Valooma 11
11
ɄNgʉlʉve naavaleke avaanu va mwene, aVaisilahɨli
1Lɨno ndivʉʉtsa, ndeeti, ʉNgʉlʉve aavalekile avaanu va mwene? Baako, napadebe! Ʉne jyʉne ndɨlɨ Mwisilahɨli, ʉkʉhʉma mu lʉjungu lwa Abulahamu, ɨkɨvʉmbʉkʉ kya Benyamini. 2ɄNgʉlʉve naavaleke avaanu va mwene ʉwʉ aavahalile wʉ akaanale ʉkʉvapela. Oogo, namulʉmanyili ʉVʉvɨge ʉVʉvalatse ʉmwʉ vutsovela pa kulongwi jya Eliya, ʉmwandɨlye ʉNgʉlʉve pa kulongwi jya Vaisilahɨli? 3Akata, “Ntwa, avaanu ava vaabudile avanyamalago vaako, nʉ kʉnanga isiteekelelo sya kʉkʉhʉmɨhɨtsa isyavʉpe. Naka kavalɨlo aka, ndɨsigye ʉne ndɨ mwene, napeene najyʉne vilonda ʉkʉmbuda!”#1 Vakʉlʉdeeva 19:10, 14 4ɄNgʉlʉve aamwandile akata kɨki? Aatye, “Ndyɨvɨɨkye avagoosi avaelufu lekelakʉpamato (7,000) ʉkwa kʉ Isilahɨli ʉwʉ navikɨsaja kwa Baali.”#1 Vakʉlʉdeeva 19:18
5Nalɨ lɨno wʉ jɨlɨwo, pwɨle ɨmbalɨlo ndebe jya masigalɨlo ga vaanu ʉwʉ ʉNgʉlʉve aatwomwe kʉ lʉhʉngʉ lwa mwene. 6Pwʉ lɨno, ʉlwakʉva twomwilwe kʉ kɨsa kya Ngʉlʉve, natupokwa ni mbombo itsʉ tʉvombile. Manya ɨkaale jɨve tsʉ mbombo tsiitu itsʉ tʉvombile, pwʉ ɨkɨsa nakyale kiiva kɨsa ikange. 7Pwʉ lɨno jɨlɨnde: AVaisilahɨli vaalondile ʉkʉkava ʉvʉgolosu pange vavʉkave, apeene valya veene avoomoliiwe nʉ Ngʉlʉve wʉ vaavʉkavile. Avaasigye vooni akavavɨɨka vave vakiliitye inumbula, 8ndʉwʉ ʉVʉvɨge ʉVʉvalatse wiita,
“ɄNgʉlʉve aavavɨɨkile vave ʉta vaanu avagagiilwe ni tʉlʉ,
aavabungile amiiho pakʉta valeke ʉkʉlola,
ikange aavadɨndile imbʉlʉkʉtʉ valemwagwe ʉkʉpʉlɨka,
wʉ valɨwo ʉkʉsikila najɨ leelo.”#Simiilitso tsa Ndagɨlo 29:4; Yesaya 29:10
9Namwene ʉnkʉlʉdeeva ʉDavʉdi aatye,
“Wʉ vivomba inyekelo tsa veene,
ʉNgʉlʉve atsihambʉle tsive kyambi
nʉ ntego gwa kwonza aveene, nʉ kʉvavʉnga.
10Amiiho ga veene gadosolwe,
pakʉta valeke ʉkʉlola ʉgwʉ vivomba,
nɨ misana gya veene gɨbɨdame ngʼaani
kʉ vʉkʉvɨlwa wa kɨgono nɨ kɨgono.”#11:9-10 Mu mamenyu ago ga Zabuli, ʉDavʉdi itsova ikulongwi tsa valʉgʉ va mwene. Lɨno ʉPaulo atoolile amamenyu ago itsovelamwo ikulongwi tsa Vayahudi ʉwʉ vibeela ʉkʉlyɨdɨka ɨLivangɨli lya Ntwa ʉYɨɨsʉ (Zabuli 69:22-23).
Ʉkʉbeela kwa Vaisilahɨli kʉhambwike lʉsajo lwa vatava Vaisilahɨli
11Lɨno, ndivʉʉtsa ikange, aVaisilahɨli vaakʉvye, vakagwa lwoni? Baako, napadebe! Apeene, kʉ nongwa jya kʉmʼbeela ʉMpoki, ʉvʉpoki vʉviitsye nava vaanu avatava Vaisilahɨli, pakʉta aVaisilahɨli vavavonelage ɨkɨvini avaanu avatava Vaisilahɨli. 12Lɨno, ɨngave avaanu avatava Vaisilahɨli vaakavile ɨkɨmosu kya lʉhʉngʉ ʉlwakʉva aVaisilahɨli vaamʼbeelile ʉMpoki, pwʉ valakava ʉlʉvʉmbʉlɨlo siitso valaava aVaisilahɨli vakiliwiike nʉ kʉmwɨdɨka ʉMpoki.
