Tom 28

Pɔɔl Naŋ Ta Malta Teŋɛ

1Te naŋ da wa zo do a dondoli baare, lɛ la ka te da woŋ ka a mandoba#28:1 Mandoba: Mandoba waa la teŋɛ naŋ be mane sogɔŋ. na yuori la Malta. 2A teŋɛ deme da taa la nimibaaloŋ yaga ne te. Saa naŋ da piili miire kyɛ ka ɔɔre da erɛ zuiŋ, ba da de te la saanoŋ velaa a da mare vũũ a vɛŋ ka te zaa wa zeŋ gyili. 3Pɔɔl da tuuri la dabilii lantaa a eŋnɛ a vũũ poɔ, kyɛ a vũũ toloŋ da eɛɛ la ka dompane kaŋ da vare yi a wa do mele o nu. 4A teŋɛ deme naŋ da nyɛ ka a waabo mele a o nu, ba da yeli ko la taa, “A dɔɔ ŋa waa la neŋkoorɔ, aneazaa ka o yi la a mane poɔ, kyɛ yelmennoŋ naŋ ba sage ka o voorɔ.” 5Kyɛ a Pɔɔl da mere la a waabo lɔɔ eŋ a vũũ poɔ, kyɛ ka yeli zaa ba e o. 6Ba da teɛrɛ la ka o na mɔre la bee a deɛ le kpi, kyɛ ba naŋ da kyɛlle ka a kɔɔre kyɛ ka ba da ba nyɛ yelfaa zaa ka o e a Pɔɔl, ba teɛroŋ da leɛɛ la ka ba yeli ka o waa la ŋmen.

7Wɛre mine da peɛle la a teŋɛ ŋa, a da waa dɔɔ kaŋ naŋ taa yuori a teŋɛ ŋa poɔ ka o yuori di Pubeleyo soobo. O da de te la saanoŋ velaa zaa bebie ata. 8A Pubeleyo saa da beɛrɛ la a gaŋ ane entoloŋ kyɛ zoro bin-zẽẽ. A Pɔɔl da gaa te nyɛ o la, a da puori eŋ o kyɛ da pare o nuuri o zu ka o da nyɛ sammo. 9A yeli ŋa puoriŋ, a noba banaŋ naŋ da be a teŋɛ poɔ a taa baaloŋ meŋ da waɛ la, a da wa nyɛ sammo. 10Ba da ko te la gyeremɛ yaga zaa, kyɛ te naŋ da wa kpɛ a gbori a na gaa, ba da ko te la bonzaa te naŋ boɔrɔ.

Pɔɔl Naŋ Ta Urom

11Kyuuri ata puoriŋ, te da kpɛ la gbori kaŋ naŋ da are a be a ɔɔkpoŋ zuiŋ. A gbori ŋa da yi la Alɛzandereya teŋɛ ka ba da boɔlɔ o Yeere. 12Te da are la Siraku poɔ beri ata; 13a yi be a mɔŋ gɔlle a da te ta Urɛgyiyo. Bebi-gbuli naŋ da wa tɔle, a sapare nuduluŋ saseɛ da fuuro la kyɛ a beri ayi daare te da ta la Puteoli. 14Te da nyɛ la a yelderebɛ a be, ka ba da boɔle te ka te wa zeŋ ba zie bebie ayopoĩ. A lɛ la ka te da ta a Urom. 15A yelderebɛ naŋ yi a be naŋ da wa woŋ a te yɛlɛ, ba da yi la Apeyo Daa Poɔ ane Teree Taavens#28:15 Teree Taavens: O da waa la sokyɛnemɛ pɛnnoozie. ka ba tuori te. A Pɔɔl naŋ da wa nyɛ ba, o da puori la Naaŋmen ameseɛrɛ kyɛ da nyɛ faŋ paalaa.

16Te naŋ da wa te kpɛ a Urom poɔ, ba da ko la a Pɔɔl sori ka o na kpeɛrɛ o yoŋ ane a sogyɛ na naŋ da guuro o.

