Levitico 22
22
Sʌc i majtan lac Yum
1-2Lac Yum tsi' pejca Moisés: Suben Aarón temel yic'ot i yalobilob: Yom mi' la' wen q'uel jini ch'ujul bʌ c majtan mu' bʌ i yʌq'ueñoñob jini israelob, cha'an ma'anic mi' bib'esañob jini Ch'ujul bʌ Cajñib. Joñon la' Yumon. 3Subeñob ja'el, majqui jach an ti' wenta cha'an mi yʌq'ueñon ch'ujul bʌ c majtan tsa' bʌ i ch'ʌmʌyob tilel israelob, mi tsa' ochi ba' añon jini motomaj che' an i bibi'lel, mi caj i chojquel loq'uel tic tojlel. 4Che' ja'el mi an leco bʌ i tsoy ti' pʌchʌlel motomaj, o mi woli' loq'uel i ya'lel i tsoy, mach mejlic i c'ux chuqui tac ch'ujul jinto che' cha' sʌquix. Majqui jach mi' tʌl ch'ujulelʌl o mi winic woli bʌ i q'uel i c'amʌjel, bibi' mi' cʌytʌl c'ʌlʌl ti ic'ajel. 5Che' an juntiquil motomaj mu' bʌ i tʌl jini chʌmen bʌ lucum, o mi yan tac bʌ mach bʌ sʌq'uesʌbilic, mach sʌquic mi' q'uejlel. 6Bibi' mi' cʌytʌl jini motomaj c'ʌlʌl mi' bʌjlel q'uin. Mach mejlic i c'ux chuqui tac ch'ujul jinto che' tsa'ix i cha'le ts'ʌmel. 7Che' mi' cha' pasel q'uin, cha' sʌquix jini motomaj. Che' jini muq'uix i cha' mejlel i c'ux chuqui tac ch'ujul, come i bʌlʌch i ñʌc'. 8Mach mejlic i c'ux jini bʌte'el mu' bʌ i bajñel chʌmel yic'ot tsʌnsʌbil bʌ cha'an yambʌ bʌte'el ya' ti mate'el. Come che' jini mi' bib'esan i bʌ jini motomaj. 9Yom ts'ʌcʌl mi' jac'beñoñob c mandar, cha'an ma'anic mi' tajob i mul, cha'an ma'anic mi' chʌmelob, come joñoñʌch mu' bʌ c sʌq'uesañob. 10Mach mejlic i c'ux chuqui tac ch'ujul mi juntiquil mach bʌ motomajic, mi i jula'ic jini motomaj, mi x'e'telic i cha'an. Cojach jini motomaj mi' c'ux. 11Mi mʌmbil i cha'an jini motomaj juntiquil i yaj e'tel, che' jini, mi mejlel i c'ux'. Che' ja'el jini mu' bʌ i yilan pañimil ya' ti' yotot mi mejlel i c'ux chuqui tac mi' c'uxe' jini motomaj. 12Che' mi' cha'len ñujpuñel i yixic'al juntiquil motomaj yic'ot ñajt bʌ tilem bʌ winic, mach mejlic i c'ux jini ch'ujul bʌ i bʌl ñʌc'ʌl. 13Cojach mi tsa' cʌle ti meba' i yixic'al motomaj, che' ja'el mi tsi' aq'uenti i juñilel cha'an mi' cʌyob i bʌ, mi tsa' cha' c'oti jini xch'oc che' bajche' an ti ñaxan, mi ma'anic i yalobil, che' jini mi mejlel i c'ux jini i bʌl i ñʌc' i tat. Pero mach mejlic i c'ux winic loq'uem bʌ ti yambʌ parte.
14Mi tsi' c'uxu we'elʌl juntiquil winic che' ma'anic tsi' ña'ta mi ch'ujul, che' jini la' i cha' aq'uen jini motomaj i q'uexol jini we'elʌl yic'ot i ñumel che' bajche' cha'p'is loq'uem bʌ ti lujump'is. 15Come mach yomic mi' bib'esʌntel chuqui tac sʌc mi' yʌc'ob jini israelob, come tsa'ix i yʌq'ueyoñob. 16Bʌbʌq'uen che' an majqui mi' ñusan ili mandar, come tsa'ix i c'uxu ch'ujul bʌ we'elʌl, come joñoñʌch mu' bʌ c sʌq'uesan, che'en lac Yum.