13Lɨno, nditsova na nyɨ vaanu nyɨ mutava Vayahudi. Ʉlwakʉva ʉNgʉlʉve aansuungʼile ndɨve mpositili viinyo, ʉne ndikʉjyɨmɨka ɨmbombo ɨjyo ɨjyʉ ʉNgʉlʉve ikʉvavombela ʉnyie ʉkʉgendela kwane. 14Ndihʉʉvɨla ʉkʉta, ipange ʉwʉ tʉlɨ nkisa mpamato jʉviviniwaagwa nʉʉnyie kʉ galya ʉgwʉ ʉNgʉlʉve ikʉvavombela, pakʉta avange mu veene vapokwe. 15Lola, aVayahudi wʉ vamʼbeelile ʉYɨɨsʉ, ʉNgʉlʉve namwene avaabeelile aveene, akasajana na vaanu avatava Vayahudi. Pwʉ lɨno, ʉnsɨkɨ ʉpwʉ ʉNgʉlʉve alavɨɨdɨka aVayahudi ikange, ɨlaava ʉta avaswe vatsʉʉkile! 16Ʉkʉkongana nʉ mpelela gwa Kɨyahudi, ʉmuunu angahʉmye, kʉ mbombo jya Ngʉlʉve, ɨkɨkando ɨkɨvalatse kya vʉhevete wa ngano jya vʉlʉvʉso, pwʉ ʉvʉhevete wooni wiiva vʉvalatsiiwe. Ikange, ɨngave ɨmilela gya lizeituni minonu, apo natsi samba tsa lyene natsyene tsiiva nonu.#11:16 Avɨmbi vongosu viita ʉvʉlʉvʉso nɨ milela gya lizeituni isitsowa apa wʉ vatengʉtsi va Vaisilahɨli ʉwʉ vɨ Abulahamu, ʉIsaka nʉ Yakobo.
17Lɨno isamba itsinge tsyagɨdilwe, nʉʉnyie nyɨ muvyʉta samba tsa lizeituni lya mwinyasi mulʉngilwe muhange ni samba itsyasigye itsa lizeituni ɨlivyalano. Mwipata ɨkyakʉlya ʉkʉgendela mu milela gya lizeituni ɨlyo ɨlivyalano. 18Pwʉ lɨno, ʉnyie muleke ʉkʉbeda isamba itso. Muleke ʉkwɨtotsa, apeene mulʉmanye ʉkʉta ɨmilela nagikʉvahʉʉvɨla ʉnyie, apeene ʉnyie nyienye mukʉgɨhʉʉvɨla ɨmilela. 19Ipange jʉwiita, “Isamba itso tsyagɨdilwe pakʉta ʉne ndɨlʉngwe.” 20Itso lweli tsyagɨdilwe, kʉ nongwa jya kʉleka ʉkwɨdɨka, napeene ʉve ʉlɨ ndʉwʉ ʉlɨwo ʉkʉkongana nʉ lwɨdɨko lwako. Pwʉ lɨno wɨlolelage, ʉleke ʉkwɨtotsa, apeene ʉve nʉ lʉdwado, 21manya ɨngave ʉNgʉlʉve aavavʉngile aVayahudi, ndʉ kʉgɨda isamba itsyenelibɨkɨ, jɨlweli ʉve nalakʉleke kɨtsila kʉvʉngwa.
22Lolagi ʉmwʉ ʉNgʉlʉve ikʉvavombela avaanu avange ʉwiipa, nʉ mwʉ ivʉngɨla avaanu avange kʉ lʉvʉngʉ ʉlʉkali! Ikʉvapa ʉlʉvʉngʉ avo avabeelile ʉkʉmwɨdɨkɨla nʉ kʉkʉvombela ʉwiipa ʉve, ʉngave vugendelelaga ʉkʉmwɨdɨka. Lɨno, ndʉngava veeve, ʉngɨlekelwe ʉkʉmwɨdɨka, vugɨdwa. 23Naveene aVayahudi avo vangakilivukile ʉkʉmwɨdɨka ʉNgʉlʉve, jʉvilʉngwa ikange mu libɨkɨ, manya ʉNgʉlʉve alɨ na maka ga kʉvalʉnganitsa ikange. 24Ʉnyie nyɨ mutava Vayahudi muvyʉta samba tsa lizeituni lya mwinyasi, mwagɨdilwe nʉ kʉlʉnganitswa kʉ lizeituni ɨlivyalano, ɨkyo kɨɨnu kɨhenza ʉkʉvombeka.#11:24 Avaanu vigɨda isamba tsa libɨkɨ ɨlivyalano nʉ kʉlʉnganitsa mu lisina lya libɨkɨ lya mwinyasi. Lɨno ɨkɨɨnu ɨkɨhenza apa kyʉ ɨkɨ ɨkyʉ ʉPaulo iita isamba tsa libɨkɨ lya mwinyasi tsibadɨkwa mu lisina lya libɨkɨ ɨlivyalano. Mulʉmanye ʉkʉta najiiva mbombo nalamu kwa Ngʉlʉve ʉkʉvuja avalʉnganitse aVayahudi, avavyʉta samba tsa lizeituni ɨlinogiwa, kʉ mʼbɨkɨ gwa tsyene!
