Levitico 13
13
Mandar che' an leco bʌ tsoy
1-2Lac Yum tsi' sube Moisés yic'ot Aarón: Che' mi' sijt'el i pʌchʌlel juntiquil, mi leselix ti' pʌchʌlel, mi tsa' coli i chʌcajl tac, bʌbʌq'uen mi' tejchel leco* bʌ i tsoyil i pʌchʌlel. Yom mi' pʌjyel tilel ba'an jini motomaj, mi Aarón, mi i yalobil. 3Jini motomaj la' i wen q'uelben jini tsoy ti' bʌc'tal. Mi sʌsʌquix tsa' sujti jini i tsutsel ya' ti' pʌchʌlel, mi wen tamix i tsoyil ti' bʌc'tal, che' jini lecojix i tsoy. Jini motomaj wersa yom mi' tsictesan cha'an bibi' tic wut. 4Pero mi to'o sʌc petan jach i pʌchʌlel i bʌc'tal i c'ʌb, mi ma'anic i tsoy, mi mach sʌsʌquic woli' majlel i tsutsel i c'ʌb, che' jini, la' i yʌc' ti ñujp'ejl wucp'ejl q'uin. 5Che' ti' wucp'ejlel q'uin la' i cha' q'uel jini motomaj. Mi yic'ot jach jini i c'amʌjel, mi ma'anic woli' pam pujquel ti pejtelel i bʌc'tal, che' jini yom mi' cha' choc ti ñujp'ejl yambʌ wucp'ejl q'uin. 6Che' ti wucp'ejlel q'uin yom mi' cha' q'uel jini motomaj bajche' yilal. Mi tsa'ix sʌc jili jini leco bʌ i tsoy, mi ma'anic tsa' pam pujqui ti' pʌchʌlel, che' jini an ti wenta jini motomaj cha'an mi' tsictesan sʌquix jini winic. Jini c'amʌjel tsa' bʌ i taja, jini jach sujluyel i pʌchʌlel, pero wersa yom mi' wuts' jini i bujc. Che' jini sʌc mi' cʌytʌl. 7Mi ñumeñix tsa' p'ojli i c'amʌjel che' bajche' tsi' ñaxan q'uele jini motomaj, che' jini yom mi' cha' pʌs i bʌ ba'an jini motomaj. 8Che' mi' cha' q'uele' jini motomaj, mi tsa'ix utsi pam pujqui ti pejtelel i bʌc'tal, che' jini yom mi' tsictesan an i bibi'lel tic wut, come an leco bʌ i tsoy.
9-10Che' mi' pasel leco tac bʌ i tsoy, wersa yom mi' pʌjyel tilel ba'an jini motomaj. Mi caj i wen q'uel mi jiñʌch leco bʌ c'amʌjel am bʌ ti' pʌchʌlel, mi wolix i sʌc'an i tsutsel i pʌchʌlel o mi woli' tam'an i tsoy. 11Mi tsiquilix pejtelel jini, an ti' wenta jini motomaj cha'an mi' tsictesan bibi'ix ili winic. Mach yomix mi' chʌn ac' ti ñujp'ejl come an leco bʌ i tsoy. 12Mi tsa' utsi caji ti p'ojlel ti pamol i bʌc'tal, mi tejchem c'ʌlʌl ti jol c'ʌlʌl ti' yoc baqui jach mi' q'uel jini motomaj, 13che' jini, jini motomaj mi caj i cha' tsictesan cha'an c'oq'uix jini am bʌ leco bʌ i tsoy, cha'an cha' sʌquix i pʌchʌlel. Tsa'ix lajmi. 14-15Pero che' mi' q'uejlel yic'ot jach i c'amʌjel, an leco bʌ i tsoy jini winic. Tsiquilʌch come ma'anix i pʌchʌlel ya' ba'an i tsoy. 16-17Pero ti wi'il bʌ ora mi tsa' cha' sujti ti sʌsʌc jini i pʌchʌlel ba' puru i bʌc'tal jax tsa' cʌle, yom mi' cha' pʌs i bʌ ba'an jini motomaj. Che' mi' wen q'uele' jini motomaj, mi tsa'ix junyajlel lajmi i pʌchʌlel, yom mi' cha' tsictesan cha'an lajmenix jini winic.