Pɔɔl Ane A Gyuumine Wederebɛ Yɛlɛ A Urom Poɔ

17Bebie ata puoriŋ, a Pɔɔl da boɔle la a Gyuumine nembɛrɛ naŋ da be a be lantaa. Ba naŋ da wa lantaa, o da yeli ko ba la, “N yɔɔmine, aneazaa ka N ba e yelfaa zaa a sãã a te noba bee sãã a te sããkommine yeltuuri, kyɛ ba da nyɔge ma la a Gyɛruzɛlɛm poɔ a de ko a Uroma noba. 18Ba naŋ da wa kaa n yɛlɛ nyɛ, a Uroma noba da boɔrɔ la ka ba bare ma, bonso, ba da ba nyɛ n saanaa zaa naŋ seŋ ne kũũ. 19Kyɛ a Gyuumine naŋ da ba sage, a da fere ma la ka N yeli ka ba taa ma wa ne a nakpoŋ zie, aneazaa ka N da ba taa yelzaa ane a n noba. 20A yɛlɛ ama zuiŋ la so ka N e ka N nyɛ yɛ a yeli yɛlɛ ko yɛ, bonso, a Izerayɛl teɛretɔroo#28:20 Teɛretɔroo: A Dagaaba mine maŋ yeli ka ‘Kyelloo.’ zuiŋ la ka ba leŋ ma ne a banzɔlɔ ama.” 21Ba da leɛ yeli sɔgɛɛ la, “Te ba nyɛ gane zaa naŋ yi Gyudiya ka o yeli fo yɛlɛ ko te, ka a yɔɔmine kanzaa naŋ waana a kyɛ meŋ ba manne fo yeli zaa bee yeli fo yelfaa. 22Kyɛ te boɔrɔ la ka fo manne a fo poteɛrɛ ka te woŋ, bonso, te baŋ ka a puoruu ŋa eŋ, ba yele zɔɔrɔ ne la o yɛlɛ zie zaa.”

Pɔɔl Naŋ Moɔle A Yelnoore A Urom Poɔ

23Ba naŋ da wa biŋ bebiri ko o, ba da laŋ la taa a o kpeɛbozie yaga zaa. O da manne la a yɛlɛ ko ba a yi bebie a te ta zimaane, a dire a Naaŋmen naaloŋ danseɛ, a da tu a Moozul wuluu ane a Ŋmen-yelmanneba yɛlɛ zie a erɛ aneɛ ka o e ka ba baŋ a Yeezu yɛlɛ. 24Ba mine da sage de la a yɛlɛ o naŋ da yeli kyɛ ka ba mine da ba sage de. 25A yɛlɛ ŋa zuiŋ, yelbawontaa da kpɛ la ba sogɔŋ, kyɛ ba naŋ da wa yaara, a Pɔɔl da la yeli la yelyenaa kaŋ poɔ, “A Vooroŋ Soŋ da yele la yelmeŋɛ, o naŋ da tu a Ŋmen-yelmanna Azaaya zie a yele korɔ a yɛ sããkommine:

26‘Gaa a noba ŋa zie a te yeli,

Yɛ sereŋ na kyɛlle la, kyɛ yɛ koŋ baŋ a tɛgɛ,

ka yɛ sereŋ kaa, kyɛ yɛ koŋ nyɛ.

27Bonso, a noba ŋa taa la sukyiri kpagloo,

ka a ba tobo e kpeɛne, a ba wono,

kyɛ ka ba ũũ ba nimie;

ka ka ba na ta wa toɔ̃ kaa ne ba nimie,

a kyɛlle ne ba tobo,

a baŋ a tɛgɛ ne ba poɔ zaa a leɛ wa N zie

ka N na saŋ ba.’

28Yɛ pãã baŋ ka ba taa la a Naaŋmen faabo ŋa a gaa ne a Nemboore-yobo#28:28 Nemboore-yobo: Noba na zaa naŋ da ba waa Gyuumine la a Nemboore-yobo. zie; ba na kyɛlle la.” 29[A Pɔɔl naŋ da wa yeli a yeli ŋa baare, a Gyuumine da iri gɛrɛ la a kyɛ ŋmeɛrɛ nɔkpeɛne ne taa yaga zaa.]

30O da kpɛ la be yuon-gbulo ayi a da kaara o meŋɛ zu, a da derɛ banaŋ zaa naŋ da wa o zie saanoŋ, 31a moɔlɔ a Naaŋmen naaloŋ yɛlɛ a kyɛ kanna a Daana Yeezu Kirista yɛlɛ a ba zoro dabeɛ̃ kyɛ ka bonzaa da ba pigi o sori.

Currently Selected:

Tom 28: DNTTP

Highlight

Copy