Levitico 17
17
Jini cojach bʌ Ch'ujul bʌ Ajñibʌl
1-2Lac Yum tsi' sube Moisés: Suben Aarón yic'ot jini motomajob, yic'ot pejtelel israelob: 3-4Majqui jach mi' tsʌnsan juncojt tat wacax, mi tat tiñʌme', mi ña' chivo, ti' ti' jini tejclum ba' chumuletla, mi ma'anic tsi' pʌyʌ tilel ti' ti' jini Tabernáculo cha'an mi' tsʌnsan, an i mul jini winic cha'an tsi' cha'le tsʌnsa. Wersa mi caj i chojquel loq'uel ti tejclum. 5Che' jini tic'bilob jini israelob cha'an mach mi' tsʌnsʌbeñon c majtan ya' ti cholel. Yom mi' ch'ʌmbeñob tilel jini motomaj wʌ' ti' ti' jini Tabernáculo. Mi caj i pulbeñon i lewil cha'an tijicña mi cubin. 6Jini motomaj mi caj i tsijcʌben i ch'ich'el ya' ti pulʌntib ti' ti' jini Tabernáculo. Mi caj i laj pulben i lewil tac cha'an xojocña bʌ c majtan mu' bʌ c mulan. 7Pero mach yomic mi' chʌn bajñel ac'ob majtañʌl winicob cha'an mi' yʌq'ueñob jini xibajob. Mach yomic mi' wis ñajʌyel la' cha'an ili mandar ti pejtelel ora.
8-9Mic cha' subeñetla majqui jach mi' tsʌnsʌbeñon c majtan cha'an mi' bajñel ac' ti pulel, mi' ma'anic tsi' ch'ʌmʌ tilel ti' ti' jini Tabernáculo cha'an mi' yʌq'ueñon, wersa mi caj i chojquel loq'uel jini winic ti tojlel i pi'ʌlob.
Tsa' tijq'ui ti c'uxtʌl jini ch'ich'
10Che' ja'el mi an majqui mi' c'ux jini ch'ich', mi israel mi ñajt bʌ ch'oyolob, mi caj c choc loq'uel ti tejclum. 11Come i ch'ujlel mu' bʌ i yʌq'uen i cuxtʌlel jini alʌc'ʌl an ti' ch'ich'el. Tsa'ix cʌq'ueyet cha'an ma' tsijcan ya' ti pulʌntib cha'an i ñusʌntel la' mul ti' q'uexol i cuxtʌlel. 12Jini cha'an tsa'ix c subeyob jini israelob yic'ot jini ñajt bʌ ch'oyolob mach mejlic la' c'ux ch'ich'.
13Che' an bʌte'el mi te'lemut mu' bʌ i chucob, mi jini israelob, mi jini ñajt bʌ ch'oyolob, wersa mi caj i bec'beñob i ch'ich'el ti lum che' mi' tsʌnsañob. 14Come i cuxtʌlel pejtelel cuxul tac bʌ an ti' ch'ich'el. Jini cha'an tsac subeyob jini israelob mach mejlic i wis c'uxob jini ch'ich', come jiñʌch i cuxtʌlel pejtel cuxul tac bʌ. Jini cha'an mi caj i wersa chojquel loq'uel ti jini tejclum majqui jach mi' c'ux.
15Che' ja'el majqui jach mi' c'ux chʌmen bʌ bʌte'el che' bʌ tsa' tsʌnsʌnti cha'an yambʌ bʌte'el, wersa mi caj i wuts' i pislel. Mi caj i cha'len ts'ʌmel. Pero bibi' to mi' cʌytʌl c'ʌlʌl mi' bʌjlel q'uin. Che' jini mux i cha' q'uejlel ti sʌc. 16Mi ma'anic tsi' wuts'u i pislel, mi ma'anic tsi' cha'le ts'ʌmel, mi' cʌytʌl ti' bajñel wenta jini mulil. Che' tsi' yʌlʌ lac Yum.
Currently Selected:
Levitico 17: CTU77
Highlight
Copy
Compare
Share
Want to have your highlights saved across all your devices? Sign up or sign in
Chol de Tumbalá Bible © Bible Society of Mexico, 1977. Active Translation in Process