18-19Mi tsa' lajmi leco bʌ i tsoy juntiquil winic, pero tsa' to cʌle ts'ita' i yejtal, mi bulul, mi sʌc petan, mi chʌc petan, che' jini wersa yom mi' pʌsben jini motomaj. 20Jini motomaj mi caj i wen q'uele'. Mi tsa'ix utsi p'ojli majlel ti' pʌchʌlel, mi sʌsʌquix tsa' majli i tsutsel i pʌchʌlel, awilan an ti wenta jini motomaj cha'an mi' tsictesan cha'an bibi'ʌch, come jiñʌch leco bʌ tsoy. 21Mi ma'anic tsiquil jini sʌsʌc bʌ i tsutsel che' mi' q'uel jini motomaj, mi mach ti' cotolic an jini i chʌmel ti' pʌchʌlel, che' jini yom to mi' ñujp'ejl wucp'ejl q'uin. 22Awilan mi tsa' utsi caji ti pujquel majlel ti' pamol i bʌc'tal, jini motomaj muq'uix i tsictesan jiñʌch leco bʌ i tsoy. 23Pero mi ma'anix tsa' chʌn pujqui ti pejtelel i bʌc'tal, che' jini i yejtal jach i lojwel an. Jini motomaj la' i tsictesan cha'an sʌcʌch.
24Che' ja'el che' an majqui mi' pulel ti c'ajc, mi tsa' cʌle i yejtal ba' tsa' puli, mi sʌsʌc, mi chʌchʌc jini i pʌchʌlel, 25la' i wen q'uele' jini motomaj. Mi sʌsʌquix tsa' sujti i tsutsel ba' tsa' puli, mi woli' tam'an ochel jini i tsoy, che' jini jiñʌch leco bʌ tsoy tsa' bʌ i taja ti pulel. Jini motomaj mi caj i tsictesan jiñʌch leco bʌ tsoy. 26Pero che' mi' q'uele' jini motomaj, mi mach sʌsʌquic tsa' cʌle i tsutsel ya' ba' tsa' puli, mi ma'anic tsa' tam'a ochel jini i tsoy, wersa yom mi' yʌc' ti ñujp'ejl wucp'ejl q'uin. 27Che' ti' wucp'ejlel q'uin jini motomaj mi caj i cha' q'uele' bajche' yilal. Mi tsa' utsi' pujqui ti' pʌchʌlel, che' jini la' i tsictesan jini motomaj lecojʌch jini i tsoy. 28Mi ma'anic tsa' pujqui jini chʌctocan bʌ i tsoy, mi ma'anix tsa' chʌn pujqui ti' pʌchʌlel, che' jini i yejtal jach ba' tsa' puli. Awilan la' i tsictesan jini motomaj mach lecojic jini tsoy.
29-30Mi an winic mi x'ixic mu' bʌ i pasel leco bʌ i tsoy ti' jol mi ti' tsucti', jini motomaj mi caj i wen q'uele' bajche' yilal. Mi tam jini tsoy, mi c'ʌnc'ʌnix tsa' majli jini i tsutsel, awilan jini motomaj mi caj i tsictesan jiñʌch leco bʌ tsoy. 31Che' ujtemix i wen q'uele' jini motomaj, mi ya' jach ti' pʌchʌlel an i yejtal, mi i'ic i tsutsel ya' ti pʌchʌlel, awilan jini motomaj mi caj i yʌc' ti ñujp'el wucp'ejl q'uin jini am bʌ i tsoy. 32Jini motomaj mi caj i cha' q'uele' che' ti' wucp'ejlel q'uin. Mi jontol bʌ tsoy, mi ma'anic tsa' chʌn pujqui, mi mach c'ʌnc'ʌnic tsa' majli i tsutsel i jol, mi mach cabʌlic i tsoy, 33la' i set'ben i jol. Mi an ti' wut, la' i jujchin i tsucti'. Pero mach yomic mi' jujchin ya' ba'an i tsoy. Che' jini, jini motomaj mi caj i cha' ac' ti ñujp'ejl. 34Che' ti' wucp'ejlel q'uin yom mi caj i cha' wen q'uele'. Mi ma'anic tsa' utsi pujqui jini i c'osil, mi mach tamic i tsoy, awilan la' i tsictesan jini motomaj cha'an sʌquix. Yom mi' wuts' i pislel cha'an sʌquix mi' cʌytʌl. 35-36Mi tsa' utsi caji ti pujquel jini i tsoy che' ujtemix ti subentel ti sʌc, awilan jini motomaj mi caj i cha' q'uele' jini tsoy. Mi tsa' utsi pujqui, jini motomaj mach yomix mi' chʌn pijtan cha'an mi' q'uel. Mi c'ʌnc'ʌn jini i tsutsel, la' i tsictesan jiñʌch leco bʌ tsoy. 37Pero mi jini i yejtal i tsoy ya' ti' jol junsujm jach an, mi tsa' cha' caji ti colel i tsutsel, che' jini lajmenix. Jini motomaj mi caj i tsictesan cha'an tsa'ix lajmi.