ɄNgʉlʉve nya kɨsa kʉ vaanu vooni
25Vɨɨdɨkivajyango, ndinogwa mulʉmanye ʉvʉsumbe wa Ngʉlʉve ʉvʉsihiime pakʉta muleke ʉnyie ʉkwɨginia. AVaisilahɨli vaninie vaale na matingo kʉ nsɨkɨ, ʉkʉsikila ʉpwʉ ɨmbalɨlo ɨjyavɨɨkile ʉNgʉlʉve jya vaanu avatava Vaisilahɨli jikwʉpɨlɨlwa nʉ mwene. 26Na kʉ nzɨla ɨjyo, ɨkɨvʉmbʉkʉ kyoni kya Isilahɨli kɨlapokwa. Ikulongwi itsi tsilɨngʼiine nʉ wʉ ʉNgʉlʉve aatsovile mu Vʉvɨge ʉVʉvalatse, ʉpwʉ aatye,
“ɄMpoki alahʉma kʉ Sayuni,
alavɨɨka ʉlʉjungu lwa Yakobo lʉleke ʉkʉmʼbeela ʉNgʉlʉve.
27Pwʉ ʉlwɨdɨngʼano lwango naveene lʉlakwɨlanila,
ʉnsɨkɨ ʉpwʉ ndɨlavasyɨkɨla imbiivi tsa veene.”#Yesaya 27:9; 59:20-21; Yelemiya 31:33-34
28Pa kulongwi jya kʉbeela ɨLivangɨli lya Yɨɨsʉ, aVaisilahɨli vɨɨpelile valʉgʉ va Ngʉlʉve pa lʉkavo lwanyie ʉnyie nyɨ vaanu nyɨ mutava Vaisilahɨli. Napeene, ʉNgʉlʉve apitsiige avaganile avo, ʉkʉkongana nʉ kʉvahala avakʉkʉjyavo nʉ kʉvɨɨka ʉlwɨdɨngʼano navo. 29Manya ʉNgʉlʉve angavoomole avaanu nʉ kʉvasaja, niweesi ʉkʉgalambʉka. 30Katale ʉnyie namwampʉlɨkage ʉNgʉlʉve, apeene lɨno mukwʉpɨlɨla ɨkɨsa kya Ngʉlʉve ʉlwakʉva aVaisilahɨli navikʉmpʉlɨka. 31Lola, vʉvʉle vʉle lɨno navikʉmpʉlɨka pakʉta ʉnyie mukolelwe ɨkɨsa kya Ngʉlʉve pwʉ kʉmbele naveene vakolelwe ɨkɨsa ndʉʉnyie. 32Manya avaanu vooni vaabeelile ʉkʉmwɨdɨkɨla ʉNgʉlʉve, nʉ mwene aavalekile vagendelelage ʉkʉleka ʉkʉmwɨdɨkɨla pakʉta iitse avakolele ɨkɨsa avaanu avo vooni.
ɄNgʉlʉve aginiwaagwe
33Veeni ʉviweesa ʉkʉlʉmanya ʉmwʉ vʉveelye vʉtsila kɨgelelo ʉvʉmosu, ʉlʉhala nʉ vʉmanyi wa Ngʉlʉve! Ikange, veeni ʉviweesa ʉkʉlʉmanya ʉvʉlamutsi wa mwene evo ʉkʉganula inzɨla tsa mivombele gya mwene!
34“Nakʉli ʉvagamanyile amasaago ga Ntwa ʉNgʉlʉve,
pange ʉmuunu va kʉntanga amasaago.”#Yesaya 40:13
35“Veeni ʉmuunu ʉvankopye ʉNgʉlʉve ɨkɨɨnu,
ɨkyʉ ʉmwene ʉNgʉlʉve anogye ʉkʉhomba?”#Ayubu 41:11
36Manya ʉNgʉlʉve vɨ aapelile isiinu syoni kʉ maka ga mwene.
Na kʉ nzɨla jya mwene, isiinu syoni sigendelela ʉkʉvepwo,
ikange isiinu syoni sya wɨɨmɨkiwa wa mwene.
ɄNgʉlʉve aginiwaagwe sikutsooni! Ameni.
Currently Selected:
Valooma 11: zga
Highlight
Share
Compare
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
