Levitico 21
21
I sʌq'uesʌntel jini motomajob
1Lac Yum tsi' sube Moisés: Subeñob jini motomajob i yalobilob Aarón: Mach yomic mi la' tʌl jini xchʌmel ame bib'aquetla. 2-4Pero mach tic'bilic mi la' tʌl mi tsa' chʌmi la' pi'ʌl, mi' la' tat mi' la' ña', mi' la' walobil, mi' la' weran, mi xch'oc bʌ la' wijts'in max to bʌ anic i ñoxi'al. Mach yomic mi la' bib'esan la' bʌ ti' tojlel yambʌ winicob, come motomajetla.
5Mach la' wʌc' ti jujchintel i tsutsel la' jol. Mach mi' la' set' la' tsucti'. Mach yomic lojwentic la' bʌc'tal. 6Yom ch'ujuletla tic tojlel. Mach mi la' juch'tec' j c'aba', come an ti la' wenta la' wʌq'ueñon c majtan, come la' Yumon la Dioson. 7Mach mi' la' cha'len ñujpuñel yic'ot sts'i'lel bʌ x'ixic mi cʌybil bʌ x'ixic. 8Ch'ujul mi caj la' wajñel cha'an mi la' wʌq'ueñon c majtan tac, come ch'ujulon mu' bʌ c sʌq'uesañetla. 9Mi tsa' caji i cha'len i ts'i'lel jini xch'oc bʌ i yalobil motomaj, woli' p'aj i tat. Wersa mi caj i pulel ti c'ajc.
10Suben jini ñuc bʌ motomaj tsa' bʌ bombenti i jol ti aceite, lʌpbil bʌ i cha'an jini yajcʌbil bʌ i pislel: “Mach yomic wojtsic'tic a jol. Mach ma' tsil a pislel. 11Mach ma' wochel ba'an ch'ujlelʌl, anquese a tat a ña'. 12Mach ma' loq'uel ti Ch'ujul bʌ Ajñibʌl che' an a we'tel. Mach ma' lon q'uel jini Ch'ujul bʌ Ajñibʌl che' bajche' ba' jach bʌ otot, come joñon tsac wa'chocoyetla. Joñoñʌch la' Yumon. 13Yom xch'oc to bʌ x'ixic cha'an a wijñam. 14-15Mach ma' pʌy meba' x'ixic, mi cʌybilix bʌ x'ixic, mi sts'i'lel bʌ x'ixic. Yom ma' pʌy xch'oc to bʌ a wijñam ti' tojlel a pi'ʌlob. Mach yomic che' xʌbʌl i ch'ich'el a walobilob yic'ot yambʌ colem bʌ tejclum”. Che'ʌch yom ma' suben, che'en lac Yum.
16-17Lac Yum tsi' cha' sube Moisés: Yom ma' suben Aarón: Mach mejlic i yʌq'ueñon c majtan, mi juntiquilic i p'olbal am bʌ i p'ajomal. 18Mach mejlic i ñochtañon mi juntiquilic winic mach bʌ c'oq'uic, mi xpots' bʌ, mi jinic q'uichq'uichña bʌ i yoc, mi jinic mach bʌ wenic i wut, mi juntiquilic mach bʌ c'oq'uic. 19Mach mejlic ti tilel ja'el jini c'ʌscujen bʌ i yoc i c'ʌb, 20yic'ot jini cotol bʌ i pat, yic'ot jini pec' bʌ winic, yic'ot jini am bʌ tocal ti' wut, yic'ot jini am bʌ i sal ti' bʌc'tal, yic'ot tsoy, yic'ot mach bʌ yujilic albʌl. 21Majqui jach mach c'oq'uic ti' tojlel i p'olbal jini motomaj Aarón mach mejlic ti ochel ba' añon cha'an mi' pulbeñon c majtan. Tic'bil mi' pulbeñon c majtan come mach c'oq'uic. 22Mi mejlel i c'ux jini ch'ujul bʌ c waj, jiñʌch c'ax ch'ujul bʌ c majtan. 23Pero tic'bil mi yochel ya' ti junwejlel tsalʌl bʌ pisil yic'ot ya' ba'an pulʌntib. Ti' caj cha'an mach c'oq'uic jini winic, mach mejlic ti ochel ame i bib'esan jini Ch'ujul bʌ Cajñib, come joñon i Yumon mu' bʌ c sʌq'uesañob, che'en lac Yum. 24Che'ʌch bajche' jini Moisés tsi' cha' sube Aarón yic'ot i yalobilob, yic'ot pejtelel jini israelob.
Currently Selected:
Levitico 21: CTU77
Highlight
Copy
Compare
Share
Want to have your highlights saved across all your devices? Sign up or sign in
Chol de Tumbalá Bible © Bible Society of Mexico, 1977. Active Translation in Process