38-39Che' ja'el che' an winic mi x'ixic am bʌ sʌsʌc tac bʌ ti' pʌchʌlel, mi woli' lajmel tac, mach lecojic jini tsoy. Jiñʌch pasem bʌ ti' pʌchʌlel c'ʌlʌl ti yalobiyel. Awilan jini winic sʌcʌch.
40Che' ja'el che' xbulux i jol winic i tilelʌch. Sʌcʌch jini winic. 41Mi ti' tojel i pam mi' laj yajlel i tsutsel i jol i tilelʌch. Bulux i pam pero sʌcʌch jini winic. 42Pero mi ya' ba' tsa' yajli i tsutsel i jol an ts'ita' i tsoyil, mi sʌsʌc, mi chʌchʌc, tic'ʌl mi woli' tejchel leco bʌ i tsoy. 43-44Awilan jini motomaj mi caj i wen q'uele'. Mi an ts'ita' i tsoyil ya' ti' jol, mi sʌsʌc, mi chʌchʌc, o mi jontol yilal, awilan jiñʌch leco bʌ tsoy. Jini motomaj mi caj i tsictesan.
45Juntiquil winic am bʌ leco bʌ i tsoy wersa mi caj i tsil i bujc. Che' jax wajtsuc'tic yom i jol. La' i pʌch'cʌm i pʌchʌlel i yej am bʌ ti chan. La' i yʌl: “Bibi'onix, an leco bʌ c tsoy”. 46Ti pejtelel ora che' chʌn an jini leco bʌ i tsoy, bibi' mi' yajñel. Wersa mi' bajñel chumtʌl ti' pat jini tejclum.
47-49Mi an i cuxemal i tsuts, mi lino bʌ pisil, mi pʌchi, mi yʌxquich'an, mi chʌchʌc jini i pislel o mi pʌchi, che' jini tic'ʌl mi leco jini cuxemal. Yom mi' wersa pʌsbentel jini motomaj cha'an mi' q'uel. 50-51Jini motomaj mi caj i wen q'uele' bajche' yilal jini i cuxemal. Mi caj i yʌc' ti ñujp'el wucp'ejl q'uin. Che' ti' wucp'ejlel q'uin la' i cha' wen q'uele'. Mi tsa' utsi wen pujqui jini i pʌjq'uemal ya' ti' pʌchi, mi ya' ti' pisil, che' jini lecojʌch jini i pʌjq'uemal. 52Wersa yom mi' pul jini pisil, lino mi tsuts, mi pʌchi. Come jiñʌch leco bʌ i pʌjq'uemal. Wersa mi' pulel. 53-54Pero che' mi' cha' q'uel jini motomaj che' ti' wucp'ejlel q'uin, mi ma'anix tsa' chʌn pujqui jini i pʌjq'uemal ya' ti' pislel mi ti pʌchi, jini motomaj mi caj i yʌc' ti pojquel, mi caj i cha' ñup' yambʌ wucp'ejl q'uin. 55Che' ñumeñix wucp'ejl q'uin, mi' ma'anic tsa' ts'ita' lajmi jini i pʌjq'uemal, mi yic'ot jach, che' jini jiñʌch leco bʌ i pʌjq'uemal. Yom mi' pulel jini pisil mi pʌchi, come laj pʌjq'uemix. 56Mi tsa' ts'ita' yajpi jini i pʌjq'uemal che' bʌ tsi' cha' q'uele' che' bʌ tsa'ix pojqui, la' i tsep loq'uel jini motomaj. 57Pero mi tsa' cha' tsictiyi, jiñʌch leco bʌ i pʌjq'uemal. Wersa mi' pulel. 58Pero mi ma'anix tsa' tsictiyi che' wuts'bil, yom mi' cha' wuts' ti' cha'yajlel. Che' jini uts'at mi' cha' c'ʌjñel, che'en lac Yum.
59Jiñʌch lac tic'ol ti' tojlel leco bʌ cuxemal mu' bʌ i pʌc' lac pislel yic'ot chuqui tac melbil bʌ ti pʌchi.
Currently Selected:
Levitico 13: CTU77
Highlight
Copy
Compare
Share
Want to have your highlights saved across all your devices? Sign up or sign in
Chol de Tumbalá Bible © Bible Society of Mexico, 1977. Active Translation in Process
