvaganage avajiinyo kʉ numbula ɨmbalasu. Kwʉ kʉta, mwɨlekelwe lwoni ʉkʉvomba imbiivi, apeene muvombage inonu ʉnsɨkɨ gwoni. 10Mugananage jyʉnyie kwa jyʉnyie ʉta vanamuunu. Ʉmuunu nʉ muunu gʉnogage siitso ʉkʉmwɨmɨka ʉnnine. 11Mwɨkupilage, muleke ʉkʉva voolo ʉkʉvomba ɨmbombo jya Ngʉlʉve, apeene mutangwe nʉ Mepo ʉMbalatse ʉkʉgendelela ʉkʉvomba ɨmbombo ɨjyo kʉ numbula jyoni, mumbombelage ʉNtwa ʉYɨɨsʉ. 12Hekelagi kʉ galya amanonu ʉgwʉ ʉNgʉlʉve aavahʉʉviitse ʉnyie ʉkʉta alavavombela. Sipagi vʉngaviitsile ʉvʉpala, nʉ kʉgendelela ʉkʉnʼdoova ʉNgʉlʉve. 13Ʉvɨ alɨ ni siinu, avatangage avɨɨdɨkivanine avalɨ vʉvʉle isiinu, ikange muve nyango ʉkʉvʉʉpɨlɨla vʉnonu avahenza mu nyumba tsiinyo.

14Avaanu avikʉvapelela ʉvʉkʉvɨlwa, muvadoovelage pakʉta ʉNgʉlʉve avasaje avo, mulekage ʉkʉvadoovela ʉkʉta vakootolwe. 15Hekelagi paninie na vihekela; lɨlagi paninie na vilɨla. 16Mutaamage vʉnonu jyʉnyie kwa jyʉnyie. Mulekage ʉkwɨtotsa, apeene mwɨjisaage nʉ kʉva nʉ vʉnyange na vaanu avibedwa, pange mulɨvonaga ʉkʉta munya lʉhala ʉlʉlʉti.

17Avaanu vangavavombele ʉvʉviivi, mulekage najyʉnyie ʉkʉvavombela ʉvʉviivi. Apeene, ʉnsɨkɨ gwoni, wʉ mukaanale ʉkʉvomba ɨkɨveetsaga kʉ vange, musaagɨlɨlage taasi nʉ kʉvomba galya agivoneka manonu kʉ vaanu vooni. 18Pa kulongwi jya kʉvombelanila na vaanu avange, ʉnyie vombagi ɨlɨveetsaga ɨlyʉ muweesa pakʉta muve nʉ lʉnotsehetso na vaanu vooni. 19Vagane vango, kwʉ baako ʉkʉlʉmbɨla, apeene mundekelage ʉNgʉlʉve vɨ avombage itso. Nditsova ewo ʉlwakʉva mu Vʉvɨge ʉVʉvalatse ʉNtwa ʉNgʉlʉve iita, “Ʉne neene ndɨlalʉmbɨla.”#Simiilitso tsa Ndagɨlo 32:35 20Pa kʉleka ʉkʉlʉmbɨla ʉVʉvɨge ʉVʉvalatse wiita,

“Ɨngave ʉndʉgʉ vaako alɨ nɨ nzala, impe ɨkyakʉlya;

ikange angave alɨ nɨ kyʉmɨlwa, impe ɨkyakʉnywa.

Lola ʉngavombe ewo,

wiiva ʉta ʉlʉndaminie ʉmwoto ʉgʉkenywike pa ntwe gwa mwene.”#12:20 ƗKɨyunaani kiita vukeenela amakala agiviika ʉmwoto pa ntwe. Avɨmbi avange viita ʉvʉganulu wa mamenyu aga kwʉ kʉta wiiva ʉnkotsiitse isoni (Sumbo 25:21-22).

21Ʉlekage ʉkwɨdɨka ʉkʉdʉlaniwa ni mbiivi itsʉ vuvombelwa na vaanu, apeene imbiivi itso ʉtsilesaage kʉ nzɨla jya kʉvavombela inonu.

Currently Selected:

Valooma 12: zga

Highlight

Compare

Copy