17-18Lac Yum tsi' cha' sube Moisés: Suben Aarón yic'ot i yalobilob yic'ot pejtelel jini israelob: Che' an juntiquil winic, mi israel mi mach israelic, mu' bʌ i yʌq'ueñon c majtan tsa' bʌ i wʌn subu, mi tsi' yʌc'ʌ majtañʌl tilem bʌ ti' bajñel pusic'al, 19mi caj j q'uel ti uts'at mi tsi' yʌq'ueyon alʌc'ʌl mach bʌ wis anic i c'amʌjel, mi tat wacax, mi tat tiñʌme', mi ña' chivo. 20Mach yomic mi la' wʌq'ueñon alʌc'ʌl che' an i c'amʌjel, come che' jini ma'anic mic ch'ʌm. 21Che' ja'el che' an juntiquil mu' bʌ i yʌq'ueñon c majtan cha'an i tijicñʌyel i pusic'al cha'an mi' ts'ʌctesan jini tsa' bʌ i wʌn ña'ta, mi tilem ti' bajñel pusic'al mi yʌc' ña' wacax, mi ña' tiñʌme', yom juncojt mach bʌ wis anic i c'amʌjel cha'an uts'at mij q'uel. 22Mach yomic mi la' wʌq'ueñon tic majtan jini xpots' bʌ, jini c'ʌscujem bʌ, jini lojwem bʌ, mi jinic am bʌ i c'amʌjel. Mach mejlic la' pulbeñon che' bajche' jini. 23Che' tilem ti la' bajñel pusic'al mi la' wʌq'ueñon tat wacax mi i tat tiñʌme', uts'at mi mejlel la' wʌc' che' c'ax ñuc o che' c'ax ch'o'ch'oc i bʌc'tal ti junwejl, pero mach uts'atic mi tsa' la' wʌc'ʌ cha'an i tojol jini majtañʌl che' wʌn subil bʌ la' cha'an. 24Mach mi la' wʌq'ueñon jini alʌc'ʌl am bʌ i lojwemal i yat. Ma'anic ba' ora mic ch'ʌm.
25Mi che'ʌch mi' ch'ʌmbeñon tilel yambʌ winic ñajt bʌ tilem mach mi la' wʌq'ueñon, come ma'anic mij q'uel ti uts'at jini alʌc'ʌl am bʌ i c'amʌjel mi i lojwemal, che'en lac Yum.
26-27Lac Yum woli' chʌn al: Che' mi' tojp'el i yal ña' wacax, mi i ña' tiñʌme', mi ña' chivo, wucp'ejl jach q'uin yom mi' cha'len chu'. Che' anix waxʌcp'ejl q'uin uts'atix cha'an mic pulbentel tic majtan. 28Mach uts'atic mi ti jini jach bʌ q'uin ma' tsʌnsan ña' wacax yic'ot i yal, mi i ña' tiñʌme' yic'ot i yal. 29-30Che' ma' tsʌnsʌbeñon c majtan che' bajche' yom a pusic'al cha'an ma' subeñon wocolix cʌlʌ, aq'ueñon wen sʌc bʌ cha'an uts'at mij q'uel jini a wofrenda. Ti jini jach bʌ q'uin yom mi' laj c'uxtʌl, mach yomic mi' cʌytʌl c'ʌlʌl ti' yijc'ʌlal. Joñoñʌch a Yumon.
31Wen ch'ujbinla pejtelel jini c mandar. Joñoñʌch a Yumon. 32-33Mach yomic mi la' lon pejcan j c'aba'. Yom mi la' ñuq'uesañon. Yom mi la' ch'ujutesañon ti' tojlel israelob. Come joñoñʌch mu' bʌ c sʌq'uesañetla. Tsac loc'sayetla ti Egipto cha'an mi la' wochel tic cha'an. Joñon la' Yumon, che'en.
Currently Selected:
Levitico 22: CTU77
Highlight
Copy
Compare
Share
Want to have your highlights saved across all your devices? Sign up or sign in
Chol de Tumbalá Bible © Bible Society of Mexico, 1977. Active Translation in Process
