Uro A LƐTƐ KYƐYUOBU
A LƐTƐ KYƐYUOBU
A Lɛtɛ Pɔɔl Naŋ Sɛge Ko A Urom Teŋɛ Deme, da waa la lɛtɛ o naŋ sɛge ka o nare ba kyaare ne teɛroŋ o naŋ da taa a boɔrɔ ka o gaa te nyɛ a puoruu laŋne deme naŋ be a Urom teŋɛ poɔ. O teɛroŋ da la ka o wa be a Kiristabiiri zie a toŋ ko ba belaa, kyɛ ka ba soŋ o ka o yi be gaa Sepeen teŋɛ. O da sɛge la a lɛtɛ ka o kyaane yɛlɛ o naŋ baŋ kyaare ne a Kiristabiiri yeldeebo ane lɛnɛɛ a naŋ seŋ ka Kiristabiiri erɛ ba nyɔvore yel-erre poɔ. A lɛtɛ taa la yɛlɛ na zaa Pɔɔl naŋ da boɔrɔ ka o wuli a noba.
A Pɔɔl naŋ da wa puori a puoruu laŋne deme naŋ be a Urom teŋɛ poɔ baare, a yeli ko ba lɛnɛɛ o naŋ puoro Naaŋmen korɔ ba, o pãã da sɛge la a lɛtɛ yelzu, “A Ŋmen-yelnoore poɔŋ la ka Naaŋmen maŋ iri O mennoŋ wuli a yi yeldeebo te gaa yeldeebo eŋɛ; aŋa ba naŋ da sɛge a lɛ, ‘Soba na zaa naŋ e nemmeŋɛ, na taa la o nyɔvore ne yeldeebo.’ ” (1:17)
A Pɔɔl pãã da yeli la yɛlɛ yaga a kyaare ne a o yelzu ŋa. O manne ka a nensaalboorɔ zaa, Gyuumine ane a Nemboore-yobo seŋ ka ba ne Naaŋmen leɛ maale taa, bonso, ba zaa waa la yeni a be yelbieri kpeɛ̃õ puliŋ. Nensaalba ne Naaŋmen maŋ leɛ maale la taa a yi ba yeldeebo ba naŋ taa a Yeezu Kirista eŋɛ. A yi a lɛ puoriŋ, a Pɔɔl da manne la a nyɔvo-paalaa naŋ be a Kirista eŋɛŋ a yi nensaalba ne Naaŋmen naŋ leɛ maale taa zuiŋ. A yelderɛ taa la emmaaroŋ ne Naaŋmen kyɛ ka a Naaŋmen Vooroŋ faa o yi ne yelbieri ane kũũ kpeɛ̃õ poɔ. A yi a ganzuri anuu a te ta a ganzuri anii (5—8), a Pɔɔl da manne la bon naŋ so ka a Naaŋmen Bege teroo ane a Naaŋmen Vooroŋ kpeɛ̃õ naŋ be a yelderɛ nyɔvore poɔ. A apostolii Pɔɔl pãã da mɔɛ la ka o iri a soorebiri lɛnɛɛ a Gyuumine ane a Nemboore-yobo meŋ naŋ na poɔ a yɛlɛ a Naaŋmen naŋ nare biŋ a kyaare ne nensaalba zaa. A Pɔɔl da kpulli la a yɛlɛ zu a yeli ka a Gyuumine naŋ da zagre a Yeezu e la yɛlɛ Naaŋmen naŋ nare biŋ ka ka O tu a be kyɛ tage nensaalboorɔ zaa ka ba wa peɛle a Naaŋmen garaaseɛ naŋ be Yeezu Kirista eŋɛ. A Pɔɔl da sage deɛ la ka a Gyuumine koŋ zagre a Yeezu yɛlɛ tegitegilɛ. A lɛtɛ poɔ yɛlɛ baaroo, a Pɔɔl da sɛge kyaare ne la lɛnɛɛ Kiristabie naŋ seŋ ka o taa o nyɔvore, a gaŋ a zaa, lɛnɛɛ o naŋ seŋ ka o taa nɔmmo kyaare ne o taaba. O da de la a yelzuri ama wuluu ka a e Naaŋmen toma, a Kiristabiiri feroo toma kyaare ne a gɔbena ane ba taaba ane soorebie kyaare ne zomɔ meŋ yɛlɛ. O da kpulli la a lɛtɛ yɛlɛ ne o meŋɛ yelbie ane Naaŋmen puubu yelbie.
A Lɛtɛ Poɔ Yɛlɛ Poŋ Tutaa
1. A Lɛtɛ Kyɛyuobu Ane A Lɛtɛ Yelzu 1:1-17
2. A Naŋ Fere Ka Neɛzaa Nyɛ Faabo 1:18—3:20
3. Naaŋmen Faabo Sobiri 3:21—4:25
4. A Nyɔvo-paalaa A Kirista Eŋɛŋ 5:1—8:39
5. Izerayɛl Biiri Arezie A Naaŋmen Yɛlɛ O Naŋ Nare Biŋ Poɔ 9:1—11:36
6. Kiristabiiri Gyogo Yɛlɛ 12:1—15:13
7. A Yɛlɛ Zukpulluu Ane Pɔɔl Naŋ Puori Noba 15:14—16:27
Currently Selected:
Uro A LƐTƐ KYƐYUOBU: DNTTP
Highlight
Share
Copy
Want to have your highlights saved across all your devices? Sign up or sign in
First New Testament in Dagaare Language © The Bible Society of Ghana, 2013